BAQ.kz - Қазақстан жаңалықтары USD 371.31 BAQ.kz - Қазақстан жаңалықтары EUR 419.32 BAQ.kz - Қазақстан жаңалықтары RUB 5.59
استانا:

«سيفرلىق قازاقستان» – جەمقورلىقتىڭ الدىن الۋدىڭ ٴبىر تەتىگى

«تۇيەنىڭ ۇلكەنى كوپىردە تاياق جەيدى» دەگەن ٴسوز بار قازاقتا. سول سەكىلدى قازاق دالاسىنىڭ ۇلان-عايىر كەڭدىگى دە تەحنولوگيانى مەڭگەرۋدە ٴوز كەدەرگىسىن كەلتىرىپ وتىر. ارينە، بۇل التايدان اتىراۋعا دەيىن سوزىلعان كەڭ-بايتاق دالامىزعا دەگەن رەنىشىمىز ەمەس ەكەنى انىق. الايدا، ەلباسىنىڭ تىكەلەي تاپسىرماسىمەن قولعا الىنعان سيفرلاندىرۋ باعدارلاماسى اياسىندا بۇنىڭ دا ٴوز شەشىمىن تاپتىق. بۇگىن سونداي ٴساتتىڭ كۋاسى بولىپ قايتتىق، دەپ جازادى baq.kz ٴتىلشىسى.

استانادان تۋرا 80 شاقىرىم جەردە قازىرگى قوعامدا اۋىل ادامىنا كەرەكتىنىڭ بارلىعى بار، بارلىعى قامتىلعان شاعىن عانا اۋىل بار. ول اۋىلدىڭ اتى - رودينا. ەلىمىزدەگى ەڭ الدىنعى قاتاردا دامىعان بۇل ەلدى مەكەندە 1700-دەن استام حالىق ٴومىر ٴسۇرىپ جاتىر. اقمولا وبلىسى، سەلينوگراد اۋدانىنا قاراستى بولعاندىقتان اۋدان ورتالىعى اقمول كەنتىنەن 100 شاقىرىمعا تاياۋ الىستا ورنالاسقان. ال قازىرگى تاڭدا ٴاربىر قيمىلىڭىز ٴۇشىن، ٴتىپتى ٴار باسقان قادامىڭىز ٴۇشىن انىقتاما الۋ كەرەك. ول ٴۇشىن ٴار ٴبىر ادام اۋدان ورتالىعىنا بارۋعا ٴماجبۇر. بۇل ماجبۇرلىك ەلىمىزدەگى كوپتەگەن اۋىلدا بار دەسەك ارتىق ايتقانىمىز ەمەس.

حالىقتى وسى ماجبۇرلىكتەن قۇتقارۋدىڭ ٴبىر عانا جولى – جاپپاي سيفرلاندىرۋعا كوشىرۋ. ول ٴۇشىن ٴار اۋىلدا ينتەرنەت قولجەتىمدى بولۋى كەرەك. بۇل تۇرعىدا قر اقپارات جانە كوممۋنيكاسيالار ٴمينيسترى داۋرەن ابايەۆ ٴوزىنىڭ ەسەپ بەرۋ كەزدەسۋىندە:

«مەملەكەت باسشىسىنىڭ تاپسىرماسى بويىنشا، «سيفرلىق قازاقستان» مەملەكەتتىك باعدارلاماسىنىڭ ماتىنىنە ونى جۇزەگە اسىرۋ بولىگى بويىنشا ٴبىرقاتار تولىقتىرۋ ەنگىزىلدى. وسىلايشا، باعدارلاما 2018 جىلدان 2022 جىلدارعا دەيىنگى كەزەڭدى قامتي وتىرىپ، ەل ەكونوميكاسىنىڭ تەحنولوگيالىق جاڭعىرۋىنا سەرپىن بەرمەك»، - دەگەن بولاتىن.

جانە وسى ماقساتقا 169 ملرد تەڭگە قاراستىرىلاتىنىن دا ايتقان ەدى.

ال بۇگىن رودينا اۋىلىندا مەملەكەتتىك قىزمەت ىستەرى جانە سىبايلاس جەمقورلىققا قارسى ٴىس-قيمىل اگەنتتىگىنىڭ ۇيىمداستىرۋىمەن ارنايى سەمينار-ترەنينگ ٴوتتى. وندا ماماندار اۋىل تۇرعىندارىنا ەلەكتروندى ۇكىمەت پورتالىن قالاي پايدالانۋ كەرەكتىگىن، قاراپايىم عانا ۇيالى تەلەفون ارقىلى مەكەن-جاي انىقتاماسى، «فورما-2» انىقتاماسى قاتارلى 30-عا جۋىق ٴتۇرلى انىقتامانى قالاي الۋعا بولاتىنىن ٴتۇسىندىرىپ، بۇعان دەيىن تاپسىرىس بەرگەن اۋىل تۇرعىندارىنا ەلەكتروندىق قولتاڭبالارىن تابىس ەتتى.

«مەن بۇگىن وزىمە ەلەكتروندىق قولتاڭبا الدىم. بۇل مەن ٴۇشىن وتە ىڭعايلى بولدى. بىرىنشىدەن، مەنىڭ تۇسىنگەنىم بويىنشا، بارلىعىمىز دا تىركەلۋىمىز كەرەك. بۇل ساندالىپ سون-عا (حقكو) بارىپ، ودان قالسا ٴبىر جاپىراق قاعاز ٴۇشىن اۋدان ورتالىعىنا ات سابىلتىپ جۇرگەننەن جەڭىل. ەكىنشىدەن ۋاقىت پەن اقشاڭدى ۇنەمدەۋگە مول مۇمكىندىك بەرەدى. روديناداعى قاريالاردىڭ اراسىندا ٴبىرىنشى بولىپ مەن ەلەكتروندىق قولتاڭباعا يە بولىپ وتىرمىن. بۇل ارقىلى مەن قالادا وقىپ جاتقان نەمەرەمنىڭ قايدا تىركەلىپ، قاي بانككە قانشا قارجى سالعانىن دا بىلە الادى ەكەنمىن»، - دەيدى ليۋبوۆ ۆلاديميروۆنا ەسىمدى زەينەتكەر.

مەملەكەتتىك قىزمەت ىستەرى جانە سىبايلاس جەمقورلىققا قارسى ٴىس-قيمىل اگەنتتىگىنىڭ ٴتوراعاسى اليك شپەكبايەۆ وسى قىزمەتكە كەلگەننەن كەيىن بارلىق مەملەكەتتىك قىزمەتكەرگە ۇندەۋ جاريالاپ، جەمقورلىقپەن كۇرەسۋدى اركىم وزىنەن باستاۋدى تاپسىرعان. بۇگىنگى شارانىڭ ٴبىر قىرى وسى ماسەلەگە دە كەلىپ تىرەلەدى.

«ەلباسى ٴوز جولداۋىندا حالقىمىزدىڭ سيفرلىق ساۋاتتىلىعىن ارتتىرۋ باعىتى بويىنشا تاپسىرما بەردى. سونىڭ نەگىزىندە اگەنتتىك ٴتيىستى شارالاردى جۇرگىزىپ جاتىر. اگەنتتىك ٴتوراعاسى اليك جاتقامباي ۇلىنىڭ ۇسىنىسىمەن بارلىق مەملەكەتتىك قىزمەتشى ەلەكتروندىق سيفرلىق قولتاڭبانى الدى. بۇگىنگى تاڭدا ٴبىز قۇقىق قورعاۋ ورگاندارىنىڭ، اسكەري سالا ماماندارى، ت.ب. بيۋدجەتتىك سالا قىزمەتكەرلەرىنە قاتىستى وسى جۇمىستى جۇرگىزىپ جاتىرمىز. سوعان وراي ٴىرى قالالاردا، وبلىس ورتالىقتارىندا سيفرلاندىرۋ پروسەسى ٴجۇرىپ جاتىر.

ەندىگى ٴبىزدىڭ مىندەتىمىز - اۋىلدىق جەرلەردەگى تۇرعىنداردى دا قامتۋدى قولعا الۋ. اۋىل تۇرعىندارىن سيفرلاندىرۋدا ٴبىرقاتار قيىندىق بار. مىسالى، ٴقازىر ٴبىز كەلىپ تۇرعان رودينا اۋىلىندا حقكو جوق. سوندىقتان دا ٴبىز بۇگىن حالىققا سيفرلىق قولتاڭبامەن، ەلەكتروندىق پورتالمەن قالاي جۇمىس ىستەۋگە بولاتىنىن، سونىمەن قاتار، ەلەكتروندىق سيفرلىق قولتاڭبانى بەرۋدىڭ ناتيجەسىندە ولاردىڭ كەز كەلگەن مەملەكەتتىك قىزمەتكە جۇگىنۋ بارىسىندا قانداي مۇمكىندىكتەرگە قول جەتكىزۋىنە بولاتىنىن تۇسىندىردىك. ال ٴبىزدىڭ نەگىزگى كوزدەگەن ماقساتىمىزدىڭ ٴبىرى جەمقورلىقتى ازايتۋ. مىسالى، حقكو-عا بارىپ نەمەسە باسقا جەردە مەملەكەتتىك قىزمەت الۋشى مەن مەملەكەتتىك قىزمەتتى ۇسىنۋشى بايلانىسقا تۇسەدى. مۇندايدا جەمقورلىققا جول بەرۋ كوپ كەزدەسەدى. ال سيفرلىق قولتاڭبا ارقىلى مەملەكەتتىك قىزمەتتى تۇتىنۋ بارىسىندا مۇنداي ارەكەتتەرگە جول بەرىلمەيدى»، - دەيدى مەملەكەتتىك قىزمەت دەپارتامەنتى ديرەكتورىنىڭ ورىنباسارى راسۋل مەدەتوۆ.

رودينا اۋىلدىق وكۋرگىنىڭ اكىمى بەللا گازديەۆانىڭ ايتۋىنا قاراعاندا اۋىلدا جۇمىسسىز ادام جوق. بارلىعى دا وزدەرىنە تيەسىلى قىزمەتپەن اينالىسادى. مەكتەپ، اۋرۋحانا، بالاباقشا، مادەنيەت ٴۇي بارلىعى دا جۇمىس ىستەپ تۇر.

«حالىقتىڭ كوبى «رودينا» جشس-دە قىزمەت اتقارادى. بىزگە بارلىق جاعدايدى جاساپ بەرىپ وتىرعان وسى مەكەمە دەۋىمىزگە بولادى. ەلىمىزگە تانىمال «رودينا» ماركاسىمەن ٴسۇت ونىمدەرىن شىعاراتىن بۇل سەرىكتەستىكتە اۋىل تۇرعىندارىنىڭ 70 پايىزى جۇمىس ىستەيدى. بۇل جەردە ٴبىر ناننىڭ باعاسى 40 تەڭگە. اۋىلدا تەك ىسكەر ازاماتتار تۇرادى دەسەم بولادى»، - دەيدى قازاقستاننىڭ 100 جاڭا ەسىمىنىڭ قاتارىنا كىرگەن جاس اكىم.

اۋىلدىڭ ىشكى ينفراقۇرلىمى تۇگەلدەي ورتالىقتاندىرىلعان، اۋرۋحانا اۋىل تۇرعىندارى ٴۇشىن تەگىن، 500 بالاعا ارنالعان مەكتەپتە ٴۇش اۋىلدىڭ بالاسىن قوسقاندا 300-گە جۋىق بالا وقيدى ەكەن. ىشتەي «قازاقستاننىڭ ٴار اۋىلىن ٴدال وسى روديناداي بولسا عوي» دەپ ارمانداپ قويدىق.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي