Елорда әкімі 2022 жылы ЖЭО-3 құрылысын аяқтауды тапсырды
22 Қаңтар, 18:45 935

Елорда әкімі 2022 жылы ЖЭО-3 құрылысын аяқтауды тапсырды

Нұр-Сұлтан, BAQ.KZ. Нұр-Сұлтан қаласының әкімі Алтай Көлгінов құрылысы ұзаққа созылған ЖЭО-3 биыл аяқталатынын мәлім етті, деп хабарлайды елорда әкімдігінің ресми сайты.

«Елордада жыл сайын 3 млн шаршы метрден астам тұрғын үй салынатынын, ал жылыту маусымы шамамен 7 айға созылатынын ескерсек, жылу энергиясының қуатын арттыру қажет. ЖЭО-3 құрылысы – 10 жыл бұрын басталған қаланың ұзақ құрылыстарының бірі. Былтыр біз ЖЭО-3 құрылысын қайта бастадық.

Мемлекет басшысының тапсырмасы бойынша үкімет нысан құрылысын қаржыландыру үшін қаражат бөлді. Бүгін аралау барысында ЖЭО-3 құрылыс-монтаждау жұмысымен таныстым.

Мердігерге биыл ЖЭО-3 құрылысын аяқтауды тапсырдым. Келесі жылыту маусымының басында (2022 жылдың күзі) ЖЭО-3 қуаттылығы сағатына 240 гигакалорияны құрайды. Ал 2023 жылдың қаңтарында – сағатына 360 гигакалория (440 Гкал/сағ дейін). ЖЭО қуаттылығы 6,5 млн шаршы метр тұрғын үйді жылумен қамтуға мүмкіндік береді.

Сондай-ақ, үш газ қазандығын жобалау жұмысы жүріп жатыр. Олардың қуаттылығы сағатына 1600 гигакалорияны құрайды, бұл ЖЭО-3 қуатынан 3,5 еседен аса көп. Осылайша газ қазандықтары 22 млн шаршы метрден астам тұрғын үйді қосымша жылытуға мүмкіндік береді.

Бұдан басқа, қолданыстағы жылу электр орталықтарын жаңғырту бойынша жұмыстар жүргізілді: ЖЭО-1 және ЖЭО-2-де су жылыту қазандықтары газға ауыстырылды, сол сияқты қаланы газдандыру бойынша жұмыстар ары қарай да жүріп жатыр», – деп жазды елорда әкімі.


Фото: дереккөз
Загрузка...