Нұр-Сұлтан, BAQ.KZ. Ағымдағы жылы құқық қорғау және арнайы органдармен бірлесіп, есірткі контрабандасына қатысты 14 факті анықталды. Заңсыз айналымнан 2 кг 200 гр. әртүрлі препараттар.
Бұл туралы ҚМА баспасөз қызметі хабарлайды.
Халықаралық аналитикалық агенттіктердің зерттеуі, сондай-ақ Қазақстан Республикасының құқық қорғау және арнайы органдары ел ішінде анықтаған фактілер тұтынушы елдерде синтетикалық есірткіні тұтыну мен өндірудің артқанын, сондай-ақ. халықаралық пошта және курьерлік қызметтер арналары арқылы айналымның өскенін көрсетеді.
Мәселен, 2021 жылдың қараша айында «Астана-Кедендік ресімдеу орталығы» кеден бекетінде жүргізілген жедел-іздестіру іс-шаралары барысында «Ит азығы» халықаралық пошта жөнелтілімінде ҚМА қызметкерлері жалпы салмағы 900 грамм болатын «амфетамин» психотроптық затын тауып, тәркілеген.
Сонымен қатар, үстіміздегі жылдың 30 мамырында ҚМА Түркістан облысы бойынша аумақтық департамент қызметкерлері Жібек Жолы кеден бекеті арқылы Қазақстаннан Өзбекстанға бара жатқан Өзбекстан азаматынан қызметтік иттің көмегімен салмағы 57 грамм «гашиш» есірткі затын тауып, тәркілеген. Оған қатысты сотқа дейінгі тергеп-тексеру амалдары жүргізілуде.
Естеріңізге сала кетейік, бұдан бұрын Германия, Нидерланды, Ресей, Беларусь, Польша және Литваның құқық қорғау және кеден қызметтерімен бірлесіп жүргізген халықаралық арнайы операцияның нәтижесінде ҚМА қызметкерлері салмағы 1 тоннадан асатын героиннің халықаралық есірткі айналымын жойған болатын. Бұл есірткінің заңсыз айналымына қарсы күрестің әлемдік тарихындағы екінші ірі героин партиясы.
Қаржылық мониторинг агенттігі ел азаматтарының денсаулығына зиян келтіретін қылмыстарды анықтау және жолын кесу бойынша белсенді жұмысты жалғастырады.
