Нұр-Сұлтан, BAQ.KZ. Өмір бойы бас бостандығынан айрылған Владислав Челах өзіне қол жұмсады деген қауесет тараған болатын. Бұл туралы "КАРАВАН" жазды.
Басылымның хабарлауынша, Челах журналистермен сөйлесуден бас тартқан. Бірақ бірнеше рет өтініш жасағаннан соң келіскен.
Камерада журналист бойы екі метрге шамалайтын жігітті көреді. Сот кезінде оның дене тұрқы мүлдем басқа болған.
Қысқаша сөйлескеннен кейін Владислав сөздерінің БАҚ-та тарауына қарсы болған. Ал колония қызметкерлері Владиславпен түскен фотолардың барлығын өшіріп тастатады.
Содан соң журналистер Челахтың анасы Светлана Ващенкоға хабарласқан. Ол күйеуі және балаларымен Ресейдің Калининград облысына көшіп кеткен.
Влад бізге ештеңе айтпайды. Тек ешкімді өлтірмегенін айтады. Ал кімнің қатысы болуы мүмкін екенін де айтпайды. Үн шығармайды. Кездесу кезінде де бұл туралы айтуға рұқсат бермейді. Барлық әңгімеміз отбасы және туысқандар туралы болады. Артық сұрақ қоюға болмайды, - деді анасы Светлана Ващенко.
"Арқанкерген" шекара бекетінде 2012 жылы мамыр айының соңында қайғылы оқиға болды. Ол жерде 15 адам шекара қызметін атқанған. Кейін 14 адамның мәйіті табылды.
Сондай-ақ, жақын жерде орналасқан аңшы үйінен қорықшының мәйіті табылды. Бірнеше күннен кейін тірі қалған жалғыз шекарашы – 19 жастағы қатардағы Челах ұсталды. Басында ол әріптестері мен қорықшыны өлтіргенін мойындады. Кейін ол мұны қысым көрсетілген соң мойындағанын айтты. 2012 жылдың 11 желтоқсанында қылмыстық істер жөніндегі ауданаралық мамандандырылған әскери сот Челахқа өмір бойы бас бостандығынан айыру жазасын кесті.
