Нұр-Сұлтан, BAQ.KZ тілшісі. Елордадағы Ұлттық нейрохирургия орталығында іске қосылған гамма-пышақ құрылғысы қатерлі дерттен емдеп қана қоймай, еліміздің медициналық туризмін дамытуға үлес қосуы мүмкін. Себебі гамма-пышақ бүгінгі таңда Орталық Азия елдерінің ішінде Қазақстанда ғана бар.
Нейрохирургия орталығының мамандары жақында ғана сатып алынған гамма-пышақпен бас-аяғы бір айдың ішінде 20 шақты ота жасап үлгеріпті.
Мұндай гамма-пышақты біз ТМД елдерінің ішінде Ресей мен Беларусиядан кейін үшінші, Орта Азияда алғашқы болып іске қосып отырмыз. Біздегі аппарат Швецияда жасалған. Нейрохирургиялық патологияны емдеуде таптырмас құрылғы. Бұл пышақты орнату үшін тәжірибесі мол еуропалық және ресейлік жетекші клиникалардан оқытудан өттік, - деді орталықтың нейрохирург дәрігері Нұрзат Сығай.
Бұрын гамма-пышақ арқылы ем қабылдауға мұқтаж қазақстандықтар мемлекеттік бюджет есебінен шетелдік клиникаларға жіберілетін.
Әлемде шамамен 400-дей гамма-пышақ құрылғысы болса, оның жартысы АҚШ пен Жапония елдерінде орнатылған.
Технологияның озық үлгісі болып табылатын жабдықпен ота жасау ел азаматтарына квота бойынша тегін.
Ал басқа мемлекеттің азаматтары ақылы көмекке жүгіне алады. Отаның нақты құны есептеліп жатыр дейді мамандар.
Қазақстанда мамыр айының соңында ғана іске қосылған құрылғымен ота жасатуға қазірдің өзінде көрші елдерден, атап айтқанда, Қырғызстаннан өтініштер келіп түскен көрінеді.
Бұған дейін хабарлағанымыздай, қатерлі ісікті емдейтін Орта Азиядағы жалғыз құрылғы Қазақстанда іске қосылды.
