Елордада Наурыз мерекесіне орай 100-ден аса іс-шара өтеді. Мерекелік шаралар өтуі үшін қаланың 4 ауданынан арнайы 23 орын анықталған, деп хабарлайды BAQ.KZ.
Елордалық тұрғындар мен қала қонақтары Наурыз мейрамы қарсаңында түрлі концерттік шаралар мен спорттық жарыстарды тамашалай алады.
21-22-23 наурыз күндері барлық ауданда, соның ішінде елорданың елді мекендерінде «Наурыз Думан 2023» мәдени-бұқаралық іс-шаралары ұйымдастырылады. Іс-шарада елорданың мәдени ұйымдарының әртістері мен шығармашылық ұжымдардың қатысуымен концерттік бағдарламалар болады. Ал, 23 наурыз күні «ЭКСПО» көрме кешенінің аумағында көшпелілер өркениетінің ауқымды фестивалі ұйымдастырылады.
Фестиваль аясында көкпар, бәйге, теңге алу, қыз қуу, қазақ күресі, арқан тартыс, кір көтеру, құмай тазы жарысы және т.б ұлттық спорт түрлерінен жарыстар өтеді. Одан бөлек ұлттық мәдениет пен дәстүр атмосферасын сезіну мақсатында ауқымды этноауылдың ашылуы, қолөнершілер жәрмеңкелері, ұлттық тағамдар фестивальдері және т.б. өткізу жоспарлануда.
«ЕХРО» халықаралық көрме орталығында мерекелік іс-шараның аясында отандық қолөнершілердің қатысуымен «Наурыз базары» жәрмеңкесі өтеді.
Қала тұрғындары қалалық мәдени іс-шараларды да тамашалай алады. 16 - 28 наурыз күндері сағат 10:00-18:00 аралығында С.Сейфуллин музейінде «Қош келдің – әз-Наурыз» көрмесі ұйымдастырылады.
17 наурыз күні сағат 19.30-да Жастар сарайында «Наурыз -думан» атты концерттік бағдарламасы өтеді.
17 наурыз сағат 19.00-де «Астана Опера» театрының Күләш Байсейітова атындағы Камералық залында Еркеғали Рахмадиев атындағы Мемлекеттік академиялық филармониясы филармонияның камералық хоры және Гамбург қыздар хорымен (Германия) бірлесіп құрылған «Үндестер палитрасы» концертін ұсынады.
20 наурызда Мемлекеттік академиялық филармонияда мәдениет саласындағы «Наурыз ұлттық сыйлығы» тапсырылады.
21 наурызда «Қазақстан» орталық концерт залында Шәмші Қалдаяқовтың шығармашылығына арналған «Әнім сен едің» мерекелік концерті жоспарланған.
23 наурыз сағат 17.00-де Жастар сарайында Наурызға арналған мерекелік бағдарлама «Магия степи» атты иллюзия және музыка шоуы өтеді.
23 наурыз сағат 19.00-де Еркеғали Рахмадиев атындағы Мемлекеттік академиялық филармониясының залында Ақан сері атындағы Солтүстік Қазақстан облыстық филармониясының «Ұлыстың ұлы күні» атты гала-концерті өтеді.
24 наурызда «Қазақстан» орталық концерт залында Қазақстан Республикасының Халық әртісі Алтынбек Қоразбаевтың 75 жылдық мерейтойына арналған шығармашылық кеш өтеді.
Астана қаласының театрлары да бұл мерекеде қалыс қалмай, жаңа премьералар ұсынып жатыр. Мәселен, М. Горький атындағы Мемлекеттік академиялық орыс драма театры 21 наурыз сағат 18.00-де Т. Леттс «Август. Графство Осейдж» пьесасы бойынша «Конец лето» қойылымының премьерасын ұсынады. Сонымен қатары, «Қуыршақ» театры 18-26 наурыз аралығында жас көрермендеріміз үшін «Наурыз-Думан» атты адам бойлы қуыршақтар шоуының қойылымын ұсынады.
