BAQ.kz - Қазақстан жаңалықтары USD 367.06 BAQ.kz - Қазақстан жаңалықтары EUR 416.17 BAQ.kz - Қазақстан жаңалықтары RUB 5.56
استانا:

مۇعالىمدەر مەن دارىگەرلەردىڭ تۇرعىن ٴۇي ماسەلەسىن شەشەتىن زاڭ جوباسىن ازىرلەۋ كەرەك - سەناتور

استانا، baq.kz ٴتىلشىسى. سەناتور ٴبىرعانىم ٴايتىموۆا قر پرەمەر-مينيسترى باقىتجان ساعىنتايەۆقا جولداعان دەپۋتاتتىق ساۋالىندا ۇستازدار مەن دارىگەرلەردى باسپانامەن قامتۋ ماسەلەسىن كوتەردى.

«ەلىمىزدىڭ تۇراقتى دامۋى حالىقتىڭ ٴومىر ٴسۇرۋ دەڭگەيىن ودان ٴارى ارتتىرۋعا ۇلكەن ٴۇمىت ۇيالاتادى. قازىرگى ۋاقىتتا حالقىمىزدىڭ سانى 18 ميلليون ادامنان اسىپ، ٴومىر ٴسۇرۋ ۇزاقتىعى 72،5 جاسقا جەتتى. قازاقستان رەسپۋبليكاسىنىڭ پرەزيدەنتى وسى جىلدىڭ 5 قازانداعى قازاقستان حالقىنا جىل سايىنعى جولداۋىندا ٴومىر ٴسۇرۋ دەڭگەيى ٴوسۋىنىڭ نەگىزگى قۇرامداس بولىگى رەتىندە ٴومىر ٴسۇرۋدىڭ ساپاسىن ارتتىرۋ ماسەلەسىنە باسا نازار اۋداردى. پرەزيدەنتىمىز ٴبىلىم بەرۋ، دەنساۋلىق ساقتاۋ، تۇرعىن ٴۇيدىڭ ساپاسى مەن قولجەتىمدىلىگى ماسەلەلەرى، جايلى ٴارى ٴقاۋىپسىز ٴومىر ٴسۇرۋ ماسەلەلەرى - ٴاربىر قازاقستاندىق وتباسىنا قاتىستى بولۋى كەرەك ەكەنىن اتاپ كورسەتتى»، - دەدى ٴايتىموۆا.

سەناتوردىڭ ايتۋىنشا، پەداگوگ قوعامنىڭ «قوزعالتقىشى»، قوعامدىق پروگرەستىڭ كاتاليزاتورى جانە ۇدەتكىش ٴرولىن اتقارادى.

«دارىگەر ادامدى تۋعان كەزدە قارسى الادى، ٴاردايىم اۋىرعان ۋاقىتىندا جانىندا جانە ونى ٴومىر جولىنىڭ سوڭىندا شىعارىپ سالادى. پەداگوگتار مەن دارىگەرلەردىڭ قوعامداعى ماڭىزدى ميسسياcىنا قاراماستان، بۇگىنگى تاڭدا ولاردىڭ كوبىنىڭ ٴومىر ٴسۇرۋ ساپاسى مەن تۇرعىن ٴۇي جاعدايى تومەن دەڭگەيدە قالىپ وتىر نەمەسە ٴوز باسپانالارى مۇلدەم جوق. مۇنداي جاعدايدى تۇبەگەيلى وزگەرتۋىمىز قاجەت»، - دەدى ٴبىرعانىم ٴايتىموۆا.

دەپۋتاتتىڭ مالىمەتىنشە، ەلىمىزدە مۇعالىمدەردىڭ جالپى سانى 285 996 ادامدى، ونىڭ ىشىندە قالادا – 114 627 ادامدى، ال اۋىلدىق جەرلەردە – 171 369 ادامدى قۇرايدى. دەنساۋلىق ساقتاۋ ۇيىمدارىندا جالپى العاندا 247 مىڭنان استام مەديسينا قىزمەتكەرى جۇمىس ىستەيدى. ولاردىڭ 72 ٴ134-ى – دارىگەر، ال 175 246-سى – ورتا مەديسينا قىزمەتكەرلەرى. سونىڭ ىشىندە تىكەلەي دەنساۋلىق ساقتاۋ جۇيەسىندە – 56 570 دارىگەر، 152 591 ورتا مەديسينا قىزمەتكەرى جۇمىس ىستەيدى.

«جالپى رەسپۋبليكامىزدا جارتى ميلليوننان استام ٴمۇعالىم مەن مەديسينا قىزمەتكەرى جۇمىس ىستەيدى، بۇل حالىقتىڭ جالپى سانىنىڭ 3% پايىزىن نەمەسە ەلىمىزدىڭ ەكونوميكالىق بەلسەندى حالقىنىڭ 6% پايىزىن قۇرايدى. 2018 جىلدىڭ 8 مامىرىندا «نۇرلى جەر» باعدارلاماسىنىڭ ىسكە اسىرىلۋىن تالقىلاۋ بارىسىندا سەنات دەپۋتاتتارى ۇكىمەتكە دارىگەرلەر مەن مۇعالىمدەردى قولجەتىمدى تۇرعىن ۇيمەن قامتاماسىز ەتۋ بويىنشا جەكە باعدارلاما ازىرلەۋدى ۇسىندى. «قازاقستان يپوتەكالىق كومپانياسى» اكسيونەرلىك قوعامى باعدارلامانىڭ جوباسىن دا دايىندادى»، - دەدى ٴبىرعانىم ٴايتىموۆا.

سەناتوردىڭ ايتۋىنشا، مۇعالىمدەر مەن دارىگەرلەردى تۇرعىن ۇيمەن قامتاماسىز ەتۋ ماسەلەسىن شەشۋ جولدارىنىڭ ٴبىرى رەتىندە اسكەري قىزمەتشىلەرگە ارنالعان تۇرعىن ٴۇي باعدارلاماسىنا ۇقساس قازاقستاننىڭ تۇرعىن ٴۇي قۇرىلىس جيناق بانكى ىسكە اسىرىپ جاتقان مەحانيزمدى قولدانۋ قاجەت.

«وزىڭىزگە ٴمالىم، 2017 جىلعى 12 جەلتوقساندا اسكەري قىزمەتشىلەردى تۇرعىن ۇيمەن قامتاماسىز ەتۋ جۇيەسىن جەتىلدىرۋ ماقساتىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ٴۇي قاتىناستارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭى قابىلداندى. قۇرمەتتى باقىتجان ٴابدىر ۇلى، جوعارىدا ايتىلعانداردى ەسكەرە وتىرىپ، قازاقستان رەسپۋبليكاسى پرەزيدەنتىنىڭ حالىقتى قولجەتىمدى تۇرعىن ۇيمەن قامتاماسىز ەتۋ جونىندەگى تاپسىرمالارىن ورىنداۋ ٴۇشىن، سىزدەن مۇعالىمدەر مەن دارىگەرلەردىڭ تۇرعىن ٴۇي ماسەلەلەرىن شەشۋ بويىنشا جاڭا الگوريتمدى قاراستىراتىن قازاقستان رەسپۋبليكاسى زاڭىنىڭ جوباسىن ازىرلەۋ جونىندە ٴتيىستى مەملەكەتتىك ورگاندارعا تاپسىرما بەرۋىڭىزدى سۇرايمىز. قۇرمەتپەن، سەنات دەپۋتاتتارى: ٴبىرعانىم ٴايتىموۆا، داريعا نازاربايەۆا»، - دەدى ٴايتىموۆا.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي