Мемлекеттік қызметшілердің коммуникативтік дағдыларын жетілдіруге арналған арнайы медиастудия ашылды, деп хабарлайды BAQ.KZ.
Президент Әкімшілігінің мемлекеттік қызметшілердің коммуникативтік дағдыларын жетілдіру бойынша берген тапсырмасын орындау аясында Мемлекеттік қызмет істері агенттігінің қолдауымен Президент жанындағы Мемлекет басқару академиясының базасында құрылған медиастудияның ашылу шарасы өтті.
![Енді мемқызметшілер арнайы медиастудияда сұхбаттасуды үйренеді](/userfiles/images/9d9e7739730182fb89ea7106808b1002_1280x720.jpg)
Іс-шараға Қазақстан Республикасы Президентінің ішкі саясат мәселелер және коммуникациялар жөніндегі көмекшісі Руслан Желдібай мен МҚІА төрағасы Дархан Жазықбай қатысты.
Ашылу барысында Руслан Желдібай мемлекет пен қоғам арасындағы сенімді нығайтуда мемлекеттік қызметшілердің жұртшылықпен тиімді коммуникация орната алу дағдыларын үнемі дамытып отырудың маңыздылығын атап өтті.
![Енді мемқызметшілер арнайы медиастудияда сұхбаттасуды үйренеді](/userfiles/images/2556c54cf0d8b4924b084e161c895cfc_1280x720.jpg)
Заманауи медиастудия мемлекеттік қызметшілерді оқыту әдістерін жетілдіруге әсіресе, жаңа технологияларды қолдану арқылы олардың пікірталас, сұхбат форматында сөз сөйлеу бойынша тәжірибесін шыңдауға, оларды іс жүзінде тиімді қолдана білу қабілетін арттыруға ықпал етеді деп күтілуде. Жаңа форматтағы оқыту процесін іске асыру үшін студияда Jalinga автоматтандырылған видео және графикалық бейнелерді жазу құрылғысы орнатылған, сондай-ақ YouTube, Zoom арқылы онлайн-конференцияларға қосылу, кәсіби подкаст жазу алаңы қарастырылған, - делінген агенттік хабарламасында.
![Енді мемқызметшілер арнайы медиастудияда сұхбаттасуды үйренеді](/userfiles/images/f635f5a408e5d565aeea28ddd7e1fd46_1280x720.jpg)
Шара аясында мемлекеттік қызметшілердің біліктілігін арттыру және оларды қайта даярлауға арналған цифрлық коворкинг залының жұмысы да таныстырылды.