Биыл 1 қыркүйектен бастап Нұр-Сұлтанда 216 мыңнан астам оқушы контингенті бар 148 мектеп 5 күндік оқу аптасына ауысады, деп хабарлайды BAQ.KZ.
Бұл қаладағы барлық мектептің 98%-ы. Үш ауысымды 4 мектеп 6 күндік оқу форматында қалады.
Сондай-ақ елордадағы 21 мыңнан астам мұғалім үшін сенбі демалыс күні болады. Бұл туралы ҚР Оқу-ағарту министрінің қатысуымен өткен жиында Нұр-Сұлтан қаласы білім басқармасының басшысы Қасымхан Сенғазыев айтты.
Бұл оқу жылын 31 мамырда аяқтау және оқу жүктемесін азайту туралы шешімнің аясында мүмкін болып отыр.
Президент педагог мәртебесін көтеруге ерекше көңіл бөліп отыр. Қасым-Жомарт Кемелұлы Тоқаевтың жеке қолдауының арқасында «Педагог мәртебесі туралы» заң қабылданып, мұғалімдердің жалақысы көтеріліп, жүктемесі қысқартылды. Заңға тәуелді актілер қабылданып, әкімдіктер бұрынғыдай мұғалімдерді міндетінен тыс артық жұмыстарға тартпайды. Президент тапсырмалары бойынша атқарылатын жұмыстар аясында алдағы уақытта сенбі мектеп мұғалімдері үшін ресми демалыс күніне айналады, бұл әріптестерімізге сабаққа дайындалып, уақытты отбасымен бірге өткізуге мүмкіндік береді. Мұның балаларға берер артықшылықтары бар, енді олардың да көбірек бос уақыты болады. Біз бұл мәселені ерекше бақылауға алдық, - деген болатын ҚР Оқу-ағарту министрі Асхат Аймағамбетов педагогтердің дәстүрлі Тамыз кеңесінде.
