"Халықты көшеге шақырамын": Түркия оппозициясы үндеу жасады

Түркиядағы басты оппозициялық партия президент Режеп Тайып Ердоғанның негізгі қарсыласы – Стамбул мэрі Экрем Имамоғлуның қамауға алынуына байланысты тұрғындарды бүкілхалықтық шерулерге шақырды, деп хабарлайды BAQ.KZ Bloomberg агенттігіне сілтеме жасап.

Менен “Сіз халықты көшеге шығуға шақырасыз ба?” деп сұрайды. Иә, иә, иә! – деді Халық-республикалық партиясының (CHP) төрағасы Өзгүр Өзел бейсенбі күні Стамбулдағы шерушілер алдында. 

Бұл – Имамоғлуның ұсталуына қарсы наразылықтың екінші күні еді.

Бейсенбі кешінде мыңдаған адам шеруге шықты, сәрсенбі күні енгізілген тыйымдарға қарамастан. Билік наразылықтың ушығуын болдырмауға тырысуда. Әлеуметтік желілерде Имамоғлуның тұтқындалуын сынаған жазбалар үшін ондаған адам қамауға алынды.

Саяси шиеленіс түрік экономикасына да әсер етуде. Лира соңғы екі жылдағы ең үлкен апталық құлдырауға ұшырап, жұма күні (21 наурыз) 0,5%-ға әлсіреп, бір доллар 38 лираға сатылды.

Borsa Istanbul 100 индексі 7%-ға құлдырады, бұл сауда-саттықты автоматты түрде тоқтатуға алып келді. Осы аптаның өзінде Түркия қор нарығы 30 миллиард доллар жоғалтты. Қазіргі таңда түрік лирасы мен акциялары әлемдегі ең нашар көрсеткішке ие қаржы құралдарының қатарына енді.

Стамбул әкімшілігі жұма күні кез келген жиналыстар мен баспасөз мәслихаттарына 23 наурызға дейін тыйым салынғанын тағы бір мәрте ескертті. Мұндай шектеулер Анкара мен Измирде де енгізілді. Алайда жұма кешінде билік үшін үлкен сынақ тұр: CHP ел бойынша митингілер өткізуді жоспарлап отыр.

Президент Ердоған бұл жағдайға қатысты «бұл – оппозицияның ішкі мәселесі, оны елдік дағдарыс ретінде қарастыруға болмайды» деп мәлімдеп, жағдайдан алыстау ұстанымын көрсетіп отыр.

Имамоғлу – Ердоғанның ең ықтимал қарсыласы. Ол Стамбул мэрі сайлауында екі рет қатарынан Ердоғанның қолдауына ие болған үміткерлерді жеңген. Ердоғанның өзі де 1990-жылдары саяси мансабын Стамбул мэрі ретінде бастаған, сондықтан бұл қаланы билеудегі сәтсіздіктерді жеке жеңілісі ретінде қабылдайды.

Жексенбі күні CHP праймериз өткізіп, Имамоғлуды ресми түрде президенттікке үміткер ретінде бекітпек. Қолданыстағы заңға сәйкес, полиция оны төрт күнге дейін қамауда ұстай алады. Осы уақыт өткен соң, сот оның тағдырына қатысты шешім шығаруы тиіс.