2022 жылдың 15-18 желтоқсан аралығында Астана қаласындағы №83 мектеп-гимназиясында «Көкжал» спорт клубтары бірлестігінің ұйымдастыруымен «Алаш арыстарын» еске алу мен Қазақстан Республикасы Тәуелсіздік күніне орай бокстан жастар мен жасөспірімдер арасындағы «Алаштың арландары» атты Республикалық ашық турнирі өтеді, деп хабарлайды BAQ.KZ.
Турнирдің мақсаты жас спортшылар мен спорт сүйер қауым арасында еліміздің тәуелсіздік тарихын, «Алаш арыстарының» отанымыздың алдындағы еңбектерін насихаттау, бүгінгі жетістіктерімізді баянды ету жолында еліміздің болашақ дамуындағы елдік, отандық мұраттар мен қасиеттерді жастарымыздың бойына сіңіру, жастарды отансүйгіштік пен салауатты өмір сүру салтына шақыру болып саналады. Турнир 2007-2012 жылдары туған жастар мен жасөспірімдер арасында өтеді.
Бәсекеге еліміздің барлық облысына, сол сияқты Ресей, Өзбекстан, Тәжікстан, Қырғызстан елдерінің спорт клубтары қатысады.
Турнир 16 желтоқсан сағат 11:00-де ресми түрде ашылады. Ал 18 желтоқсан күні сағат 14:00-де жеңімпаздарды марапаттау рәсімі өтеді.
