BAQ.kz - Қазақстан жаңалықтары USD 346.68 BAQ.kz - Қазақстан жаңалықтары EUR 404.02 BAQ.kz - Қазақстан жаңалықтары RUB 5.47
Астана:

Бүгін Чарли Чаплиннің туған күні

Бүгін, яғни 16 сәуір күні әлемге әйгілі актер, режиссер, дыбыссыз кино әлемінде дене-қимыл, ым-ишаратымен ерекшеленіп, кедей мен мырза образын қоса білген Чарли Чаплиннің туған күні. Оның өміріне қатысты қызықты мағлұматтарды оқи отырыңыз.

Отбасы және балалық шағы

Чарльз Спенсер Чаплин 1889 жылы 16 сәуір күні Лондонда дүниеге келген. Ата-анасы ағылшын мәдениетінің белді өкілдері болған. Дәлірек, эстрада жанрындағы әртістер болған. Олар ән мен биден шашу шашып, әртүрлі театрларда өнер көрсетіп, антреприза сипатындағы сайыстарға қатысқан. Чарлидің отбасы ешқандай мұқтаждықсыз өмір сүрген. Бірақ бұл отбасы үшін қаражатқа қарағанда, музыка мен сахна құндылығы жоғары тұратын. Ата-анасы Чарли мен бауыры (әкесі басқа, анасы бір) Сиднидің шығармашылыққа деген махаббатын оятқан. Нәтижесінде ағайындылардың екеуі де актер болған.Анасының дауысымен қиындықтар болған кезде Чарли бес жасында анасының орнына сахнаға шыққан. Сахнаға шыққан бірінші күннен бастап, тыңдарманды таңғалдырып, көпшілікті өзіне баурап алған. Көрермендердің көңілінен шыққаны сондай сахнаға монеталар мен банкноттар лақтырған. Бала кезіндегі сүйкімді қылығымен талай көрерменді баурап, сахнаға бірнеше рет шығады. Дегенмен, біраз уақыт өткен соң бұл отбасының тұрмысы түбегейлі өзгереді. Анасы көмейіндегі қиындықтар кесірінен дауысынан мәңгілікке айырылады. Әкесі ішімдікке салынып, 37 жасында Лондондағы емханалардың бірінде қайтыс болады. Анасы Ханна Чаплин есінен танып, психиатриялық ауруханаға түседі. Ал жетім қалған балалар арнайы әлеуметтік жүмыс істейтін үйге түседі, яғни тамақ үшін өздері жұмыс істейді. 1898 жылдың қыс мезгілінен бастап Чарли «The Eight Lancashire Lads» деген топпен бірге өнер көрсете бастайды. Сол кездерде Чарли комедия жанрында қысқа қойылымдар қояды.

Билеп жүріп дәрігердің көмекшісі, газет сатушы, баспа үйінде қызметкер ретінде жұмыс істейді. Бірақ, ешқандай жерде тұрақты жұмысқа қалмайды. 1903 жылы он төрт жасар Чаплин «Шерлок Холмс» қойылымында тұрақты рөл ойнау мүмкіндігіне ие болады. Одан соң біраз уақыт жеңіл жанрдағы эстрада театрында өнер көрсетіп жүреді. 1908 жылы Фреда Карно тобының актері болады. Аталған топпен Ұлыбританияның барлық жерін аралап, АҚШ-на гастролдік сапармен барады. «Keystone» компаниясының продюсерлері Чарлидің өнерін ұнатып, тұрақты жұмыс ұсынады. Актер келіскен кезден оның мүмкіндікке толы жаңа басталады.

Чарлидің танымал болуы. Фильмография

Киноиндустрия мансабындағы алғашқы қадамдар сәтсіз шығады. Уақыт өте келе Чарли Чаплин түскен фильмдер студияға табыс түсіре бастайды. Америкалықтардың арасында айтарлықтай танымал болып үлгереді. Кейін басшылықпен келісе алмай киностудиядан кетуге мәжбүр болады.

Жиырмасыншы ғасырдың оныншы жылдарында Чарли актер, режиссер, сценарий жазушы болып өзі жұмыс істей бастайды. Біраз уақыт әйелқұмар еркектің рөлін ойнайды. Уақыт өте келе ол өз образын тапқандай болады. Ол образы - Чарлиді әлемге әйгілі еткен образ. 1917 жылы кинодағы рөлі үшін 1 млн доллар көлемінде гонорар алады. Осы образымен көптеген киноға түсіп, аңыз адамға айналады. Екі рет Оскар сыйлығын иеленеді.

Өмірінің соңғы жылдары

Актер қанша танымал болса да, сол танымалдылықтың екінші ұшынан опық жейді. Оны коммунистік қылмыскер атап, ол түскен фильмдерді прокаттан алып тастайды. Сын-пікірлерді дұрыс қабылдай білген Чарли «Ұлы диктатор» фильмінде Гитлердің рөлім сомдайды. Германияның Польшаға соғыс ашуынан соң, Чарлиге қысым азайды. Бірақ, фашистік партияның жақтастары оған қоқан лоққы көрсетіп, хаттар жолдайтын.
Өмірінің соңғы он жылдығында киноға мүлде түспеді. Қартайған шағында Швейцарияның Веве қаласында тұрады. 1977 жылы үнсіз ғана өмірден өтеді. Бұл қалада Чарлидің ескерткіші бар.

Чарли Чаплиннің жеке өмірі

Әр жылдары актер әртүрлі әйелдермен қарым-қатынаста болған. Биші Хетти Келли, Милдред Харрис, Лита Грей, Полетт Годдар сияқты актрисалармен байланыста болған. Төрт рет ресми некеде болған. Он екі баласы болған. ОЛардың әрқайсысы киноматография саласында бақ сынап көрген. Жетістікке жеткен тек қызы Джеральдина Чаплин.

Біздің Telegram-парақшамызда Қазақстанның маңызды жаңалықтары. Жазылыңыздар!

Ұқсас сілтемелер:
Пікірлер