Қарағанды облысының экологтары тазалық үшін күресті жалғастыруда, деп хабарлайды BAQ.KZ.
Осы жылдың басынан бастап олар 204 рұқсат етілмеген полигонды анықтады, оның ішінде 11-і ғарыштық бақылау арқылы анықталды.
120-дан астам полигон жойылды, бірақ қоқыс жиналған жерлерге рейдтер жалғасатын болады. Себебі тұрғындар ескі қалдық орнына қоқыс әкеп төгуді тоқтатар емес. Бұл туралы Өңірлік коммуникациялар қызметінде өткен брифингте Қарағанды облысы бойынша экология департаментінің мемлекеттік экологиялық бақылау бөлімінің басшысы Бақтияр Көлебаев айтып берді.
Экология департаментінің мамандары полициямен бірлесіп Қарағанды, Теміртау, Балқаш қалаларында 20 рейд жүргізіп, қалалар мен елді мекендердің аумақтарын абаттандыру ережелерін бұзғаны, сондай-ақ инфрақұрылым объектілерін қиратқаны, жасыл желектерді жойғаны және бүлдіргені үшін ҚР ӘҚБтК-нің 505-бабы бойынша 15 хаттама толтырды. Рұқсат етілмеген полигондарды анықтау бойынша рейдтер жалғасатын болады, – деп атап өтті Бақтияр Көлебаев.
Өңірдегі экологиялық жағдайға "Таза Қазақстан" республикалық акциясы да оң әсерін тигізді, деп толықтырды спикер. Осы жылдың сәуір айынан бастап облыста ҚТҚ полигондарына 150 мың тоннадан астам қоқыс жиналып, шығарылды. Мыңдаған ағаштар егілді, олар болашақта ауаны тазартады.
"Таза Қазақстан" республикалық экоакциясы жыл соңына дейін ұзартылды. Біз аймақ тұрғындарын оған қосылуға, қоршаған ортаға ұқыпты қарауға шақырамыз. "Таза Қазақстан" аясында мәдениет және тарих ескерткіштерінің аумақтары да тазаланып, абаттандырылды. Акция тек тазалық үшін күреске ғана емес, сонымен қатар халықты экологиялық мәдениетке баулуға бағытталған, – дейді Бақтияр Көлебаев.
