Тасқынның алдын алу үшін, Махамбетте жыралардың аузы ашылып жатыр, деп хабарлайды BAQ.KZ.
Мамандар мұндай амалдың елдімекендерді тасқыннан қорғауға оң ықпал ететінін айтады.
Бүгінгі таңда 12 жыраға, оның ішінде Қарт Жайық, Ойынкөл, Өлішығанақ, Бесағаш, Қоржын, Қосөзек, Жұмай, Бесқала, Алмағамбет т.б. жыраларға су жақсы құйылып жатыр. Судың көп бөлігінің сай-салаларға құйылуы елдімекендерді су тасқынынан аман алып қалуға көмектеседі. Әзірге судың құрамында орман шаруашылығына кері әсер ететіндей зиян байқалмайды, - дейді Махамбет ауданы «Орман және жануарлар дүниесін қорғау жөніндегі мекеме» мемлекеттік мекемесінің директоры Алтынбек Амангелдіұлы.
Орманшылардың айтуынша, соңғы уақытта Атырау облысында су тапшылығының салдарынан орман қорында қурап қалған ағаштардың саны көбейіп кеткен.
Сол себепті, қазіргі уақытта Махамбет ауданы орман шаруашылығына қарасты барлық жыраның аузы ашылып отыр. Жыралар ағаш қалдықтарынан және топырақтан тазартылып, судың нормаға сай құйылуы үшін жағдай жасалып жатыр.
Жалпы Атырау облысындағы төрт орман шаруашылығы бар. Олар Атырау қаласы, Құрманғазы, Индер және Махамбет аудандарында орналасқан.
