Биыл Наурыз мерекесін «Хабар» телеарнасы ерекше атап өтеді. Көрермендерге танымдық, ойын-сауықтық «Таңғажайып Наурыз» мега-жобасын ұсынады, деп хабарлайды BAQ.KZ.
Жоба 21-наурыз күні сағат 22:00-де басталып, 21-наурыз күні таңғы сағат 00:00-ге дейін жалғасады. Сосын таңғы 7:00-де қайтадан тікелей эфирге қосылады. Ал Түркістанда өтіп жатқан "Таңғажайып наурыз" түнімен болады. Жұрт жаңа жылды әдетте желтоқсан айының 31-і күні түнгі сағат 12:00-де күтетін болса, «Хабар» телеарнасы «Таңғажайып Наурыз» жобасының аясында күнмен таласып келген жаңа жылды биыл таңғы 06:00-де қарсы алады. Осы күндері арнайы театрландырылған қойылым мен концерттерді тамашалай аласыздар. Таңды қарсы алып, жаңа күннің келуімен халықты құттықтау Түркі жұртының рухани бесігі – Түркістандағы табиғат аясында арнайы жасақталған ауылда өтеді. Мерекелік шоу үшін безендірілген бас сахна ең озық заманауи технологиямен жабдықталған. Астанадағы басты эфирді үш жүргізуші – Тұрсынбек Қабатов, Мөлдір Доспаева және Алмас Тоғай тізгіндейді. Ал Түркістандағы іс-шараны Қанат Әлжаппаров пен Қайрат Әділгерей жүргізеді.
Телекөпір «Жыл басына таласқан жануарлар» ертегісіндей қойылыммен басталады. Түйеге мінген Қанат Әлжаппаров жаңа жылды бірінші көрмекке ұмтылады. Осы сәттегі екі жүргізушінің амандасуы жарасымды әзілмен астасып, ерекше көрініске ұласады. Өнерпаздар әннен шашу шашып, мерекені күймен көмкереді. Ақшаңқан киіз үйлер тігілген аймақта қолөнер шеберлері түрлі ұлттық бұйымдарды жасаудың үлгісін көрсетеді. Мерекелік эфирге жыл үздіктері қонақ болып келеді. Жүргізушілер елдегі маңызды қоғамдық оқиғаларда жарқырай көрінген азаматтармен сұхбаттасып, әсерге толы әңгіме өрбітеді.
Наурыз – Түркі елдерінің ортақ мейрамы. Әр ұлттың өзіне тән салт-дәстүрі бар. Сол себепті еліміздегі өзге этностардың Наурыз мейрамын тойлау ерекшеліктерімен танысуға да мүмкіндік болады.
Құрметті көрермен, Наурыз мерекесін «Хабар» телеарнасымен бірге қарсы алыңыздар!
