Соңғы үш жылда мыңнан астам адамның ажалы судан келген, деп хабарлайды BAQ.KZ тілшісі.
Бұл туралы Төтенше жағдайлар министрі Юрий Ильин Үкімет отырысында мәлімдеді.
Айтуынша, былтыр суға батқандар саны 43%-ға азайғанымен, өкінішке қарай, жағдай жақсы емес.
Соңғы 3 жылда мыңнан астам адам суда қаза болды, атап айтқанда, 1 103 адам, оның 321-і – балалар. Жыл басынан бері еліміздің су айдындарында 69 адам құтқарылды, оның ішінде 15-і бала, шомылу маусымы басталғаннан бері - 11 адам, оның ішінде 2-еуі бала. Бұл ретте 45 адам суда қаза болды, оның ішінде 14-і кәмелетке толмаған, - деп атап өтті ведомство басшысы.
Сонымен қатар ол суға кету жағдайлары қай өңірде көп кездесетініне тоқталды.
Суға батқандардың ең көбі Ақтөбе (5 адам, оның ішінде 5 бала), Абай (5 адам, оның ішінде 2 бала), Қостанай (5 адам) облыстарында. Еліміздің су айдындарында адамдардың қаза болуының негізгі себептері жабдықталмаған орындарда шомылу, балаларды ересектердің қарауынсыз қалдыру, мас күйде және өз күштерін бағаламай шомылу болып саналады, - деді министр.
