BAQ.kz - Қазақстан жаңалықтары USD 367.06 BAQ.kz - Қазақстан жаңалықтары EUR 416.17 BAQ.kz - Қазақстан жаңалықтары RUB 5.56
استانا:

اگروسالانى سيفرلاندىرۋ: قاراعاندى وبلىسىندا ونىمدىلىك 50% ارتتى

قاراعاندى، baq.kz ٴتىلشىسى. بيىل قاراعاندى وبلىسىنىڭ ەگىن القاپتارىنا العاش رەت سيفرلاندىرۋ جۇيەسى بويىنشا ناقتى ەگىنشىلىك تەحنولوگياسى ەنگىزىلدى. سىناق تۇرىندە ەگىلگەن القاپتان ٴار گەكتارىنان 40-50 سەنتنەردەن استىق جينالعان. بۇل باسقا القاپتارداعى ونىمنەن ەكى ەسەگە كوپ.

«اۋىل شارۋاشىلىعىن سيفرلاندىرۋ» باعدارلاماسى بويىنشا ناقتى ەگىنشىلىك ادىستەرى قازاقستاننىڭ ٴتورت ايماعىنداعى توعىز شارۋا قوجالىقتىڭ ەگىس القاپتارىنا پيلوتتىق رەجيمدە قولدانىلدى. قاراعاندىدا زاماناۋي ساندىق تەحنولوگيا وساكاروۆ اۋدانىنداعى «نايدوروۆسكوە» جشس مەن نۇرا اۋدانىنىڭ «شاحتەرسكوە» جشس-دا جۇزەگە اسىرىلىپ، ەگىستىك القاپتارىن وزىق تەحنولوگيامەن سيفرلاندىرۋ جۇيەسى ٴوزىنىڭ تيىمدىلىگىن كورسەتتى. كۇزدە ديقاندار ٴار گەكتاردان 40-60 سەنتنەردەن بيداي جيناعان. بۇل دەگەنىڭىز - ونىمدىلىك ەلۋ پايىزعا ارتتى دەگەن ٴسوز.

«ٴبىزدىڭ شارۋا قوجالىقتىڭ ەگىس القاپتارىنا سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ عالىمدارى ناقتى ەگىنشىلىك تەحنولوگياسىن قولدانىپ جاتىر. بۇل - وڭاي شارۋا ەمەس. بيىلعى جىلى العاشقى قادامدار جاسالدى. عالىمدار جەردەن سىناما الىپ، بىزگە قاي جەرگە قانداي ٴونىم ەگۋگە بولاتىنىن جانە تاعى دا باسقا ۇسىنىستارىن ايتتى. سىناق تۇرىندە وسىرىلگەن القاپتاردا بيداي جاقسى ٴوستى. ٴار گەكتاردان شامامەن 50 سەنتنەردەن ٴونىم الدىق. ال باسقا القاپتاردان ٴبىز ٴبىر گەكتاردان 20-25 سەنتنەر ٴونىم جينايمىز»، - دەيدى «نايدوروۆسكوە» جشس ديرەكتورى پاۆەل لۋششاك.

وساكاروۆ اۋدانىنداعى «نايدوروۆسكوە» القاپتارىندا بيدايدىڭ قاتتى جانە جۇمساق سورتتارىنان باسقا زىعىر، جاسىمىق، كۇنباعىس، ارپا، ٴبورىبۇرشاق جانە باسقا دا داقىلدار وسىرىلەدى. بۇرىن بارلىق القاپتان ٴبىر عانا سىناما الىنىپ، زەرتحاناعا جىبەرىلىپ، قورىتىندىسى الىناتىن. ال ناقتى ەگىنشىلىك تەحنولوگياسى بويىنشا سىناما ٴاربىر گەكتاردان الىنادى. عالىمدار وسى سىنامالاردىڭ قورىتىندىسى بويىنشا قاي جەردىڭ اۋماعى قانشا تىڭايتقىشتى قاجەت ەتەتىنىن، قانداي داقىلدار قاي جەردە جاقسى وسەتىنىن جانە ٴونىمدى كوبىرەك بەرەتىنىن انىقتايدى. ناقتى ٴبىر القاپقا قاجەتتى تىڭايتقىشتاردىڭ، تۇقىمنىڭ جانە باسقا رەسۋرستاردىڭ كولەمى ٴدال ەسەپتەلەدى. وسىلايشا، سپۋتنيكتىك جانە كومپيۋتەرلىك تەحنولوگيالاردى پايدالانۋ ارقىلى ارتىق شىعىن جۇمسالىنباي، ەگىننىڭ ونىمدىلىگىن ارتتىرۋعا مۇمكىندىك بار.

«ەگىس القاپتارىنىڭ 550 گەكتار جەرىن ناقتى ەگىنشىلىك تەحنولوگياسىنا ٴبولىپ، القاپتارعا «اۆستريالىق دۋرۋم» سۇرىپتى بيداي تۇقىمى ەگىلدى. ساراپتامالار «اۋىل شارۋاشىلىعىن سيفرلاندىرۋ» باعدارلاماسى اياسىندا تەگىن جاسالدى. القاپتاردا اۋا تەمپەراتۋراسى مەن جەلدىڭ جىلدامدىعىن، توپىراقتىڭ تەمپەراتۋراسى مەن ىلعالدىلىعىن كورسەتىپ تۇراتىن مەتەوستانسيالار ورناتىلدى. وسى شارالار وسىمدىكتەردىڭ دەرتكە شالدىققانىن، ارامشوپتەردىڭ ٴوسۋى سياقتى جاعدايلاردى دا قاداعالاۋعا مۇمكىندىك بەرەدى»، - دەيدى پاۆەل لۋششاك.

ساندىق تەحنولوگيا ەڭبەك ونىمدىلىگىن ارتتىرىپ عانا قويماي، شارۋا قوجالىعىنىڭ باسشىسىنا جانارماي مەن تىڭايتقىشتارعا كەتەتىن قارجىنى ۇنەمدەۋگە مۇمكىندىك بەرگەن.

«وسى ٴتاسىل ارقىلى ٴونىمنىڭ وزىندىك قۇنىن جوعالتپاي، ماتەريالدىق شىعىندارعا قارجى از جۇمساۋ ارقىلى ونىمدىلىكتى ۇلعايتۋعا مۇمكىندىك تۋدى. استىقتى يتاليا مەن اۆستريا ەلدەرىنە، ياعني ەۋروپاعا ەكسپورتتاۋدى جوسپارلاپ وتىرمىز. قازىرگى ۋاقىتتا بيدايعا وسى ەلدەردەن سۇرانىس بار. «اۆستريالىق دۋرۋم» سورتى جۇمساق سورتتى بيداي تۇقىمدارىنا قاراعاندا قىمباتىراق. جالپى بيدايدىڭ قاتتى سورتىن ٴوسىرۋ بارلىعىمىزعا دا ٴتيىمدى. ەلىمىزدىڭ سولتۇستىك ايماقتارىمەن باسەكەگە تۇسپەيمىز»، - دەيدى «نايدوروۆسكوە» جشس ديرەكتورى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي