Түркия президенті Режеп Тайип Ердоған Стамбул мен елдің басқа да қалаларында өтіп жатқан наразылықтар аясында халыққа үндеу жасап, билік “көше террорын” қолдауға шақырған жауапсыз әрекеттерге көз жұма қарамайтынын мәлімдеді, деп хабарлайды BAQ.KZ РИА Новости агенттігіне сілтеме жасап.
Маргиналды топтардың соңынан еріп, полициямызға шабуыл жасау, судьялар мен прокурорларға қоқан-лоқы көрсету, демократия мен ұлттық ерік-жігерге қарсы шығу, заңсыз әрі антидемократиялық әдістерді қолдану арқылы бұл елде ештеңеге қол жеткізе алмаймыз. Түркия – көшеде табылған ел емес. Түркия көше террорының алдында тізе бүкпейді, – деді жұма күні Түркия президенті.
Оның айтуынша, үкімет Түркияны “террорға душар ету” әрекеттеріне жол бермейді.
Мен Түркияны террорға душар етуге, елдің тыныштығын бұзуға, халқымыздың тұрақтылығына қауіп төндіруге бағытталған ешбір әрекетке төзбейтінімізді мәлімдегім келеді. Біз бұл халықтың мәңгілік және берік бауырластығына нұқсан келтіруге жол бермейміз. Ұмытпаңыздар, көшеге шығуға шақыру – бұл тұйық жол, – деді Ердоған, оппозициялық Республикалық халықтық партиясының (CHP) төрағасы Өзгүр Өзелдің сөздеріне жауап ретінде.
Сәрсенбі, 19 наурыз күні Стамбулдың бас прокуратурасы қаланың мэрі Экрем Имамоғлunun жемқорлық, парақорлық және террористік қызметке жәрдемдесу ісіне қатысы бар деп ұсталғанын хабарлады. Ал Имамоғлу өзі биліктің қысымына мойынсұнбайтынын мәлімдеді.
Оппозициялық саясаткердің ұсталуы жаппай наразылықтарға ұласты. Билік қала орталығындағы қауіпсіздік шараларын күшейтіп, жексенбіге дейін митингілер мен демонстрацияларға тыйым салғанына қарамастан, халық көшеге шықты.
Бейсенбі, 20 наурыз күні Имамоғлуны қолдау мақсатында Анкара мен Стамбулда наразылық акциялары өтті. Түркияның ішкі істер министрі Али Ерликаяның айтуынша, осы акциялар барысында 16 полицей жарақат алған.
Алғаш рет Имамоғлуның ұсталуына қатысты пікір білдірген Ердоған, оппозиция тарапынан полиция мен сот жүйесіне саяси қысым жасалып жатқанын айтты. Оның сөзінше, үкіметтің оппозициямен “айтысатын” уақыты жоқ, өйткені олар елдің мәселелерін шешумен айналысуда.
Түркия президентінің әкімшілігі Имамоғлуның ұсталуына қатысты айтылған сындарды жоққа шығарып, Ердоғанға қарсы жасалған “негізсіз жала” деп атады. Айта кетсек, Имамоғлу алдағы мерзімінен бұрын өтуі мүмкін президенттік сайлауда Ердоғанның басты қарсыластарының бірі ретінде қарастырылып отыр.
0
0
1
0
0
