BAQ.kz - Қазақстан жаңалықтары USD 370.55 BAQ.kz - Қазақстан жаңалықтары EUR 421.76 BAQ.kz - Қазақстан жаңалықтары RUB 5.57
استانا:

كەلەسى جىلدىڭ «جاستار جىلى» دەپ جاريالانۋى قۇپتارلىق باستاما – باۋىرجان جاقىپ

فوتو: ашық дереккөзден

بۇگىن قازاقستان جازۋشىلار وداعىندا ەلباسىنىڭ «قازاقستاندىقتاردىڭ ٴال-اۋقاتىنىڭ ٴوسۋى: تابىس پەن تۇرمىس ساپاسىن ارتتىرۋ» اتتى جولداۋى تالقىلاندى، دەپ حابارلايدى baq.kz ٴتىلشىسى.

جيىن بارىسىندا جازۋشىلار وداعى ٴتوراعاسىنىڭ ورىنباسارى باۋىرجان جاقىپ جولداۋدا ايتىلعان ماڭىزدى باستامالارعا توقتالىپ ٴوتتى.

«پرەزيدەنت جولداۋى كەزىندە ەلىمىزدىڭ تاۋەلسىزدىك كەزىندەگى جەتىستىكتەرىن كىرىسپە سوزىندە ايتىپ ٴوتتى. سونىڭ ٴبىرى حالىق سانىنىڭ 18 ملن-نان اسقانى، سوڭعى 20 جىل ىشىندە شەتەلدەن ينۆەستيسيا تارتۋ جوعارى دەڭگەيگە جەتىپ، 300 ملرد اقش دوللارىن قۇراعانىن ايتتى. دۇنيەجۇزىلىك بانكتىڭ بيزنەس جۇرگىزۋ جونىندەگى رەيتينگىندە قازاقستان 190 ەلدىڭ ىشىندە 36 ورىنعا كوتەرىلگەنىن جەتكىزدى. جولداۋداعى تاعى ٴبىر كوڭىل اۋداراتىن جايت 2019 جىلدىڭ 1 قاڭتارىنان باستاپ ەڭ تومەنگى جالاقى مولشەرى 1،5 ەسەگە دەيىن كوتەرىلەتىندىگى. سونىمەن قاتار، 3 جىلدىڭ ىشىندە وڭدەۋ ونەركاسىبىنە قوسىمشا 500 ملرد تەڭگە بولىنەتىندىگىن، باسىمدىعى بار جوبالارعا قولجەتىمدى نەسيە بەرۋ ٴۇشىن ۇلتتىق بانككە 600 ملرد تەڭگە كولەمىندە ۇزاق مەرزىمدى قارجى بولىنەتىندىگىن جەتكىزدى. سونداي-اق بيۋدجەتتىك قىزمەتكەرلەر، ونىڭ ىشىندە دەنساۋلىق ساقتاۋ سالاسىنىڭ، مۇعالىمدەردىڭ، پوليسيا قىزمەتكەرلەرىنىڭ جالاقىسى كوتەرىلەتىنىن ايتتى. پەداگوگتىڭ مارتەبەسى تۋرالى زاڭ قابىلداۋ ماسەلەسى كوتەرىلدى. بۇل ۇلكەن وڭدى ماسەلە دەپ ويلايمىن»، -دەدى ول.

سونىمەن قاتار ول، ەلىمىزدە بۇعان دەيىن «100 مەكتەپ، 100 اۋرۋحانا» سالۋ باعدارلاماسى ىسكە اسىرىلعانىن جانە وسى جولداۋدا دەنە شىنىقتىرۋ مەن ساۋىقتىرۋ كەشەندەرىن سالۋ تۋرالى ايتىلعاندىعىن جەتكىزدى.

«پرەزيدەنت سونداي-اق «رۋحاني جاڭعىرۋ» باعدارلاماسى جاپپاي قولداۋعا يە بولىپ، قوعامداعى جاڭعىرۋ ۇردىستەرىنە زور سەرپىن بەردى، بۇل باستامانى ارى قاراي جالعاستىرىپ قويماي ونىڭ اياسىن جاڭا مازمۇنمەن، جاڭا باعىتپەن تولىقتىرۋ قاجەت»، دەگەن پىكىرىن ٴبىلدىردى. وسى باعىتتا ٴبىزدىڭ جازۋشىلار وداعى دا ٴبىراز شارۋالار اتقارىپ جاتىر. جەر-جەردە دۇنيەدەن وتكەن اقىن-جازۋشىلاردى ەسكە الۋ شاراسى ٴوتتى، جاقىندا استانا قالاسىندا ەۋرازيا فورۋمى ۇيىمداستىرلدى. وعان قازاقستاننان 60-قا جۋىق اقىن-جازۋشىلار قاتىستى. كەلەسى جىلى جازۋشىلار وداعىنىڭ 85 جىلدىعى. ونى ٴتيىستى دەڭگەيىندە اتاپ ٴوتۋ جايىندا جوعارى جاققا قۇلاققاعىس ەتىپ ايتىپ جاتىرمىز»،- دەدى ب. جاقىپ.

ٴسوز اراسىندا ول، ەلباسى جولداۋدا كەلەسى جىلدى «جاستار جىلى» دەپ جاريالاۋى قۇپتارلىق باستاما ەكەندىگىن جەتكىزدى.

«ٴبىز جاس ادەبيەتشىلەردى قولدايمىز. جاستاردىڭ الەۋمەتتىك جاعدايى شەشىلمەسە، ولاردان قانداي شىعارماشىلىق كۇتۋگە بولادى؟ سوندىقتان «جاستار جىلى» دەپ جاريالانعانىنىڭ ٴوزى بىزگە تىرەك بولىپ تۇر. وتكەندە 20-عا جۋىق جاس قالامگەر جازۋشىلار وداعىنا مۇشەلىككە قابىلداندى. ولاردى تەك قابىلداپ قانا قويماي كىتاپتارىن شىعارىپ، الەۋمەتتىك جاعدايىن شەشۋ سياقتى كوپتەگەن ماسەلەلەر بار»، -دەدى ول.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي