BAQ.kz - Қазақстан жаңалықтары USD 371.31 BAQ.kz - Қазақстан жаңалықтары EUR 419.32 BAQ.kz - Қазақстан жаңалықтары RUB 5.59
استانا:

لۋكا مودريچ «التىن دوپقا» شىنىمەن لايىق پا؟ ساراپتاما

استانا، baq.kz ٴتىلشىسى. جىلدىڭ ۇزدىك فۋتبولشىسىنا تابىستالاتىن «التىن دوپ» سىيلىعىن 2018 جىلى حورۆاتيالىق لۋكا مودريچ جەڭىپ الدى. ول 10 جىلعا سوزىلعان كريشتيانۋ رونالدۋ مەن ليونەل مەسسيدىڭ گەگومونياسىن بۇزعان العاشقى فۋتبولشى اتاندى.

«التىن دوپ» قازىرگى كەزدە الەمدەگى ۇزدىك ويىنشىعا بەرىلەتىن جۇلدەنىڭ ەڭ ٴقادىرلىسى بولىپ تۇر. france football جۋرنالىنىڭ بۇل سىيلىعىن الۋعا فۋتبولشىلاردىڭ بارلىعى تالپىنادى. تىزىمدە جالپى سانى 30 ۇمىتكەر بولدى. ولاردىڭ اراسىندا ارينە، رونالدۋ مەن مەسسي دە بار. الايدا، سوڭعى 10 جىلدا ەشكىمگە دەس بەرمەگەن قوس مىقتىنىڭ ەكەۋىنە دە بۇل سىيلىق وسى جولى بۇيىرعان جوق.

«التىن دوپتىڭ» يەگەرىن انىقتاۋعا الەمنىڭ 180 ەلىنىڭ ٴجۋرناليسى قاتىستى. ولار france football جۋرنالىنىڭ ەرەجەسى بويىنشا 2018 جىلدىڭ ۇزدىك بەس فۋتبولشىسىنا داۋىس بەردى. ٴبىرىنشى ورىنعا – 6 ۇپاي، ەكىنشىگە – 4، ۇشىنشىگە – 3 ۇپاي ۇلەستىرىلەدى. قازاقستاننان داۋىس بەرۋگە گەنيي تولەگەنوۆ قاتىستى. وتانداسىمىز ٴبىرىنشى ورىنعا كريشتيانۋ رونالدۋدى قويعان.

داۋىس بەرۋدىڭ قورىتىندىسى بويىنشا لۋكا مودريچ 753 ۇپاي جيناپ، بارلىعىنان قارا ٴۇزىپ كەتكەن. ەكىنشى ورىنداعى كريشتيانۋ رونالدۋ 476 ۇپايعا يە بولعان. ۇشتىكتە انتۋان گريزمانن بار. مودريچ «التىن دوپتىڭ» يەگەرى اتانعان العاشقى حورۆات فۋتبولشىسى. ٴتىپتى، بۇرىن-سوڭدى يۋگوسلاۆيا ايماعىندا تۋعان فۋتبولشىلاردىڭ بىردە-بىرى قول جەتكىزبەگەن. ايتپاقشى، كەرەمەت ستاتۋەتكانىڭ باعاسى – 13 مىڭ ەۋرو تۇرادى.

وسىلايشا، ٴۇشىنشى جىل قاتارىنان «التىن دوپ» سىيلىعى «رەال» (مادريد) كومانداسىنىڭ ويىنشىسىنا بۇيىردى. بۇعان دەيىن ەكى رەت 2016 جانە 2017 جىلدارى كريشتيانۋ رونالدۋ قول جەتكىزگەن. مودريچ يسپانيانىڭ اتاقتى سپورتتىق باسىلىمى marca-عا بەرگەن سۇحباتىندا ٴتۇپتىڭ تۇبىندە «التىن دوپقا» يە بولاتىنا «رەالدى» جاتتىقتىرعان زينەددين زيداننىڭ سەنگەنىن ايتتى.

«ٴوزىمنىڭ «التىن دوپقا» ۇمىتكەرلەردىڭ قاتارىندا بار ەكەنىمدى بىلگەندە جەڭەتىنىمە سەنە باستادىم. الايدا، ەشقاشان ۇمىتپايتىن ٴبىر ٴساتتى ايتا كەتەيىن. زيدان 2016 جىلى قاڭتاردا «رەالعا» باس باپكەر بولىپ تاعايىندالعاندا، مەنى كوماندانىڭ ماڭىزدى ويىنشىسى رەتىندە كورەتىنىن جانە الداعى ۋاقىتتا «التىن دوپتى» جەڭىپ الۋىم مۇمكىن ەكەنىن ايتقان»، – دەيدى مودريچ.

حورۆاتيالىق فۋتبولشى «رەال» ساپىندا 2012 جىلدان بەرى 276 ماتچقا قاتىسقان (13 گول، 42 ناتيجەلى پاس). ايتپاقشى، مودريچ «التىن دوپقا» قول جەتكىزگەن «رەالدىڭ» جەتىنشى ويىنشىسى. بۇعان دەيىن مادريد كلۋبىندا ٴجۇرىپ، الفرەدو دي ستەفانو (1957، 1959)، رايمون كوپا (1958)، لۋيش فيگۋ (2000)، رونالدو (2002)، فابيو كانناۆارو (2006) جانە كريشتيانۋ رونالدۋ (2013، 2014، 2016، 2017) وسى سىيلىقتى جەڭىپ العان.

ٴسويتىپ، «رەال» «التىن دوپتى» جەڭىپ العان ويىنشىلارىنىڭ سانى جونىنەن «بارسەلونا»، «يۋۆەنتۋس» جانە «ميلاندى» باسىپ وزدى. اتالعان كلۋبتاردىڭ ٴارقايسىسىنىڭ 6 ويىنشىسى ٴار جىلدارى وسىناۋ مارتەبەلى سىيلىققا يە بولعان.

جاڭادان تاعى ەكى سىيلىق تابىستالدى

france football بيىلعى جىلى جاڭادان جەكەلەگەن ويىنشىلارعا بەرىلەتىن تاعى ەكى جۇلدەنى قوسىپتى. ونىڭ بىرەۋى بىلتىرعى جىلى دۇنيەدەن وتكەن فرانسيانىڭ اتاقتى فۋتبولشىسى رايمون كوپا اتىنداعى جۇلدە. اتالعان سىيلىق 21 جاسقا دەيىن ۇزدىك فۋتبولشىعا تابىستالاتىن بولادى. العاشقىسى فرانسيا قۇراماسى مەن پسج كلۋبىنىڭ 20 جاستاعى شابۋىلشىسى كيليان مباپپە جەڭىپ الدى. ۇمىتكەرلەر اراسىندا پاتريك كۋترونە («ميلان»)، ترەنت الەكساندەر-ارنولد («ليۆەرپۋل»)، دجانلۋيدجي دوننارۋمما(«ميلان») بولدى.

ەكىنشى جۇلدە ايەلدەر اراسىنداعى «التىن دوپ» سىيلىعى. وعان 23 جاستاعى «ليون» كلۋبىنىڭ نورۆەگيالىق شابۋىلشىسى ادا حەگەربەرگ قول جەتكىزدى.

رونالدۋ مەن مەسسيدى جەڭىلىستى كوتەرە الماي ما؟

بيىلعى جىلى جەكەلەگەن سىيلىقتاردىڭ بارلىعىن مودريچ جەڭىپ الدى. ول بۇعان دەيىن فيفا-نىڭ جانە ۋەفا-نىڭ تاڭداۋى بويىنشا ۇزدىك ويىنشى اتانعان. ەندى، مىنە، «التىن دوپتى» دا الىپ، 2018 جىلدىڭ تەڭدەسسىز فۋتبولشىسى ەكەنىن دالەلدەدى. ٴبىر قىزىعى، جىلدىڭ ۇزدىكتەرىن انىقتاعان سالتاناتتى ماراپاتتاۋ راسىمدەردىڭ بىردە-بىرەۋىنە كريشتيانۋ رونالدۋ مەن ليونەل مەسسي كەلگەن ەمەس. ەكەۋى دە الدىن-الا كىمنىڭ جەڭەتىنىن ەستىپ الىپ، قالىس قالعانداي. سالتاناتتى ماراپاتتاۋعا قاتىسىپ، بۇل جولى جەڭىلگەندى مويىنداي بىلگەندەرىندە ودان ەكەۋىنىڭ بەدەلى ٴتۇسىپ قالماس ەدى. بالكىم، ٴبىز بىلمەيتىن باسقا سەبەپتەرى بولعان شىعار.

قازان ايىندا كريشتيانۋ france football جۋرنالىنا بەرگەن سۇحباتىندا: «ىشتەي ٴوزىمنىڭ تاريحتاعى ۇزدىك ويىنشىلاردىڭ ٴبىرى ەكەنىمدى سەزەمىن. بۇعان دەيىن «التىن دوپتى» التىنشى رەت ۇتىپ توقتاپ قالمايتىنىمدى ايتقانمىن. ارينە، جەڭگىم كەلەدى. سول ٴۇشىن جۇمىس ىستەپ ٴجۇرمىن. ٴاربىر ويىندا گول سوعىپ، ماتچتى ۇتۋ ٴۇشىن ايانىپ قالعان كەزىم جوق. وسى جىلى التىنشى «التىن دوپتى» الۋعا ەڭبەگىم ٴسىڭدى دەپ سانايمىن».

ليونەل مەسسي سوڭعى 11 جىلدا العاش رەت ۇزدىك ۇشتىكتىڭ قاتارىنا كىرە المادى. ول داۋىس بەرۋدىڭ قورىتىندىسى بويىنشا بەسىنشى ورىندى قاناعات تۇتتى. 2006 جىلدان بەرى «بارسەلونا» كومانداسىنىڭ مىندەتتى ٴتۇردى ٴبىر فۋتبولشىسى العاشقى ۇشتىكتە بولاتىن. سول سەريا وسى جولى ٴۇزىلدى.

«بارسەلونا» كومانداسىنىڭ باس باپكەرى ەرنەستو ۆالۆەردە مەسسيدىڭ بەسىنشى ورىندا قالىپ قويۋۋىمەن كەلىسپەيتىن ٴتارىزدى. ول سالتاناتتى ٴىس-شارادان كەيىن تىلشىلەرگە بەرگەن سۇحباتىندا وسىنى ايتتى.

«مەن بۇل ماراپاتتاۋدى باعالامايمىن جانە قارسى ەشتەڭە دە ايتپايمىن. ۇيىمداستىرۋشىلار وزدەرى ٴتۇسىندىرۋى ٴتيىس. البەتتە، ٴمودريچتى جەڭىسىمەن قۇتتىقتايمىز، ٴبىراق بۇل ٴبىز ٴۇشىن ابسۋرد»، – دەيدى ۆالۆەردە.

گريزمانن تاعى دا ٴۇشىنشى

«التىن دوپتى» يەگەرى بولۋدى قاتتى ارماندايتىن ويىنشىلاردىڭ ٴبىرى – فرانسيا قۇراماسىنىڭ شابۋىلشىسى انتۋان گريزمانن. ول «التىن دوپقا» قول جەتكىزۋ ٴۇشىن ايانباي تەر توگىپ جۇرگەنىن سۇحباتتارىندا ٴجيى ايتىپ قالادى. گريزماننىڭ بۇل سىيلىقتى جەڭىپ الۋعا بيىل دا مۇمكىندىگى بولعان. 27 جاستاعى شابۋىلشى 2016 جىلى العاش رەت «التىن دوپتىڭ» ۇشتىگىنە كىرگەن. بيىل تاعى سول جەتىستىگىن قايتالادى. ٴبىراق جەڭىسكە جەتپەگەنىنە، داۋىس بەرۋدىڭ قورىتىندىسىنا كوڭىلى تولمايتىنىن فرانسۋز ٴوز سۇحباتىندا تاعى دا ايتىپ ٴوتىپتى.

«بۇل سىيلىقتى الماعانىما قاپالانىپ وتىرعان جوقپىن. ٴبىرىنشى كەزەكتە، وسى جىلى الەم چەمپيونى اتانعانىما قۋانىشتىمىن. كەلەسى جىلى ٴمودريچتىڭ ورنىنا مەنىڭ ۇلتتىق قۇراماداعى نەمەسە كلۋبتاعى ارىپتەستەرىمنىڭ بىرەۋى تۇرادى دەپ ۇمىتتەنەمىن. 2018 جىلى الەم چەمپيوناتى مەن ەۋروپا ليگاسىندا جەڭىسكە جەتتىم. «التىن دوپقا» قول جەتكىزۋ ٴۇشىن تاعى نە ىستەۋ كەرەكتىگىن تۇسىنبەيمىن»، – دەيدى گريزمانن تىلشىلەرگە بەرگەن سۇحباتىندا.

سوعىس الاڭىنان «التىن دوپتىڭ» يەگەرىنە دەيىنگى كەزەڭ

2018 جىلدىڭ فۋتبول الەمىندەگى قاھارمانى لۋكا مودريچ كوپشىلىك بىلگىسى كەلەتىن بولار. سوندىقتان ونىڭ ٴومىربايانىنا كوز جۇگىرتۋگە تۋرا كەلدى. «التىن دوپتى» جەڭىپ الىپ، حورۆاتيا حالقىن باقىتقا كەنەپ جاتقان لۋكا ٴمودريچتىڭ بالالىق شاعى وڭاي بولماعان. كسرو مەن قاتار 1990 جىلداردىڭ باسىندا يۋگوسلاۆيادا قۇلدىرادى.

مودريچ شىنىمەن دە، حورۆاتيا سپورتى تاريحىنىڭ جاڭا پاراعىن اشقان، «سوعىس كورگەن بالالاردىڭ» ٴبىرى. حورۆاتيا قۇراماسىندا ونەر كورسەتىپ جۇرگەن فۋتبولشىلاردىڭ كوبىسىنىڭ وتباسى سول كەزدە سوعىسقا بايلانىستى تۋعان جەرلەرىن تاستاپ قاشۋعا ٴماجبۇر بولعان. يۆان راكيتيچ شۆەيساريادا وسكەن، ماريو ماندجۋكيچ پەن دەيان لوۆرەننىڭ وتباسى گەرمانيانى پانالادى.

لۋكا 1985 جىلى حورۆاتيانىڭ زادار قالاسىندا دۇنيەگە كەلگەن. بالقان تۇبەگىندەگى سوعىس كەزىندە اتاسى قايتىس بولعان. سەرب اسكەرلەرى سوعىس باستالعاندا اۋىلداعى قارت كىسىلەردىڭ ٴبارىن كوشە ورتاسىندا دارعا اسىپ سوسىن اۋىلدىڭ ٴوزىن ورتەپ جىبەرەدى. امال جوقتان، بولاشاق «التىن دوپتىڭ» يەگەرىنىڭ اتا-اناسى تۋعان جەردەن قاشىپ، زاتون دەگەن قالاعا كوشىپ كەلەدى. ٴبىراق مۇندا دا سوعىس بولىپ جاتقان. وسىندا ٴمودريچتىڭ وتباسى بەس جىل تۇردى.

وسىنشالىقتى قيىن جاعدايعا قاراماستان، لۋكا فۋتبولداعى تالابىن وسىندا ۇشتاعان. اكەسى دە، بالاسىنىڭ قابىلەتىن بايقاپ، جەيدە مەن اياعىنا كيەتىن بۋتسى ساتىپ اپەرەدى. سپورتتاعى كارەراسى جەرگىلىكتى «زادار» كلۋبىندا باستالعان. لۋكانى كوماندانىڭ باس باپكەرى توميسلاۆ باشيچ ٴوز قاناتىنىڭ استىنا الادى. العاشقى جاتتىقتىرۋشىسىنىڭ ايتۋىنشا، اياققا تاعاتىن قورعانىش قۇرالىن اعاشتان جاساپ بەرگەن.

18 جاسىندا بوسنيا جانە گەرسەگوۆينا چەمپيوناتىنىڭ ۇزدىك ويىنشىسى اتانادى. سەبەبى، ول زاگرەبتىڭ «ديناموسىمەن» كەلىسىمشارت جاساسقاننان كەيىن «زرينسكي» كلۋبىنا جالعا بەرىلگەن. جارتىلاي قورعاۋشى 2003/04 جىلعى ماۋسىمدا جارقىراپ كورىنەدى. ٴوزى دە، ەگەر بوسنيا ليگاسىندا كورىنە السام، باسقا چەمپيوناتتا دا ەركىن وينايتىن بولامىن دەگەن. «زرينسكيدەن» كەيىن ٴبىر ماۋسىم حورۆاتيانىڭ «ينتەر» كومانداسىندا وينادى. ودان كەيىن ٴوز ەلىنىڭ باستى كلۋبى «دينامونىڭ» كوشباسشىسىنا اينالىپ، ٴارىقاراي ەۋروپانىڭ ۇزدىك كلۋبتارىنداعى كارەراسى باستالدى.

الاسا بويلى ٴمودريچتى 2008 جىلى انگليانىڭ «توتتەنحەم» كلۋبى ساتىپ الدى. سول كەزدە ترانسفەر قۇنى 21 ميلليون ەۋروعا باعالانعان. كەيىننەن وسى ترانسفەر ٴۇشىن جانجال بولدى. ويتكەنى، «دينامو» كلۋبىنىڭ ەسەپشوتىنا كورسەتىلگەن رەسمي سومانىڭ جارتىسى عانا تۇسكەن. وسىنداي الاياقتىققا سول كەزدەگى «دينامونىڭ» پرەزيدەنتى زدراۆكو ٴماميچتىڭ تىكەلەي قاتىسى بولعان. مودريچ 2015 جىلى بەرگەن سۇحباتىندا ترانسفەردەن تۇسكەن اقشانىڭ جارتىسى فۋتبولشىنىڭ جەكە ەسەپشوتىنا اۋدارىلىپ، كلۋب پرەزيدەنتى ٴماميچتىڭ تۋىستارىنا تاراتىپ بەرۋگە ٴماجبۇر بولعانىن ايتتى. ٴبىراق كەيىننەن ول بۇل سوزىنەن اينىپ قالدى. دەگەنمەن، داۋ ٴالى دە جالعاسىپ كەلەدى.

انگلياداعى 4 جىلدان كەيىن لۋكانى جاڭا مۇمكىندىكتەر كۇتىپ تۇردى. جوزە ٴموۋرينيۋدىڭ شاقىرۋىمەن «رەال» ساپىنا اۋىستى. ٴبىراق پورتۋگاليالىق باپكەردىڭ قاراماعىندا ونىڭ باعى بىردەن جانبادى. مودريچ، كلۋب باپكەرى موۋرينيۋ مەن ٴمادريدتىڭ باستى پلەيمەكەرى مەسۋت وزيل كەتكەن سوڭ، نەگىزگى قۇرامنىڭ ويىنشىسىنا اينالدى. كارلو انچەلوتتيدىڭ تۇسىندا ٴوزىن جاڭا قىرىنان بايقاتتى. ال زينەددين زيدان جاتتىقتىرعان جىلدارى حورۆاتيالىق جارتىلاي قورعاۋشى كوماندانىڭ كوشباسشىلارىنىڭ بىرىنە اينالدى.

«التىن دوپقا» قول جەتكىزۋىنە بيىلعى جىلى حورۆاتيا قۇراماسىنىڭ العاش رەت الەم چەمپيونىنىڭ فينالىنا شىعۋى ٴوز سەپتىگىن تيگىزگەنى انىق. سالتاناتتى ماراپاتتاۋدان كەيىن تىلشىلەر: ەگەر «التىن دوپ» پەن الەم چەمپيوناتىنىڭ كۋبوگىنىڭ بىرەۋىن تاڭداۋ كەرەك بولسا نە ىستەر ەدىڭىز؟ دەپ سۇراپتى.

«الەم چەمپيوناتىن تاڭدار ەدىم. 100 پايىز سولاي ناقتى ايتا الامىن. ويتكەنى، مەن ٴۇشىن جەكەلەگەن جەتىستىكتەن گورى كوماندالىق تروفەي ماڭىزدى. مەن ٴارقاشان كومانداعا وينايتىن فۋتبولشىمىن. ٴوزىمنىڭ جەكە شەبەرلىگىمدى كورسەتۋگە تىرىسقان ەمەسپىن. حورۆاتيا ٴۇشىن الەم چەمپيوناتى ماڭىزدى بولدى. وكىنىشكە قاراي، فينالدا جەڭىسكە جەتە المادىق. ارينە، «التىن دوپتى» العانىم دا ۇنايدى. بۇل دا جاقسى سىيلىق. ٴبىراق ٴسىز ايتقانداي تاڭداۋ بولسا، الەم كۋبوگىنا باسىمدىق بەرەر ەدىم»، – دەيدى مودريچ.

رونالدۋ مەن مەسسي 10 جىل بويى «التىن دوپتى» بەس-بەستەن ٴبولىپ الۋى كوپشىلىكتى جالىقتىرعانداي بولعان. اراسىندا ادىلەتسىزدىكتىڭ ورىن العانى دا جاسىرىن ەمەس. اسىرەسە، 2010 جىلى ليونەل مەسسيگە قاراعاندا ۋەسلي سنەيدەر مەن اندرەس ينەستانىڭ بۇل سىيلىقتى الۋعا ەڭبەگى كوبىرەك سىڭگەندەي كورىنگەن.

«بۇعان دەيىن «التىن دوپتى» الۋعا لايىقتى بولسا دا، قول جەتكىزە الماعان فۋتبولشىلار كوپ. مىسالى، حاۆي، ينەستا، سنەيدەردى ايتساق تا جەتكىلىكتى شىعار. ەندى، مىنە، داۋىس بەرۋگە قاتىسۋشىلار باسقالارعا دا نازار اۋدارا باستادى. بۇل ناگرادا – وسىعان دەيىن «التىن دوپتى» الۋعا ەڭبەگى سىڭگەن، ٴبىراق بۇيىرماعانداردىڭ» قۇرمەتىنە بەرىلگەندەي. شىنىمەن دە، بيىل مەن ٴۇشىن ەرەكشە جىل بولدى. جەڭىسكە جەتكەنىمە قاراعاندا، 2018 جىلى جاسىل الاڭدا ەرەكشە ونەر كورسەتكەن سەكىلدىمىن»، – دەيدى مودريچ bbc سايتىنا بىلدىرگەن پىكىرىندە.

لۋكا ٴمودريچتىڭ جەكە ستاتيستيكاسى:

ۇلتتىق قۇرامادا: 119 ماتچ، 14 گول

ۋەفا-نىڭ كلۋبتىڭ تۋرنيرىندە: 103 ماتچ، 10 گول

ىشكى چەمپيوناتتاردا: 498 ماتچ، 64 گول.

«التىن دوپ» - مودريچ ٴۇشىن بيىلعى ماۋسىمداعى ٴتورتىنشى جەكەلەي جۇلدە. حورۆات وسىعان دەيىن الەم چەمپيوناتىنىڭ ۇزدىك ويىنشىسى (ونىڭ دا اتى «التىن دوپ» دەپ اتالادى)، سونداي-اق ۋەفا-نىڭ نۇسقاسى بويىنشا ماۋسىمنىڭ ۇزدىگى (كلۋب جانە قۇراماداعى ويىندارى ٴۇشىن) جانە فيفا (the best) نۇسقاسى دا بويىنشا دا ۇزدىك فۋتبولشى اتانعان. ودان بولەك iffhs (حالىقارالىق فۋتبول تاريحى مەن ستاتيستيكا فەدەراسياسى) ٴمودريچتى ۇزدىك پلەيمەكەر دەپ تانىعان بولاتىن.

«التىن دوپ-2018» سىيلىعىنىڭ رەيتينگى:

1. لۋكا مودريچ («رەال»، حورۆاتيا)

2. كريشتيانۋ رونالدۋ («يۋۆەنتۋس»، پورتۋگاليا)

3. انتۋان گريزمانن («اتلەتيكو»، فرانسيا)

4. كيليان مباپپە («پسج»، فرانسيا)

5. ليونەل مەسسي («بارسەلونا»، ارگەنتينا)

6. موحامەد سالاح («ليۆەرپۋل»، ەگيپەت)

7. رافاەل ۆاران («رەال»، فرانسيا)

8. ەدەن ازار («چەلسي»، بەلگيا)

9. كەۆين دە بريۋينە («مانچەستەر سيتي»، بەلگيا)

10. حارري كەين («توتتەنحەم»، انگليا)


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي