Кипрдің Лимассол аймағында болған орман өрті 114 тұрғын үйді толығымен жойып жіберді. Бұл туралы жергілікті Philenews басылымы жариялады, деп хабарлайды BAQ.KZ.
Жойқын өрт елді мекендерге ғана емес, маңызды инфрақұрылым нысандарына да елеулі зиян келтірді. Қазір өрттен зардап шеккен аудандарда сумен жабдықтау және электр қуатын қалпына келтіру жұмыстары жүргізілуде. Төтенше жағдайлар қызметі мен коммуналдық мекемелер апат салдарын жоюға жұмылдырылды.
Кипрдің мәдени мұрасына да ауыр соққы тиді: жеті сәулет ескерткіші, оның ішінде көне шіркеулер, ортағасырлық көпір мен тарихи су диірмені отқа оранып, зақымданды. Эратосфен шеберлік орталығының мәліметінше, өрт шамамен 125 шаршы шақырым аумақты шарпыған.
Бұған дейін, шілде айының басында Түркияның ауыл және орман шаруашылығы министрі Ибрагим Юмаклы елде барлығы 342 орман өрті тіркелгенін мәлімдеген болатын. Ол кезде Маниса, Измир, Хатай және Антакия аймақтарында ірі өрт ошақтары жалғасып жатқан. 4 шілдеде министр тоғыз өрттің алтауы бақылауға алынғанын хабарлады.
Мамандардың айтуынша, Жерорта теңізі аумағында климаттың жылынуы, жауын-шашынның азаюы және желдің күшеюі орман өрттерінің жиілеп, ауқымының ұлғаюына себеп болып отыр. Бұл экологиялық апаттар тек табиғи ортаға ғана емес, тұрғындардың өмірі мен тарихи-мәдени мұрасына да үлкен қауіп төндіруде.
