Берлинде паллиативті көмек көрсететін дәрігерге кемінде 15 пациентті өлтірді деген ауыр айып тағылып отыр. Бұл Германия денсаулық сақтау жүйесінде соңғы жылдардағы ең ірі қылмыстық істердің бірі болуы мүмкін, деп хабарлайды BAQ.KZ DW-ге сілтеме жасап.
40 жастағы дәрігер 2021 жылдың қыркүйегі мен 2024 жылдың шілдесі аралығында 12 әйел мен 3 ер адамға өлімге әкелетін дәрі-дәрмектер қоспасын науқастардың келісімінсіз енгізген деп күдіктелуде. Құрбандардың ең жасы – 25 жастағы әйел, ең үлкені – 94 жастағы зейнеткер болған. Дәрігер Берлинде паллиативті көмек көрсету қызметінде жұмыс істеген.
Прокуратура дәрігерге кісі өлтіргені үшін айып тағып, оның әрекеттеріне ерекше ауырлық дәрежесі берілсін және медицина саласында өмір бойына жұмыс істеуге тыйым салу туралы шешім шығарылсын деп отыр. Сондай-ақ, арнайы бақылау мекемесіне жіберу де қарастырылуда.
Алғашында күдік тек төрт адамға қатысты болғанымен, тергеу барысында бұл сан 15-ке дейін артты. Қазіргі таңда тағы 75 эпизод зерттеліп жатыр, бес мәйітті эксгумациялау жоспарланған. Бүгінге дейін 12 мәйіт қазылып, сот-медициналық сараптамалар жүргізілді.
Тергеу аясында жүздеген медициналық құжаттар зерттеліп, күтім қызметкерлерінен түскен сигналдар маңызды рөл атқарған. Прокуратура бастапқыда дәрігердің әрекетін "кісі өлтіруге құмарлықпен" байланыстырғанымен, кейін бұл нұсқадан бас тартқан. Дәрігер кездейсоқ адамдарды емес, тек өз пациенттерін өлтірген.
Егер бұл айыптар дәлелденсе, бұл іс Нильс Хегель ісінен кейінгі Германия тарихындағы ең шулы қылмыстық медициналық істердің бірі болмақ. Еске сала кетейік, 2019 жылы Хегель 85 адамды өлтіргені үшін өмір бойына бас бостандығынан айырылған болатын.
