BAQ.kz - Қазақстан жаңалықтары USD 368.28 BAQ.kz - Қазақстан жаңалықтары EUR 419.21 BAQ.kz - Қазақстан жаңалықтары RUB 5.59
استانا:

قىرعىزستاندا بىردە ٴبىر قازاق مەكتەبى جوق - قىرعىزستان قازاعى

استانا، baq.kz. استانادا باستالعان «قاسيەتتى قازاق ەلى» اتتى ونەر فەستيۆالى اياسىندا دۇنيەجۇزى قازاقتارىنىڭ قاۋىمداستىعى ٴتوراعاسىنىڭ ٴبىرىنشى ورىنباسارى زاۋىتبەك تۇرىسبەكوۆتىڭ قاتىسۋىمەن دوڭگەلەك ۇستەل ٴوتتى.

كەزدەسۋگە الەمنىڭ 10 ەلىنەن 40-قا جۋىق قانداسىمىز قاتىستى. ونىڭ ىشىندە موڭعوليا، وزبەكستان، قىرعىزستان، تۇركيا، قىتاي جانە تاعى باسقا ەلدەر بار.

«بار قازاقتىڭ ٴبىر عانا وتانى بار، ول - قازاقستان. ٴبىزدىڭ بۇگىنگى سانىمىز - 16 ميلليون. ونىڭ 12 ميلليونى - ەلىمىزدە، قالعان 4 ميلليونى شەتەلدە تۇرادى. جالپى 44 مەملەكەتتە قازاقتار بار، نەگىزگى شوعىرى قىتاي، وزبەكستان جانە رەسەيدە ورنالاسقان. ەلباسىنىڭ تاپسىرماسىنا سايكەس، ٴبىز شەتەلدەگى قانداستارىمىزعا قولداۋ كورسەتىپ قانا قويماي، ولارمەن تىعىز قارىم-قاتىناس ورناتۋىمىز كەرەك. بۇگىنگى شارا - سونىڭ دالەلى»، - دەدى دۇنيەجۇزى قازاقتارىنىڭ قاۋىمداستىعى ٴتوراعاسىنىڭ ٴبىرىنشى ورىنباسارى زاۋىتبەك تۇرىسبەكوۆ.

كەزدەسۋ بارىسىندا شەتتەن كەلگەن قانداستارىمىز ٴوز ويلارىن ورتاعا سالىپ، ۇسىنىس پىكىرلەرىن، مۇقتاجدىقتارىن ايتتى.

"بىزدەگى ەڭ باستى ماسەلە - ٴتىل ماسەلەسى بولىپ وتىر. قىرعىزستاندا بىردە-بىر قازاق مەكتەبى جوق. رەسەيدە، وزبەكستاندا، موڭعوليادا، قىتايدا قازاق ٴتىلدى مەكتەپتەر بار. ال 30 مىڭعا جۋىق قازاق ٴومىر ٴسۇرىپ جاتقان قىرعىزستاندا قازاق مەكتەبى دەمەي-اق قويايىق، قازاق ٴتىلىن ۇيرەتەتىن ۇيىرمە جوق. وسىنىڭ سالدارىنان ٴبىزدىڭ ۇرپاق قىرعىز ٴتىلىن وقىپ نە قازاق ەمەس، نە قىرعىز ەمەس بولىپ ٴوسىپ كەلەدى. وسى ماسەلەنى شەشىپ بەرۋ جاعىن قاراستىرساڭىزدار ەكەن" - دەدى قىرعىز ەلىنەن كەلگەن قانداسىمىز.

سونىمەن قاتار، كەزدەسۋ كەزىندە دۇنيەجۇزى قازاقتارىنىڭ قاۋىمداستىعى تۇسىرگەن «الىستاعى اعايىن» دەرەكتى ٴفيلمىنىڭ تۇساۋكەسەرى ٴوتتى.

وندا حح عاسىردىڭ 30-50 جىلدارى التايدان انادولىعا دەيىن جالعاسقان تاعدىرلى كوشتىڭ بارىسى مەن قازىرگى تۇركيادا تۇرىپ جاتقان قانداستارىمىزدىڭ ٴومىرى باياندالادى.

«تاريحي فيلمدەگى وقيعانى باستان-اياق بايانداۋشى تۇركيا قازاعى مانسۇر ٴتايجى اقساقال بۇگىندە 75 جاستا. التاي كوشىن ونىڭ اكەسى باستاپ بارعان، ول كەزدە اقساقال 7 جاستا بولعان. ٴوزىنىڭ ايتۋىنشا، التاي قازاقتارى 9 ايدىڭ ىشىندە 3 مىڭنان استام شاقىرىمدى جاياۋ باعىندىرىپ، گيمالاي تاۋىن باسىپ ٴوتىپ، تۇركياعا جەتكەن. ٴفيلمدى كۇنى كەشە عانا بىتىردىك. شەتەلدە تۇراتىن قازاقتاردىڭ تاعدىرى ٴارتۇرلى. ال، مىنا قازاقتاردىڭ باستان كەشكەنى - بولەك اڭگىمە. تاريحي تۋىندى ارحيۆ ماتەريالدارىمەن قۇندى. وسى ماقساتتا ٴبىز قىتاي، ۇلىبريتانيا ارحيۆتەرىمەن بىرلەسىپ جۇمىس ىستەدىك. وتانداستارىمىزدى قولداۋعا باعىتتالعان جۇمىستار مۇنىمەن بىتپەيدى»، - دەدى زاۋىتبەك تۇرىسبەكوۆ.

ونىڭ ايتۋىنشا، «الىستاعى اعايىن» ٴفيلمىنىڭ اقش-تا تۇراتىن قازاقتاردىڭ تاعدىرىنا ارنالعان ٴبولىمى ٴقازىر دايىندالىپ جاتىر.

"قاسيەتتى قازاق ەلى" ونەر فەستيۆالى دۇنيەجۇزى قازاقتارىنىڭ قاۋىمداستىعى جانە «وتانداستار» قورىنىڭ ۇيىمداستىرۋىمەن ٴوتىپ جاتىر. بۇگىن فەستيۆالدىڭ سالتاناتتى اشىلۋ ٴراسىمى استاناداعى بەيبىتشىلىك جانە كەلىسىم سارايىندا وتەدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي