BAQ.kz - Қазақстан жаңалықтары USD 370.49 BAQ.kz - Қазақстан жаңалықтары EUR 421.06 BAQ.kz - Қазақстан жаңалықтары RUB 5.54
استانا:

اشىمبايەۆ: قازىرگى تاڭدا ىت-تەحنولوگيالار سەرپىندى دامۋدىڭ نەگىزى بولىپ وتىر

وسكەمەن، baq.kz. «نۇر وتان» پارتياسى ٴتوراعاسىنىڭ ٴبىرىنشى ورىنباسارى ماۋلەن اشىمبايەۆ ارنايى ساپارمەن شىعىس قازاقستان وبلىسىنا باردى. ساپار بارىسىندا ول قازاقستان رەسپۋبليكاسى پرەمەر-مينيسترىنىڭ ورىنباسارى اسقار جۇماعاليەۆپەن جانە وبلىس اكىمى دانيال احمەتوۆپەن بىرگە وڭىردە العاش رەت وتكىزىلگەن رەسپۋبليكالىق «digital east – بولاشاققا قادام» ٴىت-فورۋمىنا قاتىستى.

سونداي-اق وبلىستىق مامانداندىرىلعان مەديسينالىق ورتالىققا بارىپ، سيفرلاندىرۋ سالاسىنداعى ٴوڭىردىڭ جەتىستىكتەرىنە نازار اۋداردى.

ەلباسىنىڭ باستاماسىمەن قازىرگى تاڭدا ەلىمىزدە «سيفرلى قازاقستان» باعدارلاماسى تابىستى جۇزەگە اسىرىلىپ جاتقانى بەلگىلى. سوعان وراي بارلىق وڭىردە سيفرلاندىرۋ جۇمىستارى قولعا الىنىپ، جاڭا باستامالارعا باسىمدىق بەرىلۋدە. تاياۋدا عانا ەلوردادا اشىلعان «astana hub» ستارتاپتار تەحنوپاركى وسى باعىتتاعى جۇمىستاردىڭ جاڭا كەزەڭىن باستاپ بەردى.

وسى رەتتە شىعىس قازاقستان وبلىسىنىڭ سيفرلاندىرۋ ٴىسى بويىنشا ايتارلىقتاي ناتيجەلەرگە قول جەتكىزىپ وتىرعانىن اتاپ وتكەن ٴجون. وڭىردە جاستاردىڭ ىت-تەحنولوگياعا دەگەن قىزىعۋشىلىعى دا ۋاقىت وتكەن سايىن ارتىپ كەلەدى. سونداي-اق وبلىستىڭ حالىققا قىزمەت كورسەتەتىن مەكەمەلەرى مەن ٴىرى ٴوندىرىس وشاقتارى دا سيفرلاندىرۋدى جەمىسىن كورىپ وتىر. وسىنداي يگى ىستەردىڭ قورىتىندىسى رەتىندە «digital east – بولاشاققا قادام» ٴىت-فورۋمى ۇيىمداستىرىلىپ، الداعى مىندەتتەر ناقتىلاندى.

فورۋمعا ارنايى قاتىسقان ماۋلەن اشىمبايەۆ مۇنداي باستامالاردىڭ ەل دامۋىندا ماڭىزى زور ەكەنىن ايتتى.

"سيفرلاندىرۋ دەگەنىمىز بۇگىنگى زاماننىڭ باستى تالابى. سوندىقتان ٴقازىردىڭ وزىندە ەلىمىزدە مەملەكەتتىك قىزمەتتىڭ باسىم بولىگى سيفرلى فورماتقا اۋىستىرىلىپ، جاڭا ۇردىستەرگە ساي كورسەتىلۋدە. ٴتىپتى ٴىرى زاۋىتتار مەن ٴوندىرىس ورىندارىندا دا اۋىر جۇمىستار سيفرلى تەحنولوگيانىڭ جەمىسىن كورىپ وتىر. مۇنىڭ بارلىعى ەلباسىنىڭ «سيفرلى قازاقستان» باعدارلاماسىن جۇزەگە اسىرۋدىڭ ناقتى ناتيجەسى ەكەنى ٴسوزسىز. مەملەكەت باسشىسى جاڭا جولداۋىندا دا بۇل سالاعا ەرەكشە ٴمان بەرىپ، يننوۆاسيالىق جانە سەرۆيستىك سەكتورلاردى دامىتۋدىڭ ٴتيىمدى تەتىكتەرىن انىقتاپ بەردى. سونىڭ ناتيجەسىندە بۇگىندە ەلىمىز بويىنشا كوپتەگەن يگى ىستەر جۇزەگە اسىرىلىپ، وسى سالادا بىلىكتى، كاسىبي ماماندار دايارلاۋ ٴىسى قولعا الىندى. بۇگىنگى ٴىت-فورۋمدى دا سونداي تىڭ باستامالاردىڭ يگى ناتيجەسى دەپ قاراستىرۋىمىزعا ابدەن بولادى"، – دەدى ماۋلەن اشىمبايەۆ.

سونداي-اق ول سوڭعى ايلاردا «نۇر وتان» پارتياسىنىڭ ەلباسى، پارتيا ٴتوراعاسىنىڭ تاپسىرماسىنا سايكەس ٴوز قىزمەتىن جاڭعىرتۋ ماقساتىندا اۋىز تولتىرىپ ايتارلىقتاي جۇمىس اتقارىپ جاتقانىن تىلگە تيەك ەتتى. ونىڭ ايتۋىنشا، پارتيالىق جاڭعىرۋ اياسىندا «سيفرلى قازاقستان» باعدارلاماسىن جۇزەگە اسىرۋعا ۇلەس قوسۋ ٴۇشىن پارتيا تاراپىنان ناقتى جوبالار دا قولعا الىنعان. اتاپ ايتقاندا، جاستارعا باعدارلامالاۋ، روبوت تەحنيكالارى جانە 3d مودەلدەۋ نەگىزدەرىن ۇيرەتىپ، سۇرانىسقا يە ماماندىقتاردى يگەرۋگە باعىتتالعان تەگىن 1000 ٴىت-سىنىپ پەن ەرەسەك ازاماتتاردىڭ سيفرلىق ساۋاتتىلىعىن ارتتىرىپ، جاڭا ماماندىق مەڭگەرۋگە مۇمكىندىك بەرەتىن ٴىت-ورتالىقتار اشۋ جوباسى جۇزەگە اسىرىلۋدا.

بۇل باستامالار بۇگىندە ٴوز جەمىسىن بەرىپ وتىر. ٴقازىردىڭ وزىندە ەلىمىز بويىنشا 782 ٴىت-سىنىپ اشىلىپ، 30 مىڭنان استام مەكتەپ وقۋشىلارى ٴبىلىم الۋدا. سونىڭ ىشىندە 277 ٴىت-سىنىپ شىعىس قازاقستان وبلىسىندا اشىلعان. ونىڭ ٴ112-سى قالالىق جەرلەردە اشىلسا، قالعان ٴ165-سى وبلىستىڭ اۋىل-ايماقتارىنا تيەسىلى. بۇل كورسەتكىش بويىنشا كەندى التاي ٴوڭىرى ەلىمىزدە كوش باستاپ تۇر.

وڭىردە اشىلعان 2 ٴىت-ورتالىقتىڭ دا جۇمىسى جوعارى دەڭگەيدە جۇرگىزىلىپ كەلەدى. بۇگىنگە دەيىن بۇل ورتالىقتاردا 544 شىعىسقازاقستاندىق ازامات ٴبىلىمىن جەتىلدىرىپ، جاڭا ماماندىقتاردى مەڭگەرۋگە مۇمكىندىك الدى. وسىنداي جۇمىستاردىڭ ارقاسىندا پارتيا ۇيىمداستىرعان ٴىت-وليمپياداعا قاتىسۋشىلار قاتارىندا شىعىسقازاقستاندىقتاردىڭ كوپ بولعانىنا نازار اۋدارعان ٴجون.

ماۋلەن اشىمبايەۆ مۇنداي باستامالار ەندى 5-10 جىلدان كەيىن ٴوز جەمىسىن بەرەتىنىن، ەڭ باستىسى، جاستارىمىزدىڭ ٴححى عاسىردىڭ ماماندىقتارىن يگەرىپ، باسەكەگە قابىلەتتى بولىپ قالىپتاسۋىنا سەپتىگىن تيگىزەتىنىن ايتتى.

"مۇنداي باستامالاردىڭ ەلىمىزدى جاڭا بەلەستەرگە شىعاراتىنى ٴسوزسىز. ويتكەنى ٴدال قازىرگى تاڭدا ىت-تەحنولوگيالار سەرپىندى دامۋدىڭ نەگىزى بولىپ وتىر. سوندىقتان پارتيالىق جوبالاردى ٴبىر سالاعا عانا ەمەس، بارلىق سالاعا باعىتتالعان جۇمىس دەپ قاراستىرۋىمىز كەرەك. بۇل رەتتە شىعىس قازاقستان وبلىسىنىڭ تاجىريبەسىن ەرەكشە اتاپ وتكەن ٴجون. كەلەسى جىلى وبلىستىڭ بارلىق مەكتەبىندە ٴىت-سىنىپتار اشىلىپ، جاستاردىڭ جاڭا زامان ماماندىقتارى بويىنشا ساپالى ٴبىلىم الۋىنا جاعداي جاسالماق. وبلىستىڭ بۇل بەلسەندىلىگى بۇكىل قازاقستان ٴۇشىن ۇلگى ەكەنى ٴسوزسىز"، – دەدى ماۋلەن اشىمبايەۆ.

سونىمەن قاتار فورۋم بارىسىندا «ۇزدىك ىت-شەشىمدەر مەن ستارتاپ جوبالار» بايقاۋىنىڭ جەڭىمپازدارى ماراپاتتالدى. ەكى كەزەڭنەن تۇرعان بۇل بايقاۋعا 1500 ۇمىتكەر قاتىستى. جوبانىڭ باستى ماقساتى – ٴتيىمدى ىت-شەشىمدەر مەن ستارتاپ باستامالاردى ىرىكتەپ، ولاردىڭ جۇزەگە اسىرىلۋىنا قارجىلاي قولداۋ كورسەتۋ. بۇل رەتتە قاتىسۋشىلاردىڭ دەنى جاستار ەكەنىن جانە ولار نەگىزىنەن الەۋمەتتىك قىزمەتتەردىڭ قولجەتىمدىلىگىن قامتاماسىز ەتەتىن، حالىقتىڭ ٴومىر ٴسۇرۋ ساپاسىن جاقسارتاتىن جوبالاردى ۇسىنعانىن ايتا كەتكەن ٴجون.

بايقاۋعا ارنايى كاسىپورىندار مەن ىت-كومپانيالاردان بولەك، ستۋدەنتتەردىڭ، كوللەدجدەر مەن مەكتەپ وقۋشىلارىنىڭ دا بەلسەندى قاتىسۋى جاستاردىڭ بولاشاقتىڭ ماماندىقتارىن يگەرۋگە دەگەن قۇشتارلىقتارىنىڭ جارقىن كورىنىسى ەكەنىن ايتقان «نۇر وتان» پارتياسى ٴتوراعاسىنىڭ ٴبىرىنشى ورىنباسارى مۇنداي جايتتىڭ كوڭىل قۋانتاتىنىن جەتكىزدى.

سونىمەن قاتار اتالعان فورۋم اياسىندا «سيفرلى شىعىستىڭ جەتىستىكتەرى» اتتى كورمە ۇيىمداستىرىلىپ، سيفرلاندىرۋ ٴىسى بويىنشا شىعىس قازاقستان وبلىسىندا قولعا الىنعان تىڭ يدەيالار كوپشىلىكتىڭ نازارىنا ۇسىنىلدى.

سيفرلاندىرۋ ٴىسى بويىنشا وبلىستا مەديسينا سالاسىندا دا ايتارلىقتاي ناتيجەلەرگە قول جەتكىزىلگەنىن ەرەكشە اتاپ وتكەن ٴجون. ول ٴۇشىن وبلىستىق مامانداندىرىلعان مەديسينالىق ورتالىقتىڭ جۇمىسىن ايتسا دا جەتكىلىكتى. اتالعان نىسانعا ارنايى بارعان ماۋلەن اشىمبايەۆ بۇل جەردىڭ باستى ەرەكشەلىگى سانالاتىن روبوتتاندىرىلعان حيرۋرگيالىق ورتالىقتىڭ جۇمىسىمەن تانىستى.

مۇنداي ورتالىق ەلىمىز بويىنشا العاش رەت وسكەمەندە اشىلىپ وتىر. اتالعان ورتالىقتا يتاليادان اكەلىنگەن senhance transenterix روبوتىنىڭ كومەگىمەن كۇردەلى ەندوسكوپيالىق وتالار جاسالادى. العاشقى وتالار يتاليادان كەلگەن ماماننىڭ جەتەكشىلىگىمەن جاسالعان ەكەن. بيىلعى ناۋرىز ايىندا اشىلعان ورتالىقتا قازىرگە دەيىن 120-دان استام ناۋقاسقا وتا جاسالىپ، تالاي جاننىڭ دەرتىنەن ايىعۋىنا سەبەپشى بولعان.

روبوتتاندىرىلعان حيرۋرگيا وتانىڭ دالدىگىن ارتتىرىپ، جاراقاتتىڭ جەڭىل جانە وپەراسيادان كەيىنگى ەم-دومنىڭ ساپالى بولۋىن قامتاماسىز ەتەدى. سوندىقتان بۇل باستامانى وتاندىق دەنساۋلىق ساقتاۋ جۇيەسىن جاڭعىرتۋداعى اسا ماڭىزدى قادام دەپ اتاۋعا تولىق نەگىز بار.

ورتالىقتىڭ بۇل سالاداعى تاعى ٴبىر باستى جاڭالىعى – مامانداردىڭ ٴبىلىمى مەن بىلىكتىلىگىن ارتتىرۋعا ايرىقشا ٴمان بەرىلۋى. مۇندا دارىگەرلەردىڭ ۇشدەڭگەيلى وقىتۋ باعدارلاماسى بويىنشا ساپالى ٴبىلىم الۋىنا بارلىق جاعداي جاسالعان. ٴتىپتى شەتەلدىڭ وزىق مەديسينالىق ورتالىقتارىنىڭ بىلىكتى ماماندارى ارنايى كەلىپ، جەرگىلىكتى دارىگەرلەرگە 6 بىردەي شەبەرلىك ساباقتارىن وتكىزگەن. ورتالىقتا روبوتتاندىرىلعان حيرۋرگيادان بولەك، ترانسپلانتولوگيالىق جانە سيمۋلياسيالىق بولىمدەر دە ەلگە قىزمەت كورسەتەدى.

ساپار سوڭىندا «نۇر وتان» پارتياسى ٴتوراعاسىنىڭ ٴبىرىنشى ورىنباسارى پارتيانىڭ وبلىستىق اكتيۆىمەن كەزدەسىپ، ەلباسىنىڭ «قازاقستاندىقتاردىڭ ٴال-اۋقاتىنىڭ ٴوسۋى: تابىس پەن تۇرمىس ساپاسىن ارتتىرۋ» اتتى جولداۋى مەن جاقىندا جاريالانعان « ۇلى دالانىڭ جەتى قىرى» ماقالاسىندا ايتىلعان باسىمدىقتاردى جۇزەگە اسىرۋ بارىسىن تالقىلادى. ماۋلەن اشىمبايەۆ ٴوز سوزىندە مەملەكەت باسشىسىنىڭ اتالعان قۇجاتتاردا ايقىنداپ بەرگەن باسىمدىقتارى جۇيەلى سيپاتقا يە ەكەنىن ايتىپ، ولاردى ناتيجەلى ورىنداۋ ٴۇشىن پارتيانىڭ الدىندا تۇرعان باستى مىندەتتەرگە توقتالدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي