BAQ.kz - Қазақстан жаңалықтары USD 363.26 BAQ.kz - Қазақстан жаңалықтары EUR 420.11 BAQ.kz - Қазақстан жаңалықтары RUB 5.54
استانا:

شەتەلدىك دارىگەر: قازاقستاندا ناۋقاستىڭ ۇيىنە بارىپ كۇتىم كورسەتۋ قىزمەتىن دامىتۋ كەرەك

استانا. baq.kz ٴتىلشىسى. قازاقستاندا ناۋقاستىڭ ۇيىنە بارىپ كۇتىم كورسەتۋ قىزمەتى جاقسى دامىماعان. قازاقستان كوپ ۇلتتى مەملەكەت ەكەنىنە قاراماستان، باسىم بولىگىن مۇسىلمان قاۋىمى قۇرايتىنىن ەسكەرسەك، مۇنداي مەديسينالىق قىزمەت ٴتۇرى اۋاداي قاجەت. بۇل تۋرالى استانادا وتكەن ونكولوگتاردىڭ حالىقارالىق عىلىمي-تاجىريبەلىك كونفەرەنسياسىندا رەسەيدەن كەلگەن دارىگەر ولگا ۆاسيلەۆنا ايتتى.

«ٴار پاسيەنت ٴپولياتيۆتى كومەكتى، ياعني كۇتىمدى ٴۇي جاعدايىندا الۋعا قۇقىلى. ٴبىز زەرتتەۋ جۇرگىزۋ ناتيجەسىندە ناۋقاستاردىڭ 20 پايىزى عانا حوسپيسكە جاتقىسى كەلەتىنىن، ال ۇشتەن ٴبىر بولىگى ۋاقىتشا عانا جاتۋعا دايىن ەكەنىن، ال قالعان 50 پايىزى مۇلدەم جاتقىسى كەلمەيتىنىن انىقتادىق»، - دەيدى ول.

سامارا قالاسىنداعى امبۋلاتورلىق قىزمەت كورسەتەتىن حوسپيس جۇمىسىنىڭ تاجىريبەسىمەن بولىسكەن دارىگەر ناۋقاسقا ٴۇي جاعدايىندا كۇتىم كورسەتۋدىڭ نە سەبەپتى ماڭىزدى ەكەنىن ايتتى. ونىڭ پىكىرىنشە، كەز كەلگەن ادام «حوسپيس» دەگەن سوزدەن قورقادى.

«دارىگەر مەن مەدبيكەلەر الدىمەن ناۋقاستىڭ ۇيىنە بارىپ، قالىن سۇراپ، بار مەيىرىمىن توگىپ، جوق دەگەندە ەكى اپتا بويى بايلانىستا بولۋى كەرەك. ودان كەيىن بارىپ «ٴسىزدى حوسپيسكە جاتقىزۋىمىز كەرەك» دەپ جاعدايدى دۇرىستاپ تۇسىندىرۋلەرى كەرەك. سوندا عانا ناۋقاس حوسپيسكە جاتۋدى اۋىر قابىلدامايدى»، - دەيدى ول.

سونداي-اق، ول جازىلماس دەرتكە شالدىققان ادام قانداي جاقسى حوسپيسكە جاتسا دا، ٴوزىن جايسىز سەزىنىپ، بويىن ۇرەي، قورقىنىش بيلەيتىنىن ايتتى. مۇنداي كەزدە ناۋقاستىڭ تۋعان-تۋىستارىنىڭ كومەك كورسەتۋى وتە ماڭىزدى. ناۋقاستى ۇيىنە الىپ كەتىپ، اقتىق ساپارعا ۇيدەن شىعارىپ سالۋدى پارىز سانايتىن ادامدار بار. ولارعا دا ۇيگە بارىپ كۇتىم جاسايتىن دارىگەرلەردىڭ كومەگى كەرەك.

«ناۋقاستىڭ ۇيىنە باراتىن مەدبيكەلەر اۋىسپاۋى كەرەك. باسىندا قانداي مەدبيكە باردى، سوڭىنا دەيىن سول مەدبيكە بارىپ جۇرگەنى دۇرىس. مەدبيكە ناۋقاس جانە وتباسى مۇشەلەرىمەن دەمالىس كۇندەرى دە ۇيالى تەلەفون ارقىلى بايلانىستا بولۋى شارت. ناۋقاس ومىردەن ٴوتىپ كەتكەننەن كەيىن دە مەدبيكە ونىڭ وتباسى مۇشەلەرىنە دەمەۋ بولىپ، قاسىندا بولعانى ٴجون»، - دەيدى دارىگەر.

ەگەر بەلگىلى ٴبىر ناۋقاسقا باراتىن مەدبيكەلەر اۋىسىپ تۇراتىن بولسا، ناۋقاستىڭ دەنساۋلىق جاعدايىن تۇراقتى تۇردە باقىلاي الماي قالادى. ٴتىپتى، ناۋقاس دەمالىس كۇنى كوز جۇمىپ، دارىگەرلەر ودان حابارسىز بولىپ قالاتىن كەزدەر دە بولادى.

«ناۋقاس ادام دەمالىس كۇنى ومىردەن وزىپ، ول تۋرالى بىلمەي قالعان كەزدە جانىم اۋىرادى. ناۋقاس بۇل جارىق دۇنيەمەن قوشتاسار كەزدە تۋىستارى دا، دارىگەرلەر دە قولىنان كەلگەننىڭ ٴبارىن جاساعانىن، سوڭعى دەمى شىققانشا قاسىندا بولعانىن ٴتۇسىنىپ كەتسە ەكەن دەپ ويلايمىن. سول ٴۇشىن دە دارىگەر مەن مەدبيكە ناۋقاستىڭ قاسىندا بولىپ، ونىڭ جاقىندارىنا ومىردەن وزاتىن ٴساتى تاياپ قالعانىن ايتىپ، دايىنداي ٴبىلۋى كەرەك»، - دەيدى ولگا وسەتروۆا.

سونىمەن قاتار، زەرتتەۋ جۇمىستارى ناتيجەسىندە سوڭعى جيىرما جىلدا حوسپيسكە جاتاتىن ناۋقاستاردىڭ جاسى ون جىلعا جاسارعان، ياعني 1998 جىلى حوسپيسكە جاتقانداردىڭ ورتاشا جاسى – 72،6 جاس بولسا، 2018 جىلى – 61،4 جاس بولعان.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي