2-3 маусымда Астана қаласында "BREAST CANCER MEETING ASTANA" конференциясы өтеді, онда сүт безі обырын диагностикалау мен емдеудің ең өзекті мәселелері талқыланады және маңызды тактикалық мәселелерді шешудің жаңа жолдары әзірленеді, деп хабарлайды BAQ.KZ.
Бұл конференция бүкіл кәсіби қоғамдастық үшін құндылық болып табылады, өйткені сүт безінің ісігі бүгінде қауіпті ісіктерден болатын өлім себептерінің арасында жетекші орындардың бірін алады. Сонымен қатар, әрбір клиникалық жағдайда осы ауруды емдеудің оңтайлы тәсілін диагностикалауға және таңдауға байланысты көптеген сұрақтар ашық күйінде қалады, бұл осы тақырыпқа үнемі оралу қажеттілігін тудырады.
ҚР Денсаулық сақтау министрлігінің қолдауымен өткізілетін форум жұмысына Қазақстан мен Ресей Федерациясының спикерлері қатысады. Қатысушылардың қатарында практикалаушы онкомаммологтар, хирургтар, химиотерапевттер, ультрадыбыстық диагностика дәрігерлері, сәулелік терапия мамандары, патоморфологтар тіркелген.
️️Өтетін орны: Radisson қонақ үйі, Астана, Сарыарқа көшесі, 4; Ұлттық ғылыми онкология орталығы, Астана, Керей және Жәнібек хандар көшесі, 3.
Қатысушыларды тіркеу уақыты: 07-30-дан 08-30 минутқа дейін.
Салтанатты ашылу уақыты: 18-15-тен 19-00 минутқа дейін.
Конференцияның шеңберінде келесі бағыттар бойынша панельдік сессиялар өткізіледі:
Сүт безінің онкопластикалық хирургиясы;
Сүт безі обыры хирургиясының өзекті мәселелері;
Сүт безі обырының дәрілік және сәулелік терапиясының қағидаты;
Сүт безі обырын диагностикалау.
Ұйымдастырушылар: "Ұлттық ғылыми онкология орталығы" ЖШС, "Онкологтар маммологтар" ҚБ, "Онколог-хирургтар қоғамы" ҚБ.
Іс-шара жұмысының бірінші күні Live surgery форматындағы сессиялар жоспарланған.
Екінші күні қатысушылар семинарларға қатысу арқылы сүт безінің ісіктері саласындағы өзінің білім деңгейін арттыра алады.
