USD 335.71 EUR 357.36 RUB 5.23
استانا:

جاڭاقورعاندا قازاق كۇرەسىنەن ٴداستۇرلى حالىقارالىق تۋرنير ٴوتتى

قىزىلوردا وبلىسىنىڭ جاڭاقورعان اۋدانىندا قوعام قايراتكەرى جانە ەڭبەك ارداگەرى ماشبەك نالىبايەۆتى ەسكە الۋعا ارنالعان قازاق كۇرەسىنەن ٴداستۇرلى حالىقارالىق تۋرنير قورىتىندىلاندى.

14 قازاندا باستالعان كۇرەس سايىسىنا قازاقستان، گرۋزيا، موڭعوليا، قىرعىزستان جانە وزبەكستاننان بارلىعى 28 بالۋان قاتىستى.

سايىس قورىتىندىسىنىڭ اشىلۋ سالتاناتىنا قىزىلوردا وبلىسىنىڭ اكىمى قىرىمبەك كوشەربايەۆ پەن ٴوڭىرارالىق ارىپتەستىك اياسىندا دەلەگاسيانى باستاپ كەلگەن اقتوبە وبلىسىنىڭ اكىمى بەردىبەك ساپاربايەۆ قاتىستى. ولار سپورتشىلاردى ٴداستۇرلى دودامەن قۇتتىقتاپ، ولارعا ساتتىلىك تىلەدى.

«قازاق كۇرەسىنەن رەسپۋبليكالىق چەمپيونات ون ٴبىرىنشى رەت جانە تۇيە پالۋاندار اراسىندا حالىقارالىق تۋرنير ەكىنشى مارتە ٴوتىپ جاتىر. «قازاقستان بارىسىنىڭ» العاشقى جەڭىمپازى شىققان ايماق ٴۇشىن وسى باسەكە بولاشاقتا دا بيىك ماقساتتى باعىندىرۋ باسپالداعى بولماق. بۇگىندە ەلباسىنىڭ ەرەكشە قولداۋى ارقاسىندا ەلىمىزدە سپورتتىق ينفراقۇرىلىم قارقىندى دامىپ، دەنە شىنىقتىرۋمەن شۇعىلدانۋشىلار قاتارى ٴوستى. بيىل قازاقستان رەسپۋبليكاسى تاۋەلسىزدىگىنىڭ 25 جىلدىعى قارساڭىندا تۋرنير وتكىزەمىز. تاۋەلسىز مەملەكەتىمىزگە بەيبىتشىلىك، قازاقستاندىق سپورتشىلارعا جەڭىس تىلەيمىن!» – دەدى قىزىلوردا وبلىسىنىڭ اكىمى قىرىمبەك كوشەربايەۆ.

اقتوبە وبلىسىنىڭ اكىمى بەردىبەك ساپاربايەۆ سپورتشىلار مەن جانكۇيەرلەرگە بەلسەندىلىگى ٴۇشىن العىس ايتتى.

ٴتۋرنيردىڭ قورىتىندىسىندا جەڭىمپازدار ديپلوم جانە العىس حاتتارمەن ماراپاتتالىپ، باعالى سىيلىقتار تابىستالدى. تۇيە بالۋاندار اراسىنداعى تارتىستى كۇرەستە باس جۇلدە «لادا گرانتا» اۆتوكولىگىنە گرۋزيادان كەلگەن لەۆاني ماتياشۆيلي يە بولدى.

ەكىنشى ورىندى جانە 500 مىڭ تەڭگە اقشالاي سىيلىقتى قازاقستاندىق ايبەك نۇعىماروۆ جەڭىپ الدى. ال ٴۇشىنشى ورىندى جانە 300 مىڭ تەڭگە اقشالاي سىيلىقتى گرۋزين گۋرامي تۋشيۆيلي الدى.

بۇدان بولەك، «جان اراي» جشس ديرەكتورى باقداۋلەت ماقاشەۆ ٴوز اتىنان تۋشيۆيليگە 1000 اقش دوللارىن تابىستادى.

khabar.kz

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي