Нұр-Сұлтан, BAQ.KZ. Бүгін XVII Еуразиялық медиа форумға қатыстым. Биылғы форумда дүние жүзін алаңдатқан бірқатар маңызды мәселелер кеңінен талқыланып жатыр. Іс-шараға қатысушылар пандемиямен күрес, денсаулық, қауіпсіздік, ынтымақтастық және басқа да бағыттар бойынша өз ойларын білдіріп, ұсыныс-пікірлерімен бөлісуде, деп жазды Facebook-тегі парақшасында Парламент Сенатының төрағасы Мәулен Әшімбаев.
Біз қатысқан пленарлық сессия Қазақстан Тәуелсіздігінің 30 жылдығына арналды. Осы жылдар ішінде Қазақстан егемен ел ретінде толық қалыптасып, айтарлықтай жетістіктерге қол жеткізді. Шын мәнінде, біз бар болғаны үш онжылдықта ордалы елге айналдық. Шекарамызды шегендеп, экономика мен ішкі және сыртқы саясатта жасампаз шешімдер қабылдадық. Тәуелсіз мемлекет құру жолында салиқалы қадамдар жасадық. Әрине, әлі де болса жетілдіретін, толықтыратын тұстарымыз бар екені белгілі. Алдағы уақытта соның бәрін еңсеріп, елдігімізді еңселі ете түсеміз деп сенемін. Оған біздің әлеуетіміз де, мүмкіндігіміз де толық жетеді, - деп жазды ол.
Қазіргі таңда біз үшін Тәуелсіздіктен асқан құндылық жоқ. Сондықтан егемендікті одан әрі нығайту – барша қазақстандықтың абыройлы міндеті.
Осы жолда ашықтық пен толеранттылық аса маңызды. Сол себепті Қазақстан тәуелсіздіктің алғашқы күнінен бастап бүкіл әлеммен ашық қарым-қатынас орнатып, инновацияға, ғылым мен білімге және өзара ынтымақтастыққа баса мән беріп келеді.
Бұл ретте бүгінгі Форумның да маңызы зор. Қазақ елінің әлемге жаһандық мәселелерді талқылайтын осындай алаң ұсынуының өзі ашықтықтың жарқын көрінісі. Биыл іс-шара онлайн форматты қолданып өткізілгеніне қарамастан, әдеттегідей әлемге белгілі әрі білікті спикерлер мен сарапшылар жұмылдырылған. Соған байланысты көптеген өзекті мәселенің шешімін табу үшін осындай жиындардың берері мол деп есептеймін және Форумның алдағы жұмысына сәттілік пен табыс тілеймін!, - деді Мәулен Әшімбаев.
