BAQ.kz - Қазақстан жаңалықтары USD 369.98 BAQ.kz - Қазақстан жаңалықтары EUR 428.7 BAQ.kz - Қазақстан жаңалықтары RUB 5.64
Астана:

Наурызда инфляцияның жылдық деңгейі 6,6% болды

Наурызда инфляцияның жылдық деңгейі нысаналы дәліз шегінде сақтала отырып 6,6% болды. Өндірушілер шығасыларының өсуі және импорттың қымбаттауы инфляцияның негізгі факторлары болып қалуда. Бұл туралы бүгін Алматы қаласында телевизиялық БАҚ-қа арналған брифингте сөйлеген сөзінде Қазақстан Ұлттық Банкінің Төрағасы Данияр Ақышев мәлімдеді, деп хабарлайды Baq.kz ақпарат агенттігі.

Ол сондай-ақ қаңтар-ақпанда халықтың нақты ақшалай кірістерінің өсуі 2017 жылғы үздіксіз төмендеуден кейін оң аймаққа ауысқанын атап өтті. Оның айтуынша, құбылмалы құрауыштар кірмейтін базалық инфляция наурыздың қорытындысы бойынша жалпы инфляциядан төмен – 5,9% болуын жалғастыруда, бұл тұтыну нарығындағы инфляциялық қысымның төмендеуін растайды.

«Халықтың инфляциялық күтулері төмендеуде. Наурызда халыққа жүргізілген пікіртерім нәтижелерін бағалау жыл басынан бастап бір жыл бұрын күтілетін инфляцияның 7,1%-дан 5,8%-ға дейін төмендеуді көрсетті. Қабылданатын инфляция көрсеткіштері өзгерген жоқ. Өткен жылы тауарлар бағасы бұрынғыға қарағанда тезірек өсті деп есептейтін респонденттердің үлесі наурызда 49% деңгейінде қалды», - деді Данияр Ақышев.

Ол экономикалық белсенділік оң серпін көрсетіп жатқанын атап өтті.

«Қаңтар-ақпанда қысқа мерзімді экономикалық индикатор жылдық көрсетуде 5,2% өсті. Тау-кен және өңдеуші өнеркәсіпте, ауыл шаруашылығында, сауда мен көлікте оң өсу қарқындары сақталып отыр. Атап айтқанда, өңделмеген мұнай мен темір кенін өндірудің ұлғаюы, металлургияда, азық-түлік өнімдерін өндіруде және машина құрылысында өсу байқалып отыр. Екі айда негізгі капиталға инвестициялардың өсуі 54,4% болды», - деді Данияр Ақышев.

Оның айтуынша, сыртқы нарықтардағы ахуал Қазақстан үшін қолайлы болып сақталуда. Базалық мөлшерлеме бойынша алдыңғы шешім қабылданған кезеңнен бері сыртқы іргелі факторлар серпіні өзгерген жоқ. Жылдың басынан бастап мұнай бағасы орташа алғанда бір баррель үшін 65 АҚШ долларынан жоғары деңгейде қалыптасты. Негізгі сауда әріптес елдердегі инфляция қарқыны қалыпты болып бағаланады.

«Ұлттық Банк сыртқы нарықтардағы ахуалға үнемі мониторинг жүргізіп, оның Қазақстанның қаржы нарығына әсерін бағалап отырады. Өткен аптадағы Ресейдегі оқиғаларға жауап ретінде ішкі валюта нарығындағы құбылмалылықты біз қысқа мерзімді, қалыпты деп бағалаймыз. Осыған байланысты теңге бағамының әлсіреуіне жауап ретінде Ұлттық Банк ақша-кредит талаптарын қатаңдату қажет емес деп санайды», - деп қорытындылады Д. Ақышев.


Біздің Telegram-парақшамызда Қазақстанның маңызды жаңалықтары. Жазылыңыздар!

Ұқсас сілтемелер:
Пікірлер