Республика күніне орай, Геральдикалық зерттеулер орталығының кеңесші ғалымдары мен бірқатар қызметкерлері Мәденит және спорт министрлігінің марапатына ие болды, деп хабарлайды BAQ.KZ тілшісі.
Белгілі ғалым, түрколог, тарихшы, Еуразия Ұлттық университетінің профессоры Қаржаубай Сартқожаұлы Мәдениет және спорт министрлігінің «Мәдениет саласының үздігі» төсбелгісімен марапатталды.
Ғалымға төсбелгіні ҚР Мәдениет және спорт министрлігі Архив істері және құжаттаманы басқару комитетінің төрағасы Қуат Бораш табыстады.
Сіздің тұтас түркі ғылымына қосқан үлесіңіз жалпы халыққа белгілі. Өткен тарихымызды зерделеу жұмысында айырықша еңбек еттіңіз. Ғылым – азаматтардың ғана емес, мемлекеттің қымбатты қазынасының бірі. Бұл салада адал еңбек ету – патриоттықтың биік шыңы, - деді министрдің құттықтауы мен арнайы сәлемін жеткізген Қуат Қаһарманұлы.
Сәулетші, Елтаңба авторы, Еуразия Ұлттық университетінің профессоры Жандарбек Мәлібековке ҚР Мәдениет және спорт министрлігінің Құрмет грамотасы табысталды.
Комитет төрағасы Геральдикалық зерттеулер орталығы жұмысының жақсы деңгейге көтерілуіне кеңес беріп, ақыл қосқан қос ғалымға айырықша алғыс айтты.
Қазақ геральдикасының өзіндік ерекшеліктері жетерлік. Ұлттық идеялогиямыздың біраз бөлігі осы таңбалар мен белгілерде жатыр. Тарихтың қойнауынан жеткен таңбалы тастардың тарихи мәнін ашу үшін геральдика ғылымын дамыту айырықша маңызды, - деді қазақ геральдикасының идеялогиялық мәніне тоқталған ғалым Қаржаубай Сартқожа.
Сонымен бірге, ғалым Иманғазы Нұрахмет, сараптамалық кеңес мүшесі Ағабекова Жазира, Геральдикалық зерттеулер орталығы Мемлекеттік рәміздерді насихаттау бөлімінің басшысы Жұмаділ Жарқынбекке Мәдениет және спорт министрінің алғыс хаты берілді.
Сондай-ақ, орталық директорының орынбасары Айнұр Жарахметова, бас есепші Айгүл Иржанова, бөлім басшылары Жібек Болтанова, Тұрсынай Баймағанбетова қатарлы қызметкерлер Геральдикалық зерттеулер орталығының диреторының атынан арнайы алғыс хат алды.
