Нұр-Сұлтан, BAQ.KZ. 2020 жылдың соңына дейін "Түркістан" әлеуметтік кәсіпкерлік корпорациясы" АҚ Түркістан қаласында 25 тұрғын үй кешенінің құрылысын аяқтауды жоспарлап отыр, деп хабарлайды "Түркістан" ӘКК» АҚ баспасөз қызметі.
"Түркістан" ӘКК басшылығы мен құрылыс компаниялар өкілдерінің қатысуымен өткен жиында "Сырдария" және "Арман" тұрғын үй кешендерінің құрылысын аяқтау мәселелері талқыланды. Келіссөз барысында құрылыс салушылардың үй құрылысын аяқтау үшін қаржының жетіспеушілік мәселелері бар екені анықталды. Кездесу қорытындысы бойынша қос тарап қаржыландыру шарттарын анықтап, нақты механизмдерін мақұлдады.
Сатуға арналған құрылысы жүріп жатқан объектілер алаңының жалпы көлемі 58 мың шаршы метр, ал жалпы сомасы шамамен 10 млрд теңгені құрайды. Жаңа шағын ауданның пайда болуы 800-ден астам жас және көпбалалы отбасыларға биыл баспаналы болуға мүмкіндік береді.
Еске сала кетсек, 2019 жылы "Нұрлы жер"мемлекеттік бағдарламасы аясында "Түркістан – жаңа қала" шағын ауданында 6 тұрғын үйдің құрылысы аяқталды. Ал 2020 жылы 25 көпқабатты үйдің құрылысын аяқтау жоспарланып отыр.
