Нұр-Сұлтан, BAQ.KZ. Берлинде ресми сапармен жүрген Қазақстан президенті Қасым-Жомарт Тоқаев Германияның Федералдық президенті Франк-Вальтер Штайнмайермен кездесті.
Бұл туралы Ақорданың баспасөз қызметі хабарлады.
Сәлемдесу және суретке түсу рәсімінен кейін мемлекеттер басшылары "Бельвю" мемлекеттік резиденциясына барды. Онда Қасым-Жомарт Тоқаев Құрметті қонақтар кітабына қолтаңбасын қалдырды, - делінген Ақорданың баспасөз қызметі таратқан ақпаратта.
Содан кейін екі елдің президенттері келіссөз жүргізіп, өзара қызығушылық тудыратын ауқымды мәселелерді қарастырды.
Қазақстан президенті екі мемлекетті достық қарым-қатынастар байланыстыратынын атап өтіп, Еуропа одағына мүше мемлекеттер ішінде өзінің алғашқы ресми сапарын Германиядан бастағанын айтты.
Франк-Вальтер Штайнмайер аталған сапары үшін Қасым-Жомарт Тоқаевқа ризашылығын білдіріп, Қазақстан мен Германияның ынтымақтастығын одан әрі дамыту үшін жүргізілген келіссөздердің маңыздылығын атап өтті.
Бұған дейін, Қасым-Жомарт Тоқаевтың Германияға ресми сапармен барғаны хабарланды. Сонымен қатар, президент Ангела Меркельмен кездесіп, Қазақстан президенті мен Германия канцлері кеңейтілген құрамда келіссөздер өткізді. Мемлекет басшысы Германия инвесторларына тиімді жеңілдік ұсынды.
