Мәжілісте өтіп жатқан комитеттің отырысында депутат Ринат Зайытов телеарналарда көрсетілетін «Астарлы ақиқат» сияқты бағдарламаларды жабу керегін айтты, деп хабарлайды BAQ.KZ тілшісі.
Зорлық-зомбылықты талқылап жатырмыз. Бірақ зорлық-зомбылыққа әкелетін тағы бір мәселе бар. Ол - балалардың ерікті бұзылуы. Ерікті бұзылып жатқан балалар бар. 15 жасынан бастап мефедронға отырады, 14 жасынан бастап жыныстық қатынасқа түседі. Осыдан кейін неше түрлі зорлық-зомбылықты көрсете бастайды, - деді Зайытов.
Депутаттың айтуынша, ерікті бұзылған балаларды да оқшаулау, жауапкершілікке тарту мәселесі ұмытылып бара жатыр.
Ол егер бір отбасында бала шикілік шығарса, онда оның ата-анасы, яғни бүкіл әулет жауап беруі керегін айтты. Мысалы, қосымша мемлекеттік төлемдерден қағу немесе ата-анасына жұмыста сөгіс беру.
Зайытов бала 18 жасқа толғанша, ата-ана мен мемлекет толығымен баланың әрекетіне жауап беруі керегін көтерді.
Отбасылық жанжалдарды телеарналарда талқылауды тоқтату керек. Бұл Ақпарат министрлігіне тікелей қатысты. «Астарлы ақиқат» дегендерді жабу керек. Келіп алып, «мен қайын атаммен жаттым», «мені өгей әкем зорлады» дегенді бәрі жиналып, талқылағаннан кейін екінші адамда «сондай екен ғой» деген еріксіз ой туады. Осыны тоқтату керек, - дейді депутат Мәжілісте.
