BAQ.kz - Қазақстан жаңалықтары USD 344.58 BAQ.kz - Қазақстан жаңалықтары EUR 400.51 BAQ.kz - Қазақстан жаңалықтары RUB 5.47
Астана:

Вьетнам әуе толқынында қазақ әуендері қалықтайды

Бұл пікір Азия мен Еуропаның білікті медиаменеджерлерінің қатысуымен Астанада өтіп жатқан «Азияның медиа диалогы» форумы аясындағы тараптар кездесуі барысында айтылды, деп хабарлайды Baq.kz ақпарат агенттігі.

«Qazaq radiolary» ЖСШ-нің бас директоры Мәди Манатбекұлы мен Вьетнамдық VOV3 музыкалық арнасы директорының орынбасары Mr.Tran Nhat Duong бастаған топ жетекшілері алдағы уақытта бірлесе атқаратын өзара тиімді жобаларды талқылап, екі жақты ынтымақтастық меморандумына қол қоюға келісті.

Енді келешекте қазақтың күйлері мен халық әндері Вьетнам радиосының әуе толқынында әуелесе, біз Қазақ радиосы арқылы мәлім де беймәлім виет елінің әуенін тыңдайтын боламыз. Тараптар сонымен қатар мәдениет пен туризмді дамытуға бағытталған тың жобалар әзірлеуге уағдаласты.

«Вьетнам радиосы «Қазақ радиолары» серіктестігі секілді әлеуметтік және қоғамдық бағытта жұмыс істейді. Олар да радиоларын сан салаға жіктеп-жіліктепті. Вьетнамдықтарды біздің ұлттық және классикалық музыкамыз қызықтырып отыр. Ал, бізге олардың туризм бағытындағы бағдарламасы керек. Өйткені, Вьетнам - Қазақстан үшін әлі толық танылып үлгермеген ел. Сондықтан, екі елдің радиолары мәдениет және саяхат саласын қал-қадірінше дәріптеуге келістік», - деді «Qazaq radiolary» ЖШС-нің бас директоры Мәди Манатбекұлы.

Сонымен қатар, VOV музыкалық арнасы директорының орынбасары Mr.Tran Nhat Duong мырза да өз ойын айтты.

«Біз қазақ елінің төрінде табысты келісім жасағанымызға қуаныштымыз. Құшақ жая қарсы алғандарыңызға айтар алғысымыз шексіз. Болашақта осы кездесудің қорытындысы бойынша екі тарап ынтымақтастық туралы меморандумға қол қоятын болады. Бұл құжат - екі елдің мемлекеттік радиолары арасындағы байыпты байланыстың берік іргетасы болып қаланатынына сенімдіміз. Екі жақты келісім болашақта мәдениет пен туризмнің дамуына өзіндік септігін тигізеді деп ойлаймыз. Кездесуге шақырғандарыңызға рахмет! Келелі кеңес құрған кездесу қорытындысы бойынша көп күттірмей бірлескен жұмысты бастауға кірісеміз»,- деп шынайы ризашылығын білдірді ол.

Біздің Telegram-парақшамызда Қазақстанның маңызды жаңалықтары. Жазылыңыздар!

Ұқсас сілтемелер:
Пікірлер