BAQ.kz - Қазақстан жаңалықтары USD 346.68 BAQ.kz - Қазақстан жаңалықтары EUR 404.02 BAQ.kz - Қазақстан жаңалықтары RUB 5.47
Астана:

Өскеменде ораза айында ақысыз «Имам такси» жобасы қолға алынады

Бұл таксилер ауызашардан соң оқылатын тарауих намазына келетін адамдарды ақысыз тасымалдайтын болады, деп хабарлайды Baq.kz ақпарат агенттігі kaz.altaynews.kz сайтына сілтеме жасап.

Бүгін он екi айдың сұлтаны болған қасиетті Рамазан айы басталды. Құран Кәрімнің алғашқы аяттары түскен осынау кешірім мен құлшылық айы қарсаңында Қазақстан мұсылмандары діни басқармасының Өскемен өңірі бойынша өкіл имамы, облыстық «Халифа Алтай» мешітінің бас имамы Ермек қажы Мұқатай брифинг өткізді.

Оның айтуынша, ораза кезінде бір айы бойы «Имам такси» жобасы қолға алынады. Жоба аясында діни қызметкерлер жамағатқа тегін қызмет көрсетеді. Бұл таксилер ауызашардан соң оқылатын тарауих намазына келетін адамдарды ақысыз тасымалдайтын болады. Өйткені түнге қарай қоғамдық көліктер тоқтап қалатындықтан, қаланың әр шетінде тұратын адамдарға мешітке келу қиындық туғызады. Осы жайтты ескерген имамдар қасиетті Рамазан айында адамдардың алаңсыз құлшылық жасауына мүмкіндік туғызу үшін аталмыш жобаны қайта жандандырмақ.

Бас имамның айтуынша, әдеттегідей Рамазан айына бір күн қалғанда өңірдің барлық мешіттерінде қас қарая тарауих намазы оқылады.

«Ауыз бекіту және ашу уақыттары жергілікті жердегі діни өкілдіктер бекіткен кестеге сәйкес орындалуы керек. Өйткені еліміздің аумағы ұлан-ғайыр болғандықтан, Алматы мен Батыс Қазақстанның ораза кестесі біздің облысқа келмейді. Жалпы, ораза – бiр ай бойы iшiп-жеуден ғана емес, өтiрiк, өсек айтудан, бiреудi сырттай ғайбаттаудан, адамгершілiкке жатпайтын әдет-қылықтардан тыйылатын ай. Ораза – балиғат жасына жеткен, ақыл-есі түзу, сырқат емес адамдарға парыз. Ал денсаулығында кінәраты бар жандарға Жаратушы иеміз кешіріммен қарайды», - деп түсіндірген Ермек қажы Мұқатай биылғы Рамазан айында атқарылатын игілікті істер туралы да айтып өтті.

Біздің Telegram-парақшамызда Қазақстанның маңызды жаңалықтары. Жазылыңыздар!

Ұқсас сілтемелер:
Пікірлер