USD 335.61 EUR 361.32 RUB 5.26
استانا:

1991 جىلى «تاۋەلسىزدىك تۋرالى» زاڭ قالاي تالقىلاندى؟

بيىل قازاقستان تاۋەلسىزدىگىنىڭ 25 جىلدىعى. ال، قاتەرلى وتكەل كەزەڭىندە ازاتتىقتىڭ باستاۋى «تاۋەلسىزدىك تۋرالى» زاڭنىڭ تالقىلاۋىنان باستالعان. ٴبىراق، سوۆەتتەر وداعى تارقاپ كەتكەن سوڭ دا، ەلىمىزدىڭ تاۋەلسىزدىگىنىڭ جاريالانۋى كەشەۋىلدەپ قالعانى بارشاعا ايان. سول كەزدەگى جاعداي قانداي ەدى، زاڭ قالاي تالقىلاندى دەگەن ساۋالدارعا بولات ٴمۇرسالىم جاۋاپ ىزدەپ كورگەن ەدى.

بولات ٴمۇرسالىم، ٴتىلشى:

- الماتى تاۋەلسىزدىكتىڭ التىن بەسىگى دەپ پافوسپەن ايتساق، سول كەزدە جوعارعى كەڭەستىڭ سەسسياسى وتكەن بۇل عيمارات تاۋەلسىزدىكتىڭ كىندىگىن كەسكەن جەر. 91 جىل، 16 جەلتوقسان، تاڭەرتەڭ ەرتە دەپۋتاتتار زاڭدى تالقىلاۋعا اسىعىپ كەلە جاتتى.

اسىعاتىنى – 8 جەلتوقساندا كسرو تاراعان، وداقتا قازاقستان جاپادان جالعىز قالعان. كوزىقاراقتى ەل، اسىرەسە جاستار بۇعان نامىستانىپ شۋلاپ جاتتى.

دوس كوشىم، ساياساتكەر:

- ستۋدەنتتەر ٴالى ەسىمدە. الاڭعا شىعىپ، ٴتىزىلىپ تۇردى. مىناۋ باياعى پەتەربۋرگتەگى دەكابريستەردىڭ شىققانى سياقتى. كۇندە شىعىپ ايقايلاپ تۇرادى: "سۋۆەرينيتەت، سۋۆەرينيتەت" دەپ.

كەشىگۋدىڭ سەبەبى – وداق ساقتالا ما دەگەن ٴۇمىت، پارلامەنت سەسسياسىنىڭ كەش باستالۋى ٴارى سايلاۋدىڭ ٴوتۋى.

سەرىكبولسىن ٴابدىلدين، قر جوعارعى كەڭەسىنىڭ 1990-94 ج.ج. ٴتوراعاسى:

- 1 جەلتوقسانعا پرەزيدەنتتىڭ سايلاۋىن قويدىق. ەندى پرەزيدەنتتىڭ سايلاۋى ٴجۇرىپ جاتقاندا تاعى دا الگى ەگەمەندىك قابىلداۋ ٴۇشىن جوعارعى كەڭەستى شاقىرىپ، سەسسيا وتكىزۋدىڭ ٴوزى قولايسىز بولدى.

«تاۋەلسىزدىك تۋرالى» زاڭ جوباسى 14 جەلتوقساندا ٴبىر پىسىقتالىپ، 360 دەپۋتاتتىڭ پىكىرتالاسى ەكى كۇننەن سوڭ قايتا ٴوربىدى.

بولات ٴمۇرسالىم، ٴتىلشى:

- زاڭنىڭ تالقىلاۋى تۋرا وسى زالدا ٴوتتى. مىناۋ تۇستان اكادەميك جابايحان ٴابدىلدين زاڭعا مىقتى قۇقىقتىق مارتەبە بەرۋ كەرەك دەدى. دەپۋتات جاۆورونكوۆا مەملەكەتتىك ٴتىل قازاق، ورىس، اعىلشىن ٴتىلى بولسىن دەدى. ال، دەپۋتات قالپەنوۆ زاڭداعى "قازاق ۇلتى" دەگەن سوزگە سوقتىققان ارىپتەستەرىنە قاتتى رەنىشىن بىلدىرسە، كەيبىر دەپۋتاتتار "ٴقازىر جيرينوۆسكيي زامانى" دەپ، ۇلت ارازدىق تۋىپ، قازاق ۇلتى وزگە ەتنوستاردىڭ قۇقىعىن تاپتاپ كەتپەي مە دەگەن قوبالجۋلارىن انىق ٴبىلدىردى.

سەرىكبولسىن ٴابدىلدين، قر جوعارعى كەڭەسىنىڭ 1990-94 ج.ج. ٴتوراعاسى:

- ونداي قوبالجۋ بولدى. باسقا ۇلتتاردى قويىپ، قازاقتاردىڭ ٴوزى دە ەندى قالاي ٴبىز ٴوربيمىز، وسەمىز دەگەن پيعىلداردى ايتىپ ٴجۇردى.

دەگەنمەن، «قازاق ۇلتىنىڭ ٴوزىن-وزى بيلەۋ قۇقىن راستاي وتىرىپ»، جوعارعى كەڭەس باسىم داۋىسپەن قازاقستاننىڭ تاۋەلسىزدىگىن جاريالادى. ٴبىراق، ول كەز قازىرگىدەي اقپاراتتىڭ زامانى ەمەس. كوپ ەلگە قۋانىشتى جاڭالىق، ماعاۋين جازعانداي، «ەگىن وراعى اياقتالدى» دەگەندەي رەڭكپەن عانا جەتتى.

دوس كوشىم، ساياساتكەر:

- ونداي ٴبىر بورىكتى اسپانعا اتىپ، توي جاسايتىنداي جاعداي بولعان جوق.

38 مينۋتتان سوڭ قازاقستان تاۋەلسىزدىگىن تۇركيا تانىدى. ال، بۇگىندە تاۋەلسىزدىكتى باياندى ەتۋ – ٴار ازاماتتىڭ قاسيەتتى بورىشى بولىپ وتىر.

بولات ٴمۇرسالىم، دۋمان سۇلەيمەنوۆ، 31-ارنا

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي