Нұр-Сұлтан, BAQ.KZ. Түркістан облысында Nur Otan партиясы праймеризі дауыс беру кезеңінің үшінші күні өтіп жатыр.
Бұл туралы Nur Otan партиясы Түркістан облыстық филиалының баспасөз қызметі хабарлады.
Бүгін таңғы 8.00-ден бастап өңірдің 16 аудан, қаласында 209 арнайы дауыс беру орны жұмысын бастады.
Бұл орындардың 170-інде онлайн режимде, ал 39 орында қағаз бюллетень арқылы дауыс беріледі. Онлайн дауыс берілген 2 күннің ішінде Түркістан облысы бойынша жалпы 78262 партия мүшесінің 58211-і (3 қазан, 9.50-дегі мәлімет) өз таңдауларын жасап үлгерді.
Қазіргі таңда арнайы әзірленген 209 орында дауыс беру жалғасуда.
Түркістан жұртшылығы таңғы 8.00-ден бастап учаскелерге келіп, белсенділігін танытып жатыр. Олардың арасында сан түрлі саланың өкілдері бар. Дауыс беруге қатысатын 78262 партия мүшесінің 68183-і (87,1%) онлайн, 10079-ы (12,3%) қағаз бюллетенмен дауыс береді. Онлайн дауыс беру орындары 600-ге жуық компьютермен қамтамасыз етілді.
Жалпы өңірде праймеризге деген қызығушылық өте жоғары. Дауыс беру орындарында карантин талаптары сақталған. Ұйымдастыру және санақ комитеттері жұмыс жүргізіп жатыр.
