BAQ.kz - Қазақстан жаңалықтары USD 369.36 BAQ.kz - Қазақстан жаңалықтары EUR 431.3 BAQ.kz - Қазақстан жаңалықтары RUB 5.45
استانا:

باقىتجان ساعىنتايەۆ ٴوڭىر باسشىلارىنا ەسكەرتۋ جاسادى

فوتو: Qamshy.kz

بۇگىن قر ۇكىمەتىنىڭ وتىرىسىندا پرەمەر-مينيستر باقىتجان ساعىنتايەۆ ەلىمىزدىڭ 2018 ج. سەگىز ايىنداعى الەۋمەتتىك-ەكونوميكالىق دامۋى مەن رەسپۋبليكالىق بيۋدجەتتىڭ اتقارىلۋىنىڭ قورىتىندىلارىن قاراۋ بارىسىندا ورتالىق جانە جەرگىلىكتى مەملەكەتتىك ورگاندارعا ٴبىرقاتار ناقتى تاپسىرمالار بەردى، دەپ حابارلايدى baq.kz اقپارات اگەنتتىگى قازاقستان رەسپۋبليكاسىنىڭ پرەمەر-مينيسترىنىڭ رەسمي سايتىنا سىلتەمە جاساپ.

ۇلتتىق ەكونوميكا ٴمينيسترى ت. سۇلەيمەنوۆتىڭ، قارجى ٴمينيسترى ب. سۇلتانوۆتىڭ باياندامالارىن تىڭداعاننان كەيىن، پرەمەر-مينيستر باقىتجان ساعىنتايەۆ بيۋدجەتتىك قاراجاتتار ەلەۋلى سومادا يگەرىلمەي قالعان مينيسترلىكتەرگە تالاپ قويدى. ماسەلەن، قورعانىس مينيسترلىگىندە رەسپۋبليكالىق بيۋدجەتتەن بولىنگەن، يگەرىلمەگەن قاراجات سوماسى — 15،4 ملرد تەڭگە، مادەنيەت جانە سپورت مينيسترلىگىندە — 11،1 ملرد تەڭگە، اۋىل شارۋاشىلىعى مينيسترلىگىندە — 10،9 ملرد تەڭگە، ىشكى ىستەر مينيسترلىگىندە — 9،5 ملرد تەڭگە، اقپارات جانە كوممۋنيكاسيالار مينيسترلىگىندە — 5،7 ملرد تەڭگە.

«بۇل وتە ۇلكەن قاراجات سوماسى، بۇل اقشاعا كوپتەگەن مەكتەپ، اۋرۋحانا، بالاباقشا سالىپ، جولداردى جوندەۋگە بولادى. بۇل قاراجاتتار ۋاقىتىلى يگەرىلۋى ٴتيىس»، - دەپ پرەمەر-مينيستر، يگەرىلمەگەن قاراجاتتار ۆەدومستۆولاردىڭ تەڭگەرىمىنەن الىنىپ، مەملەكەتتىك جانە سالالىق باعدارلامالاردى ىسكە اسىرۋعا قايتا باعىتتالاتىنىن اتاپ ٴوتتى.

ەكونوميكالىق ٴوسىم كورسەتكىشتەرىنە قول جەتكىزىلمەگەن وڭىرلەرگە دە جەكەلەي نازار اۋدارىلدى.

قىزىلوردا وبلىسىنىڭ اكىمى ق. كوشەربايەۆ 2018 ج. سەگىز ايىندا رەسپۋبليكالىق بيۋدجەت قاراجاتتارى 90%-عا يگەرىلىپ، يگەرىلمەگەن سوما 2،9 ملرد تگ قۇراعانىن مالىمدەدى.

تۇركىستان وبلىسىنىڭ اكىمى ج. تۇيمەبايەۆ 1،9 ملرد تگ سوماسىندا رەسپۋبليكالىق بيۋدجەتتەن بولىنگەن، يگەرىلمەگەن ماقساتتى ترانسفەرتتەر تۋرالى باياندادى.

باتىس قازاقستان وبلىسىنىڭ اكىمى ا. كولگىنوۆتىڭ ايتۋىنشا، جىل باسىنان بەرى ونەركاسىپ بويىنشا تۇراقتى تەرىس ٴمان بايقالاتىنىن اتاپ ٴوتتى. سونىمەن قاتار، ماۋسىم ايىنان باستاپ ونىڭ تەرىس ٴمانى ارتۋدا. رەسپۋبليكالىق بيۋدجەتتەن بولىنگەن ماقساتتى ترانسفەرتتەردىڭ يگەرىلمەۋ سوماسى 1،4 ملرد تگ قۇرادى.

پاۆلودار وبلىسىنىڭ اكىمى ب. باقاۋوۆ وڭىردەگى يگەرىلمەگەن ماقساتتى ترانسفەرتتەر سوماسى 1،3 ملرد تگ قۇراعانىن ايتتى.

سولتۇستىك قازاقستان وبلىسىنىڭ اكىمى ق. اقساقالوۆ 2 ملن تگ استام اينالىمى بار شوب سانى 10 887 بىرلىكتى نەمەسە وبلىستىعى جالپى جۇمىس ىستەپ تۇرعان ٴشوب-تىڭ 38% قۇراعانىن، بۇل جالپى رەسپۋبليكالىق ماننەن 9،9%-عا جوعارى ەكەنىن مالىمدەدى. سونىمەن قاتار، رەسپۋبليكالىق بيۋدجەتتەن بولىنگەن ماقساتتى ترانسفەرتتەردىڭ يگەرىلمەۋ سوماسى 1،3 ملرد تگ قۇرايدى.

اكىم ا. مىرزاحمەتوۆ جامبىل وبلىسىنداعى يگەرىلمەگەن سوما 1،1 ملرد تگ قۇراعانىن جەتكىزدى.

اتالعان ماسەلەنى قاراۋ قورىتىندىسىن شىعارا وتىرىپ، پرەمەر-مينيستر باقىتجان ساعىنتايەۆ اكىمدەرگە اعىمداعى جاعدايعا تالداۋ جاساپ، ەكونوميكالىق ٴوسىمنىڭ ماقساتتى كورسەتكىشتەرىنىڭ ورىندالماۋىنا جول بەرگەن، باسشىلاردىڭ جاۋاپكەرشىلىگىن قاراۋدى تاپسىردى.

«مەملەكەت باسشىسى كەمىندە 4% ٴوسىمدى قامتاماسىز ەتۋ مىندەتىن قويىپ وتىر. الايدا ستاتيستيكالىق دەرەكتەرگە سۇيەنسەك، 8 ايدىڭ قورىتىندىسى بويىنشا ٴوسىم 3،8% قۇرادى. تيمۋر مۇرات ۇلى (سۇلەيمەنوۆ) ٴوز بايانداماسىندا اتاپ وتكەنىندەي، جىل سوڭىنا دەيىن 4% وسىمگە قول جەتكىزۋ ٴۇشىن، بىزگە اي سايىنعى ٴوسىمدى ورتا ەسەپپەن 4%-دان جوعارى دەڭگەيدە قامتاماسىز ەتۋ قاجەت. اتقاراتىن جۇمىس كوپ»، - دەپ ب. ساعىنتايەۆ، قر پرەمەر-مينيسترىنىڭ ٴبىرىنشى ورىنباسارى ا. ٴماميننىڭ ايتۋىنا سايكەس، جۇمىس تامىز ايىنداعى دەمالىستارعا جانە باسقا دا سەبەپتەرگە بايلانىستى كەشەۋىلدەپ قالعانىن اتاپ ٴوتتى.

ايتا كەتۋ كەرەك، قر ۇلتتىق ەكونوميكا مينيسترلىگىنىڭ دەرەكتەرىنە سايكەس، ەلىمىزدىڭ ەكونوميكالىق ٴوسىمىنىڭ تومەندەۋىنە سىرتقى فاكتورلار مەن تۋربۋلەنتتىلىك تە اسەر ەتۋدە.

«ارينە ىشكى جانە سىرتقى قولايسىز فاكتورلار بار، الايدا بۇل تاپسىرمالاردى ورىنداماۋعا سەبەپ ەمەس. بىزدە پرەزيدەنتتىڭ تاپسىرمالارىن ىسكە اسىرىپ، وسى جىلدى تابىستى اياقتاي الاتىنداي بارلىق مۇمكىندىك بار. سوندىقتان دا بۇل ماسەلەگە مۇقيات جاۋاپكەرشىلىكپەن قاراۋدى تاپسىرامىن. اكىمدەرگە جەرگىلىكتى جەرلەردە ٴمان-جايدى انىقتاپ، جۇمىسىن تيىسىنشە اتقارماعان باسشىلاردىڭ جاۋاپكەرشىلىگىن قاراۋدى تاپسىرامىن. قابىلدانعان شارالار مەن تارتىپتىك جازالار تۋرالى اقپاراتتى ٴبىر اپتا مەرزىم ىشىندە پرەمەر-مينيستر كەڭسەسىنە ۇسىنىڭىزدار»، - دەدى پرەمەر-مينيستر.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي