Нұр-Сұлтан, BAQ.KZ. Ауыл шаруашылығы министрлігінің мәліметі бойынша, 2020 жылдың 1 қаңтарынан бастап бизнес үшін салада ғылыми-зерттеу және тәжірибелік-конструкторлық жұмыстар жүргізуді субсидиялау қарастырылған.
Бұл шаралар салаға инновациялар енгізуді жеделдетпек. Ал салаға маман даярлау саясатымен бұрынғыдай Білім және ғылым министрлігі емес, Ауыл шаруашылығы министрлігі айналысады.
2020 жылдың 6 қаңтарынан бастап Білім және ғылым министрлігінің ауыл шаруашылығы мамандарын даярлауға арналған мемлекеттік тапсырыстардың көлемін анықтау, оларды бөлу мен орналастыру құзіреттерін Ауыл шаруашылығы министрлігіне беру жөніндегі норма өз күшіне енді. Бұл өзгерістер саладағы мамандарды дайындауда мемлекеттік тапсырысты нақты қалыптастыруға, қаржыландыру көлемін дұрыс анықтауға, сапалы кадрларды даярлайтын жоғары оқу орындарын әділетті түрде іріктеуге және гранттарды дұрыс бөлуге мүмкіндік береді, – делінген АШМ мәліметінде.
Сондай-ақ, "Өсімдік шаруашылығындағы міндетті сақтандыру туралы" Заң 6 қаңтардан бастап күшін жойды. Яғни өсімдік және мал шаруашылығында міндетті сақтандырудан ерікті сақтандыруға көшу басталды. Осылайша министрлік сақтандыруды субсидиялаудың орнына сақтандыру полистерін субсидиялау жүйесін енгізді.
Оның үстіне фермерлерге екінші деңгейлі банктерден несиел алу барысында сақтандыру полистерін кепілдік ретінде пайдалануға мүмкіндік беретін нормалар енгізілді. Ерікті сақтандырудың жаңа жүйесі электрондық платформада жұмыс істейтін болады.
