Coca-Cola компаниясы биылғы күзде АҚШ-та қамыс қантымен тәттілендірілген жаңа нұсқадағы коланы сатылымға шығармақ. Бұл туралы компания ресми түрде мәлімдеді, деп хабарлайды BAQ.KZ тілшісі Associated Press-ке сілтеме жасап.
Бұған дейін АҚШ-та өндірілетін газдалған сусындардың көпшілігі жоғары фруктозалы жүгері шәрбатымен немесе жасанды тәттілендіргіштермен дайындалып келген.
Бұған дейін АҚШ президенті Дональд Трамп өткен аптада бұл өзгеріс туралы тұспалдап айтып қалған болатын. Ол әлеуметтік желідегі мәлімдемесінде "нағыз Кока-Кола" қайтарылуы керек деп пікір білдірген. Көпшілік мұны компанияның жаңа шешімімен байланыстырды.
Неліктен қамыс қантына оралуда?
Соңғы жылдары америкалық тұтынушылар табиғи құрамдас бөліктері бар өнімдерге көбірек назар аудара бастады. Coca-Cola-ның бұл шешімі – осы сұранысқа жауап. PepsiCo мен Dr Pepper компаниялары да 2009 жылдан бері қамыс қантымен тәттілендірілген өнімдерді ұсынып келеді. Ал Coca-Cola 2005 жылдан бері Мексикадан әкелінетін шыны бөтелкедегі "табиғи" коланы шектеулі көлемде сататын.
Қант пен жүгері шәрбатының айырмашылығы қандай?
Мамандардың айтуынша, қамыс қанты (сахароза) мен жүгері шәрбаты (глюкоза мен фруктозаның сұйық қоспасы) арасындағы калориялық айырмашылық жоқ. Екеуі де – қанттың түрі, және денсаулыққа теріс әсері ұқсас: семіздік, қант диабеті, тіс аурулары қаупі жоғары. Яғни қайсысы қолданылса да, шектен тыс тұтыну зиянды.
Неліктен өндірушілер жүгері шәрбатына көшті?
Жүгері шәрбаты – арзан және өндірісте ыңғайлы. Ол қышқыл ортада тұрақты болады, оңай тасымалданып, сақталады. Сонымен қатар, АҚШ-та қант импортына кедендік шектеулер бар әрі ішкі өндіріс қатаң реттеледі, бұл қант бағасын көтеріп отыр. Ал жүгеріге қатысты миллиардтаған доллар көлеміндегі мемлекеттік субсидиялар фермерлердің шығынын төмендетіп, оны қолжетімді етеді.
Диеталық сусындардағы тәттілендіргіштер қауіпсіз бе?
Coca-Cola Zero Sugar сусынына аспартам және стевия қосылады. 2023 жылы Дүниежүзілік денсаулық сақтау ұйымының сарапшылары аспартамды «адам үшін мүмкін қатерлі канцероген» деп таныды. Бұл нақты түрде обыр туғызады дегенді білдірмейді, бірақ бауыр обырымен байланысы бар деген болжамға негізделген. АҚШ-тың Азық-түлік және дәрі-дәрмек сапасын бақылау басқармасы (FDA) бұл пікірмен келіспей, аспартамды қауіпсіз тәттілендіргіш деп есептейді.
Ал өсімдік негізіндегі стевия құқық қорғаушылар мен сарапшылар тарапынан қауіпсіз балама ретінде бағаланып отыр.
Coca-Cola-ның қамыс қантына қайта оралуы – табиғи өнімдерге сұраныс артқанын көрсетеді. Дегенмен, тәттілендіргіш түріне қарамастан, газдалған сусындарды шектен тыс тұтыну денсаулыққа зиян екені естен шықпауы тиіс.
