Астаналықтарды екі күннен бері ақ түтек боран мен ақ ұлпа әбіргерге салды. Сенбіден бері тоқтаусыз жауған қар салдарынан қалада қозғалыс қиындады, деп хабарлайды BAQ.KZ.
Тоқтаусыз жауған қардың кесірінен жұмысына асыққан халық діттеген жеріне жете алмады.
Соңғы тәуліктегі ауа райының күрт өзгеруіне байланысты қалада жол-көлік апаты жиілеп кетті. Соңғы 1 күнде 140-тан астам оқиға тіркелді. Осы ретте автокөлік жүргізушілері мен жаяу жүргіншілерді жолда барынша абай болуға шақырамыз. Себебі, қазір қозғалыс қиындаған. Барлық жүргізушіні жолда мүмкіндігінше мұқият болуын сұраймыз, – деді Полиция департаменті жергілікті полиция басқармасының бастығы Арман Айтмағамбетов.
Күн райы қолайсыздығын жолаушыларға ғана емес, мектеп оқушыларына да тигізді. Балалар онлайнға ауысты. Мұндай ауа райы тағы 2-3 күнге созылуы мүмкін. «Қазгидромет» мамандары алдағы күндері еліміздің барлық өңірінде қалың қар жауып, күн күрт суытады деп болжап отыр.
