USD 335.71 EUR 357.36 RUB 5.23
استانا:

تالدىقورعاندا 2016 جىلدىڭ كوشباسشىلارى ماراپاتتالدى

بۇگىن قازاقستان رەسپۋبليكاسى تۇڭعىش پرەزيدەنتى كۇنى مەن تاۋەلسىزدىكتىڭ 25 جىلدىعىنا وراي تالدىقورعانداعى «جاستار» سپورت سارايىندا الماتى وبلىسى اكىمىنىڭ جىل سايىنعى «كوشباسشى – 2016» سىيلىعى سالتاناتتى تۇردە تاپسىرىلدى. بۇل سىيلىق ٴار ٴتۇرلى سالادا بەلسەندى ەڭبەك ەتەتىن جاستاردى ىنتالاندىرۋ ماقساتىندا بەرىلەدى، دەپ حابارلايدى الماتى وبلىسى اكىمىنىڭ ٴباسپاسوز قىزمەتى.

سالتاناتتى جيىنعا قاتىسۋشىلاردى الماتى وبلىسىنىڭ اكىمى اماندىق باتالوۆ قۇتتىقتادى. ول ٴوز سوزىندە مەملەكەت قولداۋىنىڭ ارقاسىندا جاستارعا بارلىق مۇمكىندىكتەر جاسالىپ وتىرعانىن، سوندىقتان جاستاردىڭ ەڭ باستى مىندەتى جاقسى وقىپ، ەڭبەكتەنۋدەن شارشاماي، العا قاراي ۇمتىلۋ ەكەنىنە توقتالىپ ٴوتتى.

- سىزدەردىڭ ٴارقايسىلارىڭىز دا الەمدەگى ەڭ اقىلدى، ەڭ تالاناتتى ادامسىزدار. كەيدە وزگەلەر الدەقايدا تالانتتى سياقتى كورىنگەنىمەن، ٴبارى ٴوز قولدارىڭىزدا ەكەنىن ۇمىتپاڭىزدار. جاستاردىڭ جالىندى ەنەرگياسى، باتىل شەشىمدەرى، جارقىن يدەيالارى، ماقساتقا جەتۋدەگى تاباندىلىقتارى قوعام ٴۇشىن ٴارقاشان قۇندى. بۇگىن ٴبىز ٴوز تالانتتارىن دۇرىس باعىتتاپ، ٴتۇرلى سالادا بيىك جەتىستىكتەرگە جەتىپ جۇرگەن، ٴوز ىسىندە كوشباسشى بولا بىلگەن جاستاردى ماراپاتتاعالى وتىرمىز. بۇل – ۇلكەن جەتىستىك. سىزدەردى بۇگىنگى ماراپاتتارىڭىزبەن شىن جۇرەكتەن قۇتتىقتايمىن. بۇدان كەيىن دە بيىك شىڭداردى باعىندىرىپ، ۇلت كوشباسشىسىمەن بىرگە جاڭا جەڭىستەرگە جەتە بەرىڭىزدەر! – دەدى ا. باتالوۆ.

وبلىس اكىمى قۇتتىقتاۋ سوزىنەن كەيىن جاستار سىيلىعىنىڭ جەڭىمپازدارىنا ديپلومدار مەن اقشالاي سىيلىقتاردى تابىس ەتتى.

ماسەلەن، «ۇزدىك جاس جۋرناليست» نوميناسياسىندا «قازاقپارات» حالىقارالىق اقپارات اگەنتتىگىنىڭ جانە «31» تەلەارناسىنىڭ مەنشىكتى ٴتىلشىسى سامال قابىشەۆا، «ۇزدىك جاس ونەرپاز» اتالىمىندا «تالدىقورعان اۋەندەرى» فولكلورلىق-ەتنوگرافيالىق ٴان-بي ٴانسامبلىنىڭ جەكە داۋىستاعى ٴانشىسى مادي مۇسافيروۆ جۇلدەگەر بولسا، مۇمكىندىگى شەكتەۋلى جاندارعا ارنالعان «اسار» فيتنەس-كلۋبىنىڭ ديرەكتورى ەلدوس بايالىشبايەۆ «ۇزدىك جاس كاسىپكەر»، ۇيعىر اۋدانى شونجى اۋىلدىق وكرۋگىندەگى مال دارىگەرلىك پۋنكتىنىڭ مال دارىگەرى ارداق ايتبايەۆ «ۇزدىك جاس اۋىل شارۋاشىلىعىنىڭ مامانى»، ٴى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتى زاڭ فاكۋلتەتىنىڭ اعا وقىتۋشىسى تيمۋر جۇماعۇلوۆ «ۇزدىك جاس عالىم»، پانفيلوۆ اۋدانى اباي اتىنداعى مەكتەپتىڭ اعىلشىن ٴتىلى ٴپانىنىڭ ٴمۇعالىمى ۇلدانا بەگىمبەكوۆا «ۇزدىك جاس ۇستاز»، الاكول اۋدانىنداعى № 26 ٴورت ٴسوندىرۋ ٴبولىمىنىڭ ٴورت ٴسوندىرۋشىسى ەرسۇلتان سەيداحمەت ۇلى «جاس باتىر» اتاندى.

2016 جىلدىڭ جاڭا كوشباسشىلارى اتانعان ٴارتۇرلى سالانىڭ 17 جاس مامانى جينالعان كوپشىلىكتى الداعى مەملەكەتتىك مەرەكەلەرمەن قۇتتىقتاپ، وزدەرىنە كورسەتىلگەن قولداۋلار ٴۇشىن زور ريزاشىلىقتارىن ٴبىلدىردى.

شارا سوڭىندا تانىمال قازاقستاندىق ەسترادا انشىلەرىنىڭ كونسەرتى ۇسىنىلدى.

جالپى، جاستار سىيلىعى جىل سايىن 17 نوميناسيا، اتاپ ايتقاندا،«ۇزدىك جاس مەملەكەتتىك قىزمەتكەر»، «ۇزدىك جاس ساياساتكەر»، «ۇزدىك جاس ونەرپاز»، «ۇزدىك جاس كاسىپكەر»، «ۇزدىك جاس سپورتشى»، «ۇزدىك جاس اۋىل شارۋاشىلىعىنىڭ مامانى»، «ۇزدىك جاس اسكەري قىزمەتكەر»، «ۇزدىك جاس عالىم»، «ۇزدىك جاس مامان»، «ۇزدىك جاس دارىگەر»، «ۇزدىك جاس ۇستاز»، «ۇزدىك ەرىكتى»، «ۇزدىك ستۋدەنت»، «جاس باتىر»، «ۇزدىك جاس جۋرناليست»، «ۇزدىك «جاسىل ەل» ساربازى»، «جاس ۇلان» ٴبىرىڭعاي بالالار مەن جاسوسپىرىمدەر ۇيىمىنىڭ ۇزدىك كوشباسشىسى» اتالىمدارى بويىنشا وتەدى.

سسىلكي پو تەمە:
01 جەلتوقسان 2016, 20:04
"ەۋرازيا بارىسى 2016"
كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي