ФИФА халықаралық матчтар күнтізбесіне өзгерістер енгізуді жоспарлап отыр. Бұл туралы El Desmarque порталы жазды, деп хабарлайды BAQ.KZ.
Қазіргі жүйеде ұлттық құрамалар үш рет жиналады: қыркүйек, қазан және қараша айларында. 2026 жылдан бастап қыркүйек пен қазандағы үзілістерді біріктіріп, ұзақтығы 16 күндік бір ғана үзіліс жасау көзделуде.
Жаңа форматқа сәйкес, алғашқы халықаралық үзіліс 21 қыркүйектен 6 қазанға дейін өтеді. Осы аралықта құрамалар төрт матчтан өткізе алады.
Ал қарашадағы үзіліс 9-17 қараша аралығына белгіленіп, әр командаға екі ойыннан жоспарланған.
ФИФА мұндай қадамды ойыншылардың жүктемесін оңтайландыру және ұлттық құрамаларға дайындыққа көбірек уақыт бөлу мақсатында ұсынып отыр.
