Алматыда Жантемір Баймұхамедовтің "Егеуқұйрық" атты қысқаметражды көркем фильмінің жабық көрсетілімі өтті, деп хабарлайды BAQ.KZ.
Картина көптеген елде кино сарапшылардың ең жоғары бағасына ие болды. Атап айтсақ, фильм әлемдегі ең көне фестивальдердің бірі болып саналатын Мальтадағы 60-шы Халықаралық Golden Knight қысқаметражды фильмдер фестивалінде Гран-при алды. Ол жерде картина 60-тан астам елдің 320 қатысушысымен жүлде үшін таласты.
Отандық туынды тағы бір танымал кинофорум – Бразилиядағы Sao Paulo International Film Festival-де үздік фильм үшін берілетін бас жүлдені жеңді. Ал Ресейде Халықаралық қысқаметражды "Киномышь" кинофестивалінде Гран-примен марапатталды.
Фильмнің идеясын көптен бері ойлап келдім. Мен бұл оқиғаны 4-сыныпта оқып жүрген кезімде естідім. Анам маған "Ленин ауысымы" газетінен оқып берген. Жалпы, бұл қызықты оқиға бір адамның егеуқұйрықпен достығы туралы. Олардың қарым - қатынасы туралы, - дейді картина режиссері Жантемір Баймұхамедов.
Сонымен қатар туындыны Макаодағы Халықаралық қысқаметражды фильмдер фестивалінің қазылар алқасы да үздік көркем фильм деп атады. Шотландияның Глазго кинофестивалінде "Егеуқұйрық" жеңімпаздар үштігіне енсе, Еуропалық Future of Film Awards платформасы картинаны құрметпен атап өтті.
"Егеуқұйрық" фильмі ерекше достықтың таңғажайып оқиғасын баяндайды. Басты рөлді бостандықтағы өмірден өз орнын табуға тырысқан бұрынғы тұтқын-музыкант Сәкен Молдахметов тамаша орындап шықты.
Жантик мені фильмге, басты рөлге шақырған кезде, мен қатты таң қалдым. Мен кәсіби актер емеспін. Ешқашан кинода ойнаған емеспін, маған қызықты болды. Жантикке ризамын. Актер болуға ұмтылмаған адам кенеттен Глазгода ең жақсы рөл үшін сыйлық алады. Бұл өте күшті сезім, - дейді басты рөлді орындаушы Сәкен Молдахметов.
Режиссер Жантемір Баймұхамедов, Жантик деген атпен танымал Қазақстандағы ең атақты шоумендердің бірі. Дарынды музыкант және тележүргізуші, бұл картина оның кино саласына алғашқы рет келуі емес. Оның "Шу-чу" атты дебюттік фильмі 2010 жылы Мексика кинофестивалінде жүлдеге ие болған.
"Егеуқұйрық" қысқа метражды фильмін ілгерілетумен продюсер Диана Әшімова және А team компаниясы айналысады.
