Нұр-Сұлтан, BAQ.KZ. Халықаралық дзюдо федерациясы (IJF) 2021 жылға арналған жарыс күнтізбесін бекітті.
Бұл туралы ұйымның баспасөз қызметіне сілтеме жасаған Olympic.kz хабарлайды.
11-13 қаңтарда Катар астанасы Дохада Masters турнирі өтеді. 18-20 ақпан күндері Тель-Авив «Үлкен Дулыға» бәсекесін қабылдайды. Аталған сында әрбір салмақтағы жеңімпаздар 1000 ұпай алатынын айта кету керек.
Наурыз және сәуір айлары да жарысқа толы болмақ. 5-7 наурыз күндері Ташкентте «Үлкен Дулыға» турнирі өтсе, 26-28 наурызда Тбилиси татамиінде кезекті жеңімпаздар анықталады. «Үлкен Дулыға» бәсекесінің тағы бір кезеңін 1-3 сәуір аралығында Түркия қабылдайды.
8-9 мамырда әлемнің үздік дзюдошылары Париж төріне жиналады. 6-13 маусым күндері Будапештте дзюдодан әлем чемпионаты өтеді. Әлемдік додада 14 салмақ және 1 аралас командалық сын жеңімпаздары белгілі болмақ. Ал жылдың басты оқиғасы шілденің аяғында өтетін Токиодағы Олимпиада ойындары.
