Кеше, 11 тамызда Алматыда халық арасында “Барахолка” деп танылған базарда өрт шықты. Тілсіз жаудың салдарынан асхана өртеніп кетті. Бұл жағдайға кінәлі кім? Алматыдағы BAQ.KZ тілшісі оқиға орнына барып, анықтап көрді.
Өрт "Үш-Қоңыр" базарында, Солтүстік сақина көшесі, 122 мекенжайында болған. Қызыл жалын екі 20 тонналық контейнерге тараған, одан сыйымдылығы 25 литрлік екі газ баллоны эвакуацияланды. Төтенше жағдай департаменті мәліметінше, өрттің жалпы ауданы – 70 шаршы метр. Алайда базар әкімшісінің айтуынша, жалын тек 20 шарлы метрге тараған. Ол өрт қауіпсіздігі үшін орынды жалға алушылардың өздері жауап беретінін айтты.
Өрттің себебі – контейнерді жалға алушы кәсіпкер мұздатқышты тоққа қосып кеткен, содан қысқа толқынды тұйықталу болған. Базар басшылығы тарапынан ол кісіге ешқандай шағым-талабымыз жоқ. Керісінше осындағы саудагерлермен бірге қаржылай қол ұшын созамыз. Жаңа орын да тауып береміз. Өрт қауіпсіздік туралы түсіндірме жұмыстарын ТЖД қызметкерлері базарға келіп жүргізіп тұрады, – деді "Үш-Қоңыр" базарының әкімшісі Еңлік Тойбаева.
Өртенген асхана сақтандырылмалған. Оның иесі Пернегүл Сәрсенова өрт салдарынан өзіне келген шығын 1 миллион теңгеге бағаланатынын және ешкімге шағым білдірмейтінін айтты.
.jpeg)
"Үш-Қоңыр" базарының әкімшісі қазір жалпы аумақты Жол картасы бойынша жаңғырту жұмыстары жүріп жатқанын атап өтті.
Еске салайық, бұған дейін Астанада "Биг Шанхай" базары өртенген болатын. Салдарынан 300 кәсіпкер зардап шекті.
