USD 334.89 EUR 361.61 RUB 5.28
استانا:

«تەز وتەتىن ايلار». بەيجىڭدە قازاق جازۋشىسىنىڭ كىتابى جارىق كوردى

ٴبىر ۇلتتىڭ رۋحاني بايلىعىنىڭ قاينار كوزى سول ۇلتتىڭ بولمىسى مەن ٴبىتىمىن بەينەلەيتىن ادەبيەت پەن مادەنيەتتەن باستاۋ الىپ جاتادى. ٴار زاماننىڭ تىنىسىن جىرلاپ، ٴار حالىقتىڭ تاعدىرىن تاڭبالايتىن ادەبيەت اتتى قاسيەتتى ونەردىڭ بەتالىسى دا زامان اۋقىممەن ساباقتاسىپ جاتاتىندىعى بەلگىلى. بۇل كۇندەرى عىلىم مەن تەحنيكانىڭ ادەبيەتكە جاساپ وتىرعان ىقپالى دا از ەمەس. سونىڭ ٴبىر اۋىز تولتىرىپ ايتارلىق جاڭالىعى – ينتەرنەت ادەبيەتى. سول ينتەرنەت ادەبيەتىنىڭ وزىندىك ەرەكشەلىگىن جەتە ٴتۇسىنىپ، تاماشا قولدانا بىلگەن جاس جازۋشىلاردىڭ ٴبىرى ەركەبۇلان ٴمۇتان ۇلى.

بەيجيڭدەگى ورتالىق ۇلتتار ۋنيۆەرسيتەتىندە ەركەبۇلان ٴمۇتان ۇلىنىڭ ينتەرنەت الەمىندە جاريالانعان ميكرو اڭگىمەلەرىنىڭ توپتاماسى نەگىزىندە جيناقتالىپ باسىلعان «تەز وتەتىن ايلار» اتتى اڭگىمەلەر جيناعىنىڭ تۇساۋ كەسەرى وتكىزىلدى.

تۇساۋكەسەر سالتىنا ورتالىق ۇلتتار ۋنيۆەرسيتەتى قازاق تىل-ادەبيەتى فاكۋلتەتىنىڭ پروفەسسورى، ادەبيەتتانۋشى مۇحتار ٴابىلقاق ۇلى، «ۇلتتار» باسپاسى قازاق رەداكسياسىنىڭ باستىعى باقىتبەك توقتاسىن ۇلى، قازاق ەلىندەگى م.اۋەزوۆ اتىنداعى ادەبيەت جانە ونەر ينستيتۋتىنىڭ اعا عىلىمي قىزمەتكەرى، فيلولوگيا عىلمدارىنىڭ دوكتورى گۇلجاھان جۇمابەردىقىزى، اتالعان كىتاپتىڭ جاۋاپتى رەداكتورى، «ۇلتتار» باسپاسى قازاق رەداكسياسىنىڭ قىزمەتكەرى ٴومىرجان سەيسەنقۇل ۇلى قاتارلى قوناقتار قاتىناستى.

مۇنان سىرت، بەيجيڭدە قىزمەت ىستەيتىن قازاق زيالىلارى مەن ٴبىلىم الىپ جاتقان ستۋدەنتتەردەن 200-گە تارتا ادام كەلدى.

سوز كەزەگىن العان عالىمدار مەن قوناقتار اتالعان جيناق جونىندە ٴتۇرلى باعالارىن بەرىپ، كوزقاراستارىن ٴبىلدىردى. جاس بۋىن قالامگەردىڭ ينتەرنەت ادەبيەتىنىڭ ەرەكشەلىگىن ٴوز بويىنا سىڭىرە جازعان اڭگىمەلەرى قوناقتاردىڭ جاقسى باعاسىنا يە بولدى. «بەرگەنىنەن بەرەرى مول بولسىن!» دەگەن ادەبيەت ماماندارى جاقسى تىلەكتەرى مەن شىنايى باعالارىن بەردى.

شارا سوڭىندا «تەز وتەتىن ايلار» كىتابىنىڭ اۆتورى ەركەبۇلان ٴمۇتان ۇلى شىعارماسىنىڭ جازىلۋى مەن جيناقتىڭ جارىق كورۋى جونىندە ٴسوز الىپ، تەبىرەنىستى كوڭىل-كۇيىن جۇرتپەن ٴبولىستى. تۇساۋ كەسەر سالتىن ورتالىق ۇلتتار ۋنيۆەرسيتەتى قازاق تىل-ادەبيەت فاكۋلتەتىنىڭ دوكتورانتى دارىنبەك ماعاي ۇلى جۇرگىزدى.

ادەبيەت سۇيەر جاستارعا «قوش بول، بۇلاناي»، «كوكەك بۇلدىرگەنگە تويعاندا قايتادى» قاتارلى شىعارمالارىنىڭ ينتەرنەتتەگى تارالىمىمەن ابدەن تانىس بولعان اۆتوردىڭ «تەز وتەتىن ايلار» اتتى جيناعىنىڭ تۇساۋكەسەرىنە بەيجيڭدەگى ٴار قايسى ۋنيۆەرسيتەتتەن ارنايى كەلگەن جاستار قولتاڭبا الىپ، قۋانا تاراستى.

ەركەبۇلان ٴمۇتان ۇلى:

1988 جىلى 10 قىركۇيەكتە ىلە ايماعى كۇنەس اۋدانى كەڭسۋ اۋىلىندا دۇنيەگە كەلگەن. ٴقازىر قىتاي ينتەرنەت تەلەۆيدەنيەسىنىڭ قازاق ارناسىندا رەداكتور، ٴتىلشى بولىپ قىزمەت اتقارادى.

بۇل اڭگىمەلەر جيناعى 2013 جىلدىڭ قازان، قاراشا، جەلتوقسان ايلارىندا اۆتور قالامىنان تۋىنداعان. سول سەبەپتى جيناق اتى «تەز وتەتىن ايلار» دەپ قويىلعان.

جيناقتاعى اڭگىمەلەر ٴداستۇرلى ادەبيەت پەن ينتەرنەت ادەبيەتىنىڭ جارقىن توعىسىندا جارىق كورگەن.

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي