Денсаулық сақтау министрлігі қанайналым жүйесі ауруларын азайту шараларын талқылады, деп хабарлайды BAQ.KZ.
Денсаулық сақтау министрлігінде облыстардың, республикалық маңызы бар қалалардың денсаулық сақтау басқармалары мен ведомстволық бағынысты ұйымдар басшыларының қатысуымен 2024 жылдың 9 айында жүргізілген жұмыстың қорытындысы бойынша қанайналым жүйесінің аурулары (ҚЖА) және инсульт кезінде медициналық көмекті ұйымдастыру жөніндегі Үйлестіру кеңестерінің отырысы өтті.
ҚЖА өлімінің негізгі себептері жіті коронарлық синдром, созылмалы жүрек жеткіліксіздігі және атеросклероз болып қала береді, бұл аурудың дамуының басқарылатын факторы.
ҚР ДСМ бас штаттан тыс кардиологы, «UMC» ҚҚ «Жүрек орталығы» басқармасының төрағасы Махаббат Бекбосынова өз сөзінде атап өткендей, Қазақстан бойынша жіті миокард инфарктісімен сырқаттанушылық 2024 жылдың 9 айында 3,4%-ға төмендеді, бірақ бірқатар өңірлерде теріс динамика бар және жіті жүрек бұзылыстары кезінде шұғыл емдеуге жатқызудың өсуі үлкен алаңдаушылық туғызады, бұл хирургиялық араласулар кезінде қолайсыз нәтижелердің үлесіне әсер етеді.
Салидат Қайырбекова атындағы Ұлттық ғылыми денсаулық сақтауды дамыту орталығының (ҰҒДСДО) мәліметтері бойынша, есепті кезеңде Қазақстанда жүрек тамырларын стенттеу бойынша 20 935 операция жасалды, бұл өткен жылдың сәйкес кезеңімен салыстырғанда былтырғы көрсеткіштен 8,8%-ға артық, 42 176 коронарография орындалды.
Ұлттық шұғыл медицина орталығының басқарма төрағасы Тимур Мұратов өз баяндамасында инсульт алған науқастарға медициналық көмек 83 бейінді орталықта жүзеге асырылатынын және 2024 жылдың 9 айының қорытындысы бойынша оларда инсультпен ауыратын 36,1 мың пациент емделгенін, өткен жылмен салыстырғанда 4,6%-ға өскенін атап өтті.
Сондай-ақ, ол инсульт орталықтарын жабдықтау және жарақтандыру қажеттілігі, кадрлық мәселелер және инсульт қызметі мамандарының біліктілігін арттыру туралы айтты.
Инфекциялық емес аурулармен күресте қанайналым жүйесінің бұзылуын ерте анықтау, МСАК деңгейінде скринингтік тексерулердің тиімділігін жақсарту, динамикалық бақылаумен науқастарды толық және уақтылы қамтуды қамтамасыз ету жөніндегі шараларды күшейтуге ерекше назар аударылды.
Үйлестіру кеңесі отырысының жұмысын қорытындылай келе, кардиолог дәрігерлерді оқытуды ұйымдастырудың, ахуалдық орталықтардың жұмысын жақсартудың, медициналық техникамен жарақтандыруды қамтамасыз етудің маңыздылығы атап өтілді.
Сондай-ақ, халықты, әсіресе қауіп топтарын темекі шегу, алкоголь, семіздік сияқты жүрек-қан тамырлары ауруларының және соған байланысты мінез-құлық қауіптерінің профилактикасы туралы белсенді түрде хабардар ету қажет.
