BAQ.kz - Қазақстан жаңалықтары USD 368.28 BAQ.kz - Қазақстан жаңалықтары EUR 419.21 BAQ.kz - Қазақстан жаңалықтары RUB 5.59
استانا:

ايدىن قايرۋللايەۆ: جىل سوڭىنا دەيىن قىزىلوردادا سيفرلىق حقكو اشىلادى ەكسكليۋزيۆ

قىزىلوردا، baq.kz ٴتىلشىسى. «ازاماتتارعا ارنالعان ۇكىمەت» مەملەكەتتىك كورپوراسياسىنىڭ قىزىلوردا وبلىسى بويىنشا فيليالىنىڭ ديرەكتورى ايدىن قايرۋللايەۆتى اڭگىمەگە تارتىپ، «سيفرلىق قازاقستان» مەملەكەتتىك باعدارلاماسىنىڭ سىر وڭىرىندە قالاي ىسكە اسىپ جاتقانىن بىلگەن ەدىك.

– ايدىن بوكەنباي ۇلى، قازىرگى تاڭدا ەلىمىزدە جۇزەگە اسىرىلىپ جاتقان «سيفرلىق قازاقستان» باعدارلاماسى اياسىندا بارلىق سالا سيفرلاندىرۋ مۇمكىندىكتەرىن ەنگىزۋگە تالپىنۋدا. دەگەنمەن، بۇگىنگى تاڭدا سيفرلاندىرۋ ۇعىمى كوبىنە وسى «ازاماتتارعا ارنالعان ۇكىمەتتە» ايقىن كورىنىس تاپقانداي. ايتىڭىزشى، ايماقتا سيفرلاندىرۋ قاي دارەجەدە ٴجۇرىپ جاتىر؟

– دۇرىس ايتاسىز، بۇگىندە «ازاماتتارعا ارنالعان ۇكىمەت» مەملەكەتتىك كورپوراسياسى حالىققا قىزمەت كورسەتەتىن بارلىق ورتالىقتاردى ٴبىر جۇيەگە ينتەگراسيالاپ، مەملەكەتتىك قىزمەتتەردىڭ ٴبىرىڭعاي پروۆايدەرىنە اينالدى.

قازىرگى تاڭدا مەملەكتتىك قىزمەت ٴتۇرى كوپ كورسەتىلەتىن ورىن – بۇل «ازاماتتارعا ارنالعان ۇكىمەت» مەملەكەتتىك كورپوراسياسى. كەز كەلگەن قۇجات ٴبىزدىڭ مەكەمەنىڭ قاتىسۋىمەن ورىندالادى. سوندىقتان، بۇل سالا اقپاراتتىق جۇيەنىڭ سوڭعى ۇلگىدەگى ارتىقشىلىقتارىن ەنگىزۋدى قاجەت ەتەدى.

مەملەكەتتىك كورپوراسيا تاراپىنان مەملەكەتتىك قىزمەتتەردى وڭتايلاندىرۋ، زاماناۋي تەحنولوگيالاردى ەنگىزۋ ارقىلى حالىققا ىڭعايلى جاڭا ادىستەردى قولانۋ كەڭىنەن قولعا الىندى. وسىعان سايكەس مەملەكەتتىك ورگاندار مەن ازاماتتاردىڭ اراسىنداعى تىكەلەي بايلانىستى بولدىرماۋ مىندەتى بۇگىندە ٴساتتى جۇزەگە اسىپ كەلەدى. بۇل ٴوز كەزەگىندە سىبايلاس جەمقورلىقتىڭ الدىن الۋدىڭ بىردەن ٴبىر جولى.

كورپوراسيانىڭ الدىندا تۇرعان نەگىزگى مىندەت – بۇل ۇسىنىلاتىن قىزمەتتەردىڭ ساپاسىن قامتاماسىز ەتۋ، اكىمشىلىك كەدەرگىلەردى تومەندەتۋ، مەملەكەتتىك قىزمەتتەر كورسەتۋ پروسەسىنىڭ اشىقتىعىن قامتاماسىز ەتۋ.

بۇگىنگى تاڭدا جەر كاداسترى جانە جىلجىمايتىن مۇلىكتى تەحنيكالىق تەكسەرۋ، مەملەكەتتىك قىزمەت كورسەتۋ، سونداي-اق الەۋمەتتىك تولەمدەردى ۆەدومستۆوارالىق ەسەپتەۋ سەكىلدى بىرنەشە سالا بىرىگىپ، قىزمەت كورسەتۋ اياسىن كەڭەيتتى.

– ٴبىر ارناعا توعىسقان ٴتورت ٴىرى سالانىڭ سيفرلاندىرۋ باعىتىنداعى جۇمىسى ٴبىرىن ٴبىرى قانشالىقتى تولىقتىرادى؟

– ٴبىز وزىمىزگە جۇكتەلگەن مىندەت – مەملەكەتتىك قىزمەتتى كورسەتۋ ٴۇردىسىن ۇنەمى دامىتۋ ۇستىندەمىز. مەملەكەتتىك قىزمەتتەردى وڭتايلاندىرۋ، اۆتوماتتاندىرۋ، اقپاراتتىق جۇيەلەردى ينتەگراسيالاۋ ارقىلى بۇل باعىتتا جەتكەن جەتىستىكتەرىمىز از ەمەس. بۇرىن حالىق «ٴبىر تەرەزە» قاعيداتىنىڭ يگىلىگىن كورسە، بۇگىندە بۇل باعىتتى ودان ٴارى ىقپالداستىرا وتىرىپ، «ٴبىر ٴوتىنىش» قاعيداتىنا قول جەتكىزدىك.

مىسالى، ەلەكتروندىق ۇكىمەت پورتالىندا كاسىپكەرلەردىڭ يگىلىگى ٴۇشىن كومپوزيتتىك قىزمەتى ىسكە قوسىلدى. ەندى جەكە ٴىسىن اشقىسى كەلەتىن ازاماتتار ٴۇش قىزمەتتى بىردەن الا الادى: زاڭدى تۇلعانى تىركەۋ، بانكتىك شوت اشۋ جانە ساقتاندىرۋ تۋرالى كەلىسىم-شارت جاساۋ. بۇل مەملەكەتتىك قىزمەت كورسەتۋ بارىسىندا «ٴبىر ٴوتىنىش» قاعيداتىن قولدانۋدىڭ ۇلگىسى بولىپ تابىلادى.

بۇگىندە جەر قاتىناستارى مەن قۇرىلىس سالالارى - بيزنەس وكىلدەرى مەن جەكە تۇلعالاردى ٴجيى مازالايتىن سىبايلاس جەمقورلىق تاۋەكەلى جوعارى مەملەكەتتىك قىزمەتتەر بولىپ وتىر.

بۇل باعىتتا اكىمشىلىك كەدەرگىلەردى ازايتۋ ماقساتىندا وبلىستا مەملەكەتتىك قىزمەتتەردى اۆتوماتتاندىرۋ مەن وڭتايلاندىرۋ جۇمىستارى قولعا الىنۋدا.

وسى ورايدا، ايماق باسشىسىنىڭ شەشىمىمەن وبلىستىق سيفرلىق تەحنولوگيالار باسقارماسى قۇرىلدى. بۇگىندە ٴبىز وسى باسقارمامەن بىرلەسىپ، ٴبىرقاتار جوبالاردى تالقىلاپ، جۇمىس جاساۋدامىز.

ەلباسى بيىلعى جولداۋىندا 2019 جىلى مەملەكەتتىك قىزمەتتەردىڭ 80 پايىزى ەلەكتروندى فورماتقا كوشۋى ٴتيىس، 2021 جىلى 100 پايىزعا ورىندالۋ كەرەكتىگىن ايتتى. وسى تاپسىرمانى ورىنداۋ باعىتىندا قانداي تىندىرىمدى تىرلىكتەر اتقارىلۋدا؟

– سيفرلاندىرۋ ۇدەرىسىنىڭ كوشباسشىسى رەتىندە مەملەكەتتىك كورپوراسيا ەلىمىزدەگى سيفرلاندىرۋ ىسىنە ىقپال ەتەتىن، ناقتى جوبالارعا باستاماشى بولۋدا.

مەملەكەتتىك رەەستردە 746 قىزمەت بار بولسا، بۇگىنگى تاڭدا سونىڭ ٴ621-ى، ياعني 83 پايىزى ٴبىزدىڭ كورپوراسيا ارقىلى كورسەتىلىپ وتىر. ونىڭ 486-سىن، ياعني 70 پايىزدان استامىن ازاماتتار ۇيدەن شىقپاي، نەمەسە كەڭسەدە وتىرىپ-اق ەلەكتروندى فورماتتا الۋعا مۇمكىندىگى بار. جەرگىلىكتى اتقارۋشى ورگاندارمەن كورسەتىلەتىن 195 قىزمەتتىڭ ٴ94-ى (48%) «ەلەكتروندى ۇكىمەتتىڭ» ۆەب-پورتالى ارقىلى كورسەتىلۋدە.

ايتا كەتەيىك، بيىلعى جىلدىڭ 10 ايىندا حالىققا قىزمەت كورسەتۋ ورتالىقتارى ارقىلى 1 ملن-نان اسا (1 082238) مەملەكەتتىك قىزمەت كورسەتىلسە، ونىڭ تەڭ جارتىسى ەلەكتروندى نۇسقادا كورسەتىلدى. ال، وزىنە-وزى قىزمەت كورسەتۋ «connection point» سەكتورى ارقىلى كورسەتىلگەن قىزمەت وتكەن جىلدىڭ وسى مەرزىمىمەن سالىستىرعاندا 40 پايىزعا ٴوسىپ وتىر. ياعني، حالىق وپەراتوردىڭ كومەگىنسىز مەملەكەتتىك قىزمەتتەردى ٴجيى الادى دەگەن ٴسوز.

ايتا كەتەيىك، جىل باسىنان بەرى ٴموبيلدى ازاماتتار بازاسىنا 200 مىڭعا جۋىق ادام تىركەلىپ، 700 مىڭداي قىزىلوردالىق وزدىگىنەن قىزمەت العان.

– جالپى، مەملەكەتتىك قىزمەت كورسەتۋ سالاسىندا جاعىمدى جاڭالىق كوپ سەكىلدى...

– ارينە، جاڭالىعىمىز كوپ. بۇگىندە «ازاماتتارعا ارنالعان ۇكىمەت» تاراپىنان مەملەكەتتىك قىزمەتتەردى وڭتايلاندىرۋ، زاماناۋي تەحنولوگيالاردى ەنگىزۋ ارقىلى حالىققا ىڭعايلى جاڭا ادىستەردى قولانۋ كەڭىنەن قولعا الىندى. جىل باسىنان بەرى بىرنەشە پيلوتتىق جوبا ىسكە قوسىلىپ، حالىق اراسىندا كەڭىنەن قولداۋ تاپتى.

سولاردىڭ ٴبىرى – پرواكتيۆتى فورماتتا تۋۋ تۋرالى كۋالىك راسىمدەۋ. جوبا اياسىندا ۇستىمىزدەگى جىلدىڭ قاڭتار ايىنان باستاپ «ازاماتتارعا ارنالعان ۇكىمەت» مەمكورپوراسياسى «ۇلتتىق اقپاراتتىق تەحنولوگيالار» اق بىرلەسە وتىرىپ پرواكتيۆتى فورماتتا تۋۋ تۋرالى كۋالىك راسىمدەۋ پيلوتتىق جوباسىن قوسقان بولاتىن. ەلەكتروندىق ۇكىمەت پورتالى بارلىق مالىمەتتەردى ٴتۇرلى مەملەكەتتىك ورگانداردىڭ اقپاراتتىق جۇيەلەرىنەن جيناپ، ال وزگە دەرەكتەردى sms حابارلاما ارقىلى اتا-انادان سۇرايدى. وسىلايشا انا مەن بالا پەرزەنتحانادان شىعام دەگەنشە 2-3 كۇندە بارلىق قۇجاتتار دايىن تۇرادى. ناقتىراق ايتساق، وسى جىلدىڭ 10 ايىندا ٴموبيلدى ازاماتتار بازاسىنا 5816 جۇكتى انا تىركەلدى، 3982 بالانىڭ تۋۋ تۋرالى كۋالىگى راسىمدەلىپ، 2262 سابيگە جاردەماقىلار تاعايىندالدى. سونداي-اق 3488 بالا بالاباقشا كەزەگىنە وسى پرواكتيۆتى قىزمەت ارقىلى قول جەتكىزدى.

ايتا كەتەيىك، قازاقستان تمد ەلدەرى اراسىندا العاشقى بولىپ مەملەكەتتىك قىزمەتتەردىڭ پرواكتيۆتى قاعيداتىن ەنگىزدى. كوپ ۇزاماي بالانى تۇرعىلىقتى جەرىنە تىركەۋ، اسىراۋشىسىنان ايرىلۋ، جۇمىسىنان ايرىلۋ، جۇكتى بولۋ مەن بوسانۋعا بايلانىستى تابىسىنان ايىرىلۋ بويىنشا الەۋمەتتىك تولەمدەر تاعايىنداۋ، «التىن القا» مەن «كۇمىس القا» يەگەرلەرىنە جاردەماقى راسىمدەۋ، مۇگەدەكتىكتى بەلگىلەۋ جونىندەگى قىزمەتتەردى جانە زەينەتاقى تولەمدەرىن تاعايىنداۋعا قاتىستى مەملەكەتتىك كەپىلدىكتەر دە پرواكتيۆتى پرينسيپپەن ۇسىنىلاتىن بولادى.

ٴقازىردىڭ وزىندە، جۇرگىزۋشى كۋالىگىن اۋىستىرۋ مەن كولىك قۇرالىن تىركەۋ مەملەكەتتىك قىزمەتتەرى egov.kz ەلەكتروندىق ۇكىمەت پورتالى ارقىلى ونلاين فورماتتا الىنۋدا. بولاشاقتا قىزمەتتەردى الۋدى جەڭىلدەتۋ ٴۇشىن بيومەتريالىق دەرەكتەر قولدانىلاتىن بولادى. ياعني، ادامنىڭ تۇلعاسىن راستاۋ كەزىندە بەت كەلبەتى مەن ساۋساق بەدەرى ارقىلى قىزمەت كورسەتىلەدى دەگەن ٴسوز.

ٴبىرقاتار مەملەكەتتىك قىزمەتتەر تانىمال telegram الەۋمەتتىك جەلىسى ارقىلى الۋ جولدارى قاراستىرىلعان.

telegram-بوت ارقىلى مەكەنجاي، جىلجىمايتىن مۇلىكتىڭ بار-جوقتىعى، سوتتالعان-سوتتالماعانى تۋرالى انىقتامالاردى سۇراتۋعا بولادى. ودان بولەك ەمحاناعا تىركەلۋ، دارىگەر قابىلداۋىنا جازىلۋ، دارىگەردى ۇيگە شاقىرۋ جانە حالىققا قىزمەت كورسەتۋ ورتالىقتارىنا كەزەك برونداۋ جانە باسقا دا كوپتەگەن قىزمەتتەر قولجەتىمدى.

جاقىندا مەملەكەتتىك قىزمەتتەردى قاشىقتىقتا ونلاين تارتىپتە ۇسىنۋ جوباسىن ىسكە قوسىلدى. بۇگىندە 20 مەملەكەتتىك قىزمەتتى ۆيدەوبايلانىس ارقىلى الۋعا بولادى. مۇنداي قىزمەتتەر ازاماتتاردى حقكو بارۋ مىندەتىنەن بوساتىپ، ۋاقىتتارىن ۇنەمدەپ قانا قويمايدى، سونداي-اق قاعاز جۇزىندەگى قۇجات اينالىمىن قىسقارتادى.

ەلباسى ٴوز جولداۋىندا جەرقورى مەن جىلجىمايتىن مۇلىك نىساندارى تۋرالى مالىمەتتەردىڭ ٴبىرىڭعاي اقپاراتتىق بازاسىن جاساۋدى تاپسىردى.

وسىعان وراي، جەر قاتىناستارى، ساۋلەت جانە قۇرىلىس سالاسىنداعى سيفرلاندىرىلعان باس جوسپارلاردى، ينجەنەرلىك كوممۋنيكاسيالاردى جانە ونلاين قىزمەتتەردى كورسەتۋدى ورنالاستىرۋ ارقىلى ۇلتتىق گەواقپاراتتىق جۇيەسىنىڭ جاريالىق كارتاسىندا بوس جەر تەلىمدەرى بويىنشا پيلوتتىق جوبانى وبلىستا ىسكە قوسۋ جوسپارلانىپ وتىر.

قازىرگى تاڭدا پيلوتتىق جوبانى جۇزەگە اسىرۋ ماقساتىندا وبلىس اكىمدىگى جانىنان جۇمىسشى توبى قۇرىلىپ، ٴتيىستى جۇمىستار جۇرگىزىلۋدە.

ايتا كەتەيىك، كەي جاعدايلاردا جەر تەلىمدەرىن راسىمدەۋ ٴۇشىن 6 ايعا، كەيدە 1 جىلعا ۋاقىت جۋىق كەتەدى. ەگەر ۇلتتىق گەواقپاراتتىق جۇيەسىنىڭ (نگيس) جاريالىق كارتاسى ارقىلى جەر تەلىمدەرىن تابىستاۋ بويىنشا پيلوتتىق جوباسى ىسكە اسسا قىزمەت كورسەتۋ مەرزىمىن 1 جىلدان 20-30 كۇنگە دەيىن قىسقارتۋعا مۇمكىندىك بار جانە بۇل 100 پايىزعا دەيىن قاعاز نۇسقاداعى قۇجات اينالىمدى جويادى.

بۇگىنگى تاڭدا جەر ۋچاسكەلەرىن راسىمدەۋ سالاسى بويىنشا باسقا دا مەملەكەتتىك قىزمەتتەردى كورسەتۋ ٴتارتىبى وڭتايلاندىرىلىپ، مەرزىمى قىسقاردى.

سونىمەن قاتار، ەلەكتروندى ۇكىمەت باعدارلاماسىن ورىنداۋ ماقساتىندا جىلجىمايتىن مۇلىكتەردى تىركەۋ سالاسى بويىنشا بارلىق انىقتامالاردى ەلەكتروندى تۇردە الۋعا قول جەتكىزىلدى.

– ايدىن بوكەنباي ۇلى، فيليال تاراپىنان اتقارىلىپ جاتقان يگى ىستەردىڭ اۋقىمىن اڭعاردىق. جاڭالىق قاشاندا قالادان باستاۋ الاتىنى راس. ال اۋىل تۇرعىندارىنىڭ ٴسىز ايتىپ وتىرعان جاڭاشىلدىقتاردى قابىلداۋ دەڭگەيى قانشالىقتى؟ جالپى ايماق حالقىنىڭ سيفرلىق ساۋاتتىلىعى تۋرالى نە ايتار ەدىڭىز؟

– جىل باسىندا حالىقتىڭ سيفرلىق ساۋاتتىلىعىن ارتتىرۋ ماقساتىندا وبلىستىق اكىمدىكپەن بىرگە ٴىس-شارالار جوسپارى جاسالىپ، 20 مىڭنان اسا قىزىلوردالىق قىسقامەرزىمدى وقىتۋ كۋرستارىمەن قامتىلدى.

فيليالمەن تۇراقتى تۇردە اكىمدىكتەرمەن، مەملەكەتتىك ورگاندارمەن بىرلەسىپ، وقۋ ورىندارىندا، ادام كوپ شوعىرلاناتىن جەرلەردە، مەنشىك نىسانىنا قاراماستان وبلىس بويىنشا 3300-گە جۋىق ەڭبەك ۇجىمدارىندا ەلەكتروندى قىزمەتتەردى الۋ جولدارى جان-جاقتى ناسيحاتتالدى. تۇسىندىرمە جۇمىستارى وقۋ ورىندارىندا دا ۇيىمداستىرىلۋدا. بۇل باعىتتا جىل باسىنان 2 600-دەن اسا ٴىس-شارا وتكىزىلىپ، وعان 50 مىڭعا جۋىق ادام قامتىلدى.

ٴبىزدىڭ ماماندار شالعاي اۋىلدارعا بارىپ تۇرعىندارىمەن كەزدەسۋ ۇيىمداستىرىپ، وندا ەلەكتروندى ۇكىمەت پورتالى ارقىلى كورسەتىلەتىن مەملەكەتتىك قىزمەتتەرگە توقتالىپ، ولاردى قالاي الۋعا بولاتىنىن ۇيرەتۋدى جالعاستىرىپ كەلەدى. اۋىل تۇرعىندارىنا مەملەكەتتىك قىزمەتتەردىڭ قول جەتىمدىلىگىن قامتاماسىز ەتۋ، ازاماتتاردىڭ اۋدان ورتالىعىنا جول جۇرۋگە بايلانىستى شىعىندارىن قىسقارتۋ جانە ۋاقىتتى ۇنەمدەۋ ماقساتىندا سوڭعى ۇلگىدەگى قۇرىلعىلارىمەن جابدىقتالعان ٴموبيلدى حالىققا قىزمەت كورسەتۋ ورتالىقتارى شالعاي ەلدى مەكەندەرگە شىعىپ، مەملەكەتتىك قىزمەتتىڭ بارلىق ٴتۇرىن تولىققاندى كورسەتىپ جاتىر.

ٴموبيلدى حقكو ەلدى-مەكەندەرگە سول اۋىلدىڭ اكىمدىكتەرىمەن الدىن الا كەلىسىلگەن كەستە بويىنشا شىعۋدا.

– وتە ورىندى ەكەن. ال مۇمكىندىگى شەكتەۋلى جاندارعا قانداي جاعدايلار قاراستىرىلعان؟

– «ازاماتتارعا ارنالعان ۇكىمەت» مەملەكەتتىك كورپوراسياسى» ارقىلى مەملەكەتتىك قىزمەت كورسەتۋ كەزىندە مۇمكىندىكتەرى شەكتەۋلى ازاماتتارعا قولجەتىمدىلىگىن ارتتىرۋعا ەرەكشە نازار بولىنەدى. اتاپ ايتساق، كورپوراسيانىڭ فرونت-وفيستەرىندە اربادا وتىرعان مۇگەدەكتەرگە ارنالعان پاندۋستار مەن شاقىرۋ تەتىگى، برايل ماتىنىمەن اقپاراتتىق تاقتايشالار، زاعيپ جاندارعا ارنالعان تاكتيل جولدارى ورنالاستىرىلعان.

ودان بولەك، 1 جانە 2-توپ مۇگەدەكتىگى بار ادامدار «ەلەكتروندىق ۇكىمەت» پورتالىنىڭ 1414 ٴبىرىڭعاي بايلانىس ورتالىعى ارقىلى مەملەكەتتىك قىزمەتتەردى ۇيلەرىندە الىپ وتىر. قوڭىراۋ ارقىلى تاپسىرىس بەرگەننەن كەيىن مەملەكەتتىك كورپوراسيانىڭ قىزمەتكەرلەرى بۇل ازاماتقا 72 ساعات ىشىندە بارادى.

سونداي-اق، مۇگەدەكتەردىڭ كومپوزيتتىك قىزمەتتەردى الۋ مۇمكىندىگى كوزدەلگەن. مىسالى، ازامات مۇگەدەكتىك توبىن الۋ ٴۇشىن كوميسسيادان وتكەندە، ونىڭ باسقا ەش جەرگە بارۋىنىڭ قاجەتى جوق. ادىلەت مينيستىرلىگىنىڭ اقپاراتتىق جۇيەسى مەن ورتالىقتاندىرىلعان مۇگەدەكتىك دەرەكتەر قورىن ىقپالداستىرۋدىڭ ناتيجەسىندە قۇجاتتار ونلاين رەجيمىندە مەملەكەتتىك كورپوراسياعا بەرىلەدى. مۇندا بارلىق جاردەماقى تۇرلەرىنىڭ تولەمى تاعايىندالىپ، ونىڭ تولەنۋى دە ۇيىمداستىرىلادى. ٴوتىنىش قابىلداۋ كەزىندە قاعاز جۇزىندەگى قۇجات اينالىمى تولىق الىپ تاستالعان، ال جەكە باسىن كۋالاندىراتىن قۇجات جونىندەگى، تۇرعىلىقتى جەرى بويىنشا تىركەلۋى تۋرالى مالىمەتتەردى ەلەكتروندىق ۇكىمەت ٴشليۋزى ارقىلى جەكە تۇلعالاردىڭ مەملەكەتتىك دەرەكتەر قورىنىڭ اقپاراتتىق جۇيەسىنەن الادى.سونىمەن قاتار، بىلتىردان باستاپ «ازاماتتارعا ارنالعان ۇكىمەت» مەملەكەتتىك كورپوراسياسى ەستۋ جانە سويلەۋ قابىلەتى ناشار ازاماتتارعا مەملەكەتتىك قىزمەت كورسەتۋ بويىنشا جاڭا قىزمەت تۇرىمەن تولىقتى. ەندى بۇل ادامدارعا ىم-يشارات ٴتىلىنىڭ كاسىبي مامانى ارنايى قوسالقى مونيتوردان ناقتى ۋاقىت رەجيمىندە سۋردواۋدارما ۇسىناتىن بولادى.

– الداعى جوسپارلارىڭىزبەن بولىسە وتىرساڭىز؟

– جىل سوڭىنا دەيىن سيفرلىق حالىققا قىزمەت كورسەتۋ ورتالىعىن اشۋدى جوسپارلاپ وتىرمىز. قازىرگى تاڭدا بۇل ماسەلە ورتالىق اپپاراتتا قارالىپ جاتىر.

بۇل ورتالىقتىڭ ەرەكشەلىگىن ايتا كەتەيىن. ول تولىق اۆتوماتتاندىرىلعان جانە وندا ازاماتتار قىزمەتتەردى وزدىگىمەن وپەراتوردىڭ قاتىسۋىنسىز الادى. ورتالىقتا ٴوز وزىنە قىزمەت كورسەتۋ سەكتورى «connection point» جانە ارنايى ستەند-پاۆيلونداردا پلانشەتتەر ورناتىلادى.

سونىمەن قاتار، مۇندا ازاماتتاردىق سيفرلىق ٴبىلىمىن جەتىلدىرۋ سىنىپتارى جۇمىس ىستەيدى. كەز كەلگەن ادام وسى سىنىپتاردا ەلەكتروندى پورتالمەن جۇمىس جاساپ ۇيرەنە الادى.

سونداي-اق، جىل سوڭىنا دەيىن ميگراسيالىق قىزمەت كورسەتۋ ورتالىعىن اشۋ كوزدەلۋدە. شەتەلدەن كەلگەن ازاماتتار بۇعان دەيىن سالىق ماسەلەسىمەن، جسن مەن مەديسينالىق انىقتاما الۋ ٴۇشىن بىرنەشە جەرگە بارىپ، 5-6 كۇنىن جوعالتاتىن.
ەندى ەڭبەك ميگرانتتارى «ٴبىر تەرەزە» قاعيداسى بويىنشا قاجەتتى قىزمەت تۇرلەرىن الا الادى. بۇل ٴوز كەزەگىندە جۇمىس بەرۋشىگە دە قولايلى. سىبايلاس جەمقورلىقتىڭ الدىن الۋعا دا مۇمكىندىك بەرەدى.

– مازمۇندى سۇحباتىڭىزعا راحمەت!

فوتو: اۆتور


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي