Нұр-Сұлтан, BAQ.KZ. Елордада жас қызды зорламақ болып қолға түскен күдікті ер адам 9 қазанда психдиспансерден қашып кеткен болатын. Бұл туралы қалалық ПД баспасөз қызметі хабарлады.
"22:40-та Нұр-Сұлтан қаласының Полиция департаменті қызметкерлері кешенді жедел іздестіру іс-шаралары кезінде тергеу үшін қамаққа алынған ер адамды ұстады. Ол 9 қазан күні 12:22-де Жансүгіров көшесінде орналасқан ШЖҚ "Психикалық денсаулықтың медициналық орталығы" МКК аумағынан қашып кеткен. Ол тергеу изоляторына қамауға алынды. Тексеру жүргізіліп жатыр", - делінген хабарламада.Сондай-ақ, Нұр-Сұлтан қаласының Полиция департаменті тұрғындардан іздеу жұмыстары кезінде қаладан шығар жолдарда туындаған уақытша ыңғайсыздық үшін кешірім сұрайтынын мәлім етті.
Еске сала кетейік, бұған дейін ҚР Қылмыстық кодексінің 120-бабы (зорлау) бойынша айыпталған ер адам психо-неврологиялық диспансерден бой тасалағаны туралы хабарлаған болатынбыз.
5 қыркүйек күні елордадағы №83 мектеп-лицейі маңында ер адам 17 жастағы қызды зорлауға әрекеттенген. Абырой болғанда мектеп қызметкері көмекке келіп, қыз қашып үлгерген. Тәртіп сақшылары 42 жастағы адамды ұстап, полиция бөлімшесіне жеткізген болатын.
